¹ Awal mulanya nan Firman, Firman inyan sasama agan Allah dahan Firman inyanam Allah. ² Firman inyan jadi sasama agan Allah dari samula. ³ Sagala jolu diciptaan malaluai Inya. Tanpa Inya, sagala jolu nya jadi ada ini tidak mungkin suba ada. ⁴ Di dalam Inya ada hidup dahan hidup inyanan Torang mansia. ⁵ Torang inyan bacahaya di dalam potang dahan potang dahan potang ntah dapat manguasaaiNya. ⁶ Ada siku urang nya diutus Allah, namanya Yohanes. ⁷ Inya datang sabagai saksi akai manyampaian kasaksian mangonaai Torang inyan supaya malaluai inya samua urang manyadi percaya. ⁸ Yohanes siku bukainya Torang inyan, tapi inya datang akai manyampaian kasaksian mangonaai Torang inyan. ⁹ Torang nya sejati, nya manorakai samua urang, pacaan datang ka dunia. ¹⁰ Torang inyan jadi ada di dunia dahan dunia ini jadi ni obai Inya. tapi dunia ntah mangenalNya. ¹¹ Inya mantakai hak milikNya, tapi hak milikNya inyan ntah manarima Inya. ¹² Tapi, sia nya manarima Inya dikonyuaiNya kuasa akai manyadi bala anak Allah, inyaam sia nya percaya agan namaNya. ¹³ Sia lahir bukainya dari darah atau kahonak daging, atau dari kahonak lalaki, tapi dari Allah. ¹⁴ Firman inyan manyadi dagikam dahan diap di antara kita. Kita jadi maniat kamuliaanNya, inyaam kamuliaan Anak Tungal Bapa, ponuh agan anugrah dahan kabonaran. ¹⁵ Yohanes mambori kasaksian mangonaai Inya kaping mandorah, "Iniam Inya nya kumaksud tai waktu aku bapanir, 'Jadi aku ni, pacaan datang nya mandaholuai aku obai Inya ada sabolum aku."' ¹⁶ Dari kaponuhanNya, kita samua manrima anugrah demi anugrah. ¹⁷ Sobab, Hukum Taurat dikonyu malaluai Musa; tapi anugrah dahan kabonran datang malaluai Yesus Kristus. ¹⁸ Ntah ada siku pan kala maniat Anak Tungal Allah, nya ada di pangkuan Bapa, manyataanNya. ¹⁹ Iniam kasaksian Yohanes waktu bala Urang Yahuhudi mautus bala imam dahan bala urang Lewi dari Yerusalem akai batanya ka Yohanes, Sopa kolai nan?" ²⁰ Yohanes mangaku, dahan inya ntah manyangkalnya, inya mangaku, "Aku bukainya Kristus inyan." ²¹ Sia batanya ka inya, "Kalau uba inyan, sopa kolai ni? Ntah ma kolai ni Elia?" Inya manjawab, "Aku bilanya Elia." "Apa kolai ni nabi inyan tai? Inya manjawab, "Bukainya." ²² Jadi inyan, sia batanya lagi ka inya, "Jadi sopa kolai ni, obai kami harus mambori jawaban ka urang nya mautus kami ni? Apa kata hunin mangonaai diri hunin siku?" ²³ Yohanes manjawab agan pakataan nabi Yesaya, "Aku niam suara urang nya dikataan nabi Yesaya nya mandorah-dorah di tongah hutan: 'Lurusan tam jalan akai Tuhan!"' ²⁴ Bala urang Yahudi nya diutus inyan nan urang Farisi. ²⁵ Lalu, sia bapanir ka Yohanes, "Amun kolai bukainya Mesias, bukainya Elia, dahan bukainya nabi inyan tai, maapa kolai nan mambaptis." ²⁶ Lalu Yohanes manjawab siaan, "Aku mambaptis agan arai ma, tapi di antara hunin nan badirin Sikuurang nya ntah hunin kenal. ²⁷ Inyanam nya pacaan datang jadi aku ni. mambuka tali kasutNya pan aku tidak pantas." ²⁸ Samua inyan bakajadian di Betania di saborang sungai Yordan, tompat Yohanes mambaptis. ²⁹ Pas ari kahobuannya, Yohanes maniat Yesus datang ka inya, dahan Yohanes bakata, "Tiat am, Anak Domba Allah nya mahapusan dosa dunia! ³⁰ Inyanam nya aku maksud nan waktu aku bakata, 'Jadi aku ni pacaan datang Sikuurang nya lobih bosar daripada aku obai Inya jadi ada sabolum aku ada.' ³¹ Holu tai aku ntah mangenal Inya, tapi supaya Inya dinyataan ka bala urang Israel, makanya aku datang ,mambaptis agan arai ni." ³² Dahan, Yohanes basaksi, ujainya, "Aku maniat Roh turun dari langit manyarupaai burung dara dahan Roh inyan badiap di Inya. ³³ Aku siku pan ntah mangenal Inya, tapi Inya nya mautus aku akai mambaptis agan arai ni bapanir ka aku, 'Inya nya didiapai Roh nya hunin tiat turun dahan diap di Inya tai, Inya nam nya pacaan mambaptis agan Roh Kudus.' ³⁴ Aku siku pan jadi niat am dahan mambori kasaksian bahawa Inya iniam Anak Allah tai.'" ³⁵ Ari kahobuannya, Yohanrs badirin lagi agan dua urang muridnya, ³⁶ dahan inya maniat Yesus tongahan bajalan. Kata Yohanes, "Tiam ba, Anak Domba Allah nan!" ³⁷ Kadua muridnya pan mandinga ma agan pamanirannya inyan lalu sia manyurutan Yesus. ³⁸ Yesus maniat ka balikat dahan waktu maniat sia nya manyurutanNya, Inya bakata ka sia, "Jolu apa nya hunin goyap nan?" Jawab sia agan Inya, "Rabi [amun diterjemahan artinya: Guru], di muna Duan badiap nan?" ³⁹ UjaiNya ka sia, "Ayu am akai hunin pacaan maniatnya." Jadi inyan, sia datakai lalu maniat tompat Inya badiap tai dahan sia pan badiap sasama agan Inya ari inyan obai waktu inyan kira-kira jadi jam kasapuluh. ⁴⁰ Salah siku dari murid nya mandinga pamaniran Yohanes lalu manyurutan Yesus tai inyaam Andreas, samadikan Simon Petrus. ⁴¹ Sabolumnya, Andreas manomuai Simon, samadikannya, dahan mamboritahunya, "Kami tai jadi manomuan Mesias [nya diterjemahan manyadi 'Kristus']." ⁴² Jadi inyan, lalu Andreas mambaba Simon ka Yesus. Yesus barotian Simon lalu bakata, "kolai ni Simon, anak Yohanes. Kolai pacaan ditingkau Kefas [nya baarti 'Petrus' atau 'Batu']." ⁴³ Ari kahobuannya lagi, Yesus hingkas ka Galilea. Inya batomu agan Filipus dahan bakata ka inya, "Tam pogi Aku!" ⁴⁴ Filipus baasal dari Betsaida, kota tompat Andreas agan Petrus badiap. ⁴⁵ Filipus batomu agan Natanael dahan bakata ka inya, "kami jadi manomuan Inya nya dijelasan Musa dalam Hukum Taurat dahan nya dijelasan para nabi, inyaam Yesus dari Nazaret, anak Yusuf." ⁴⁶ Natanael bakata ka inya, "Mungkin bi jolu nya baik datang dari Nazaret?" Jawab Filipus ka inya, "Datakai lalu tiat tam." ⁴⁷ Yesus maniat Natanael natakaiNya dahan bapanir mangonaai Natanael, "Protian tam, urang Israel sejati, ntah ada kapalsuan di dalam Inya!" ⁴⁸ Natanael batanya, "Uba apa Duan lalu tahu agan aku?" Yesus manjawab, "Sabolum Filipus maningkau kolai, Aku jadi maniat waktu kolai duduk di babah kayu ara." ⁴⁹ Jawab Natanael, "Rabi, Duan nan Anak Allah. Duan nan Raja urang Israel." ⁵⁰ Yesus manjawab lalu bakata ka inya, "Obai Aku madahan agan kolai, 'Aku ada maniat kolai di babah kayu ara', lalu kolai percaya? Kolai pacaan maniat bala jolu nya lobih bosar dari ini lagi!" ⁵¹ Lalu, Inya malanyutan panirNya, "Sabonarnya, Aku bapanir ka hunin, hunin pacaan maniat langit tabuka dahan bala malaikat Allah naik turun malayatai Anak Mansia."