¹ Iniam wahyu Yesus Kristus nya dikonyu Allah ka Inya akai ditiatan ka bala hambaNya,mangonaai apanya harus bakajadian. Inya manyataan agan mautus malaikatNya ka Yohanes, hamba-Nya. ² Yohanes manyasian mangonaai bala jolu nya jadi inya tiat,mangonaai firman Allah, dahan mangonaai kasaksian nya jadi dikonyunya, mangonaai Yesus Kristus. ³ Bahagia am urangnya mambacaannya dahan sia nya mandingaan kata-kata nubuat ini, dahan manurutai apa nya tatulis di dalamnya, obai waktunya hampikam ⁴ Dari Yohanes, akai katujuh jemaat di Asia: Samoga anugrah turun pakai kolai dahan damai sejahtra, dari Inya nya ada inini, dahan nya jadi ada, dahan nya pacaan datang, dahan dari katujuh roh nya ada di hadapan takhtaNya, ⁵ dahan dari Yesus Kristus, Saksi nya setia, dahan nya pertama bangkit dari antara urang mati, nya nyadi panguasa agan bala raja di bumi. Bagi Inya nya mangasihai kita, dahan nya jadi malopasan kta dari bala dosa kita malauai darahNya--- ⁶ Inya jadi manjawat kita uba krajaan, nyadian kita bala imam ka Allah BapaNya --- bagi Inyaam kamuliaan dahan kuasa sampai salama-lamanya.Amin. ⁷ Tiatam, Inya datang agan bala awan; satiap mata pacaan maniat Inya, termasuk sianya jadi manula Inya.Samua suku bangsa di bumi pacaan maratapai Inya. Uy, Amin. ⁸ "Aku ni Alfa dahan Omega," uba iniam bunyi firman Tuhan Allah, "Nya inini ada, dahan Nya jadi ada, dahan Nya pacaan datang, Nya Mahakuasa." ⁹ Aku, Yohanes---samadikan kolai dahan nya jumpat kolai dalam pandritaan, dalam krajaan, dahan dalam kasabaran, dahan katekunan di dalam Yesus---diap di pulau nya banama Patmos, obai firman Allah, dahan kasaksian mangonaai Yesus. ¹⁰ Di dalam roh, pas hari Tuhan, aku ninga suara maha homan dari balikatku, uba bunyi tarompet. ¹¹ Ujainya, "tulis tam ka dalam buku, apanya kolai tiat nan, dahan kiripan tam ka katujuh jemaat---ka Efesus, ka Smirna, ka Pargamus, ka Tiatira, ka Sardis, ka Fiadelfia dahan ka Laodikia," ¹² Lalu aku babalik akai maniat suara nya bapanir ka aku tai, dahan pas aku mangilingnya katiatanku am tujuh kaki lampu dari omas. ¹³ Di tongah-tongah kaki lampu inyan ada siku nya manyarupaai Anak Mansia, mamakai jubah panyang sampai ka kaki, dahan di dadanya malilit tali peneng dari omas. ¹⁴ Kapala agan ramutnya putih uba bulu domba, putih uba salju, dahan mataNya macam daun api. ¹⁵ KakiNya macam tamaga nya mangkilap dari bara api tungku, dahan suaraNya macam riak arai nya mangalir doras. ¹⁶ Di tangan kananNya, Inya mamigap tujuh binyang, dahan dari nyawaNya kaluar sabilah manau tajam bamata dua. MatamuhaNya basinar macam sinar mataari nya maha podi kuat. ¹⁷ Waktu aku maniat Inya, aku takarobah kakiNya macam urang mati. Lalu Inya malotaan tangan kanan-Nya ka aku dahan bapanir, "Jangan gola ma. Aku niam Nya Asal dahan Nya Ahir, ¹⁸ dahan Nya hidup. Aku jadi matiam, tapi tiat tam, Aku hidup salama-lamanya! Dahan Aku mamigap kunci Maut dahan Hades." ¹⁹ Obai inyanam, tulis tam, apa nya jadi kolai tiat, apa nya bakajadian inini, dahan apa nya pacaan bakajadian jadi inyan. ²⁰ Mangonaai arti nya tasimpan dari katujuh bintang nya kolai tiat ada di tangan kananKu, dahan katujuh kaki lampu dari omas inyan: Katujuh bintang tai inyanam malaikat katujuh jemaat, dahan katujuh kaki lampu tai inyanam katujuh jemaat.