V 1Dari Paulus, hamba Allah dahan rasul Kristus Yesus, nya diutus demi iman bala urang pilihan Allah dahan pangatahuan agan kabonaran nya mamimpin kasalehan. ² Akai sia mandapaatan pengharapan hidup kekal, nya dijanyian dari sabolum permulaan zaman obai Allah nya ntah kala pabulaan. ³ Pas waktu-Nya, Inya manyataan Firman-Nya malaluai pambritaan nya dipercayaan ka aku sasuai agan printah Allah, Juru Slamat kita. ⁴ Agan Titus, anak nya sah dalam iman kita sasama. Anugerah dahan damai sejahtera dari Allah, Bapa, dahan Yesus Kristus, Juru Slamat kita. Bala Tugas Titus akai Mamilih Panatua di Kreta ⁵ Obai iniam alasanku ningalan kolai di Kreta, inyaam akai kolai ulih manjadiai apa nya ija perlu diatur dahan maangkat bala panatua disatiap kota, uba posanku ka kolai. ⁶ Inya harus urangnya ntah ada colanya, laki dari siku bini, dahan bala anaknya percaya, dahan tidak dituduh hidup ntah bamoral atau mambrontak. ⁷ Sobab, panilik jemaat harus urangnya ntah bacola salaku palayan Allah, ntah somong, ntah copat godi, ntah pamabuk, ntah gala porap dahan ntah sarakah dalam manggoyap kauntukan. ⁸ Sabaliknya, gala manampung, manyayangai jolu baik, bijaksana, adil, alim, dahan ulih manguasaai diri. ⁹ Inya mamigap kuat agan pamaniran nya ulih dipercaya, sasuai agan yang jadi diajaran, akai inya dapat manasihatai manurut pangajaran sehat dahan manogur sia nya mambantahnya. ¹⁰ Sobab, banyak urang mambangkang, gala pabulaan, dahan manipu, hususnya sia dari kalompok urang basunat. ¹¹ Sia pantas disompalai nyawanya obai sia manyusahan samua kaluarga obai mangajaran bala jolu nya saharusnya ntah sia ajaran, justru mandatakan jolu nya mamaluan. ¹² Salah siku dari sia, inyani nabi sia siku, bapanir, "Dasar bala urang Kreta pabulaan, uba binatang buas nya jahai, dahan palanga nya losa." ¹³ Kasaksian ini bonar. Karna inyan, togur kata bonar tam sia nan akai sia nyadi sehat dalam iman. ¹⁴ Jangan pandingaan bala dongeng urang Yahudi dahan printah bala urang nya manulak kabonaran. ¹⁵ Bagi nya murni, samua inyani murni. Tapi, bagi sia nya najis dahan ntah percaya, ntah ada suti pan nya murni obai baik pikiran ataupan hati nurani sia inyani najis. ¹⁶ Sia ujai tai mangenal Allah, tapi agan kalakuannya sia manyangkal Allah. Sia inyan manjijikan, ntah taat, dahan ntah ulih malabuhan apa pan nya baik.