¹ "Tulisan tam akai malaikat jemaat di Efesus: Iniam firman dari Inya mamigap katujuh bintang di tangan kananNya. Inya nya bajalan di tongah-tongah katujuh kaki palita dari omas inyan bapanir, ² "Aku tahu ma agan pakarojaan kolai dahan pahora tulang kolai dahan kauletan kolai nan. Aku tahu ma kalau kolai ni ntah sabar agan sia nya bajawat kajahai'an, dahan kolai mauji sia nya mangaku dirinya para rasul, padahal bilanya bonar ma dahan jadi mambuktian sia inyan palsu. ³ Aku tahu ma agan pahora dahan kasabaran kolai nan, dahan kolai manangung banyak pandritaan obai namaKu, dan kolai ni rupanya ntah tahu hora. ⁴ Tapi ada jolunya Aku tuduhan kolai nan jadi maningalan kasih kolai nya pertama. ⁵ Sobab inyan ingat tam dari muna kolai kala jatu. Batobat tam dahan labuhan tam bala jolu nya samula jadi kolai labuhan nan. Amun kolai ntah batobat, Aku pacaan natakai kolai, dahan Aku pacaan maminahan kaki palita kolai dari tompatnya. ⁶ Tapi iniam jam nya ada di kolai: Kolai mambonciai apa nya di labuhan bala pangikut Nikalaus, nya Aku pan bonci jam. ⁷ Sopanya baponing, kahonanya inya mandingaan apa nya dikataan Roh agan bala jemaat. Sopa nya monang, inya pacaan Kukonyuai makan dari buah kayu kahidupan nya ada di Taman Firdaus Allah." ⁸ "tulisantam akai jemaat di Smirna: "Iniam firman dari I nya, Nya Awal Agan Nya Akhir, Inya nya jadi mati tapi jadi bangkit lagi. ⁹ "Aku tahu pandritaan dahan kakurakan kolai, tapi sabonarnya kolai nan kaya. Dahan dari sia nya manyobut dirinyaurang Yahudi, tapi nya sabonarnya bukai. Sia inyanan sinagoge Setan. ¹⁰ "Jangan gola agan pandaritaan nya harus kolai alapai. tiat! Sabonarnya iblis pacaan mambuakkan babaropa dari kolai ka dalam panyara akai mauji kolai, dahan pacaan mandarita samanah sapuluh ari. Totap tam setia sampai mati dahan Aku pacaan mangonyuai kolai mahkota kehidupan. ¹¹ Sopanya baponing, kahonanya maningaan apa nya di paniran Roh ka bala jemaat. Sopa nya monang, inya ntah pacaan mandarita obai kamatian nya kadua." ¹² "Tulisantam ka malaikat jemaat di Pergamus: Iniam firman dari Inya, Nya mamigap manau tajam bamata dua. ¹³ Aku tahu di muna kolai diap, inyanan di tompat Iblis bertakhta. Tapi kolai totap bapigap agan namaKu, dahan kolai tidak manyangkal iman kolai ka Aku, dahan ntah jam dalam masa Antipas, saksiKu nya setia, nya dibunuh dihadapan kolai, di tompat Iblis diap. ¹⁴ "Tapi Aku ada babaropa kaboratan agan kolai: Ada babaropa di antara kolai nya mamigap kuat kuat ajaran Bileam, nya jadimangonyu patunyuk ka Balak, lalu nyadi pahalang bangsa Israel, obai sia makan makatan nya jadi dipersembahan ka berhala,dahan jatu ka dosa persundalan. ¹⁵ Uba inyan jam ada di antara kolai nya bapigap kuat agan ajaran bala garombolan Nikolaus. ¹⁶ "Karna inyan batobattam! Amun ntah Aku pacaan datang ka kolai dahan Aku pacaan mamorakkai sia agan manau nya kaluar dari nyawaKu. ¹⁷ Sopa nya baponing, kahonanya inya maningaan apa nya dipaniran Roh ka bala jemaat. Sopa nya monang ,Aku pacaan mangonyuainya, manna nya ditapuan, dahan Aku pacaan mangonyu jam sabigi batu putih, nya batulisan sabuah nama baharu, inyanam nama nya ntah dikatahuai sopapan, salain urang nya manarimanya." ¹⁸ "Tulisantam ka malaikat jemaat d Tiatira: iniam firman dari Anak Allah, nya mataNya uba nyala api dahan kakiNya uba tamaga mangkilat dari tungku: ¹⁹ "Aku tahu agan pakarojaan kolai: kasih kolai, iman kolai, dahan kauletan kolai, dahan apa nya jadi kolai krojaan inini , jauh malobihai apa nya jadi kolai krojaan holu tai. ²⁰ "Tapi Aku ada kaboratan ini agan kolai: kolai jadi bahaum agan batina nya banama Izebel, nya manyobut dirinya nabiah. Inya jadi manyosatan bala hambaKu agan ajrannya, lalu sia malabuhan persundalan dahan makan makatan nya jadi dipersembahan ka berhala. ²¹ Aku jadi mangonyu waktu akainya, tapi inya ntah hona batobat dari persundalannya. ²² Tiat! Aku pacaan mambuakkannya ka ranyang urang sakit, dahan sianya jumpat bazinah agan inya, pacaan Ku buakkan ka dalam kasusahan bosar, kacuali sia batobat dari perbuatan batina inyan. ²³ Bala anaknya pacaan KUbunuh, dahan samua jemaat pacaan tahu bahwa Akuniam nya manyalidikai satiap pikiran agan niat hati urang. Aku pacaan mambalas agan kolai masing-masing sasuai apa nya jadi kolai labuhan. ²⁴ Tapi agan kolai nya bukai di Tiatira, nya ntah jumpat ajaran inyan dahan ntah tahu manahu agan bala jolu nya sia sobut sabagai ajaran Setan nya mandalam---agan kolai Aku paniran: Aku ntah hona manauh beban bukai akai kolai. ²⁵ tapi ubaapapan, pigaptam kuat-kuat apanya ada agan kolai sampai Aku datang. ²⁶ Bagi sopa nya monang dahan setia malabuhan apa nya Aku krojaan sampai jadi, akainya pacaan Kukonyuai kakuasaan agan bala bangsa. ²⁷ Inya pacaan mamarintah sia agan tungkah bosi, dahan sia pacaan dikromu uba tembikar pariu. ²⁸ Uba kuasa nya jadi kutrima dari bapaKu, akainya pacaan Kukonyuai bintang timur. ²⁹ Sopanya baponing, kahonanya inya maningaan apanya dipaniran Roh agan bala jemaat.