¹ Dari Paulus dahan Timotius, hamba Yesus Kristus ka samua urang kudus dalam Kristus Yesus nya ada di Filipi dahan ka bala panilik jemaat dahan majelis jemaat: ² Anugrah dahan damai sejahtra dari Allah, Bapa kita dahan Tuhan Yesus Kristus menyarotai kolai! ³ Aku basyukur agan Allahku satiap aku maingat kolai. ⁴ Dalam doaku akai hunin samua, aku hala badoa ponuh sukacita ⁵ Obai kerja sama hunin dalam pambritaan Injil mulai hari partama sampai inini. ⁶ Aku sangat yakin obai Inya jadi manamulaan pakarojaan baik di tongah kolai, Inya pan pacaan, manyampurinaanya jam sampai hari Yesus Kristus. ⁷ Memang pantas ma aku maasa uba ini agan kolai obai kolai samua ada di hatiku. Baik waktu aku dipanyara atau pan waktu aku mangonyu pambelaan dahan peneguhan akai Injil, kolai nyadi mitraku dalam Anugrah Allah. ⁸ Allah inyanam saksiku, aku maha marinuan hunin samua dalam kasih Yesus Kristus. ⁹ Inina Doaku: Kiranya kasih kolai makin batamah-tamah, agan pangatahuan dahan sagala hikmat; ¹⁰ sampai kolai dapat mamilih apa nya paling baik; pakai diri kolai tulus dahan tah cacat di hari Kristus; ¹¹ dahan diponuhai agan bala buah kabonaran nya datang malaluai Kristus Yesus akai kamulian dahan pujian bagi Allah. ¹² Bala samadikanku, kahonaku kolai tahu bahwa apa nya bakajadian agan aku malah pan mambaba kamajuan pakai Injil, ¹³ Sampai pan samua pangawal istana dahan urang bukai tahu ¹⁴ bahwa aku dipanyara bagi Kristus. Kabanyaan samadikan saiman tamah yakin agan Tuhan obai aku dipanjaraan ni, nyadi tamah brani mambritaan Firman Allah ntah ada asa gola. ¹⁵ Memang, ada bala urang nya mambritaan Kristus obai hiri dahan basaing, tapi ada jam nya bamaksud baik. ¹⁶ Sia bamaksud baik malakuannya karna kasih, sobab sia tahu aku jadi ditompatan di sini akai mambela Injil. ¹⁷ tapi sia nya bamaksud ntah baik, sia malakuannya obai ambisi egois, ntah tulus dahan pikirnya sia dapat manamah kasulitanku samanah aku dipanyara. ¹⁸ Lalu apa am hasilnya? Nya penting inyaam agan cara apa pan, baik agan pura-pura ataupan maksud bonar, Kristus dibritaan, dahan karna inyan aku bersukacita. Au, dahan aku pacaan trus bersukacita, ¹⁹ sobab aku tahu bahwa malaluai bala doa kolai dahan patolongan Roh Kristus Yesus, apa nya bakajadian agan aku malahan pacaan nyadi pambebasan pakai aku. ²⁰ Obai harapan nya ku yakitai inyanam aku sama sakali ntah badapat malu. Sabaliknya, aku dapat kabaranian ponuh supaya kristus, ubanya inini dahan hala dimuliaan dalam tubuhku, baik dalam kaadaan hidup atau pan mati. ²¹ Obai bagiku, hidup inyanan Kristus dahan mati inyanam keuntungan. ²² Tapi, amun aku harus hidup dalam tubuh ini, baarti aku pacaan bagawi mahasilan buah. Lalu, muna yang harus aku pilih, aku ntah tahu. ²³ Aku takopit dalam dua pilihan inyan. Kahonaku nan maningalan hidup ini dahan sasama agan Kristus, obai inyan jauh lobih baik. ²⁴ Tapi, akai kolai, paling lobih baguna amun aku totap hidup dalam tubuh ini. ²⁵ Agan kayakinan ini, aku tahu aku pacaan diap sasama agan hunin samua demi kamajuan dahan sukacita kolai dalam iman. ²⁶ kalau aku balik ka kolai lagi, maka kabangaan kolai pacaan batamah dalam Yesus Kristus obai aku. Basatutam dahan Totap ja Bajuang ²⁷ Amun uba inyan, hidup tam agan cara nya pantas bagi Injil Kristus supaya amun aku datang batomu agan kolai, atau aman ntah datang, aku hona maninga bahwa kolai totap badiri teguh dalam satu roh, agan satu fikiran, akai bajuang sasama bagi iman dari Injil. ²⁸ Jangan kolai hona dikagolaai bala musuh kolai, Obai inyan nan tana jelas kahancuran bagi sia, tapi kaslamatan bagi kolai, dahan tana inyan pan dari Tuhan. ²⁹ Sobab demi Kristus kolai jadi diKaruniaan bilanya baya akai percaya agan Inya, tapi akai mandrita jam bagi Inya. ³⁰ Inyan am sobabnya kolai mahadapai bala pergumulan nya sama uba nya kolai tiat aku hadapai,dahan nya inini kolai dingaan aku ija tongahan bergumul.