¹ Paulus,nya nyadi rasul bukainya karna mansia,tapi pangilan Kristus Yesus Bapa nya mambangkitan Inya dari antara urang mati. ² Dahan,dari samua samadikan saiman nya sasama agan aku,akai bala jemaat di Galatia. ³ Anugrah dahan damai sejahtra dari Allah Bapa kita dahan Tuhan Yesus, Kristus, ⁴ nya jadi mangonyu diri-Nya bagi bala dosa kita manyalamatan kita dari zaman nya jahai inini sasuai agan kahona Allah dahan Bapa kita. ⁵ Bagi Inya nam kamuliaan akai salama-lamanya. Amin. ⁶ Aku heran, maapa maha copat kolai maningalan Inya, nya mamangil kolai malaluai anugrah Krirtus, dahan ba alih ka injil nya bukai. ⁷ Padahal, ntah ada injil nya bukai. Tapi, ada bala urang nya mangacauan kolai dahan mamutarbalian Injil Kristus. ⁸ Lalupan, amun kami atau malaikat dari surga mambritaan injil ka kolai nya ntah sasuai agan apa nya jadi kami britaan ka kolai,celakatiam inya! ⁹ Uba nya jadi kami paniran sabolumnya dahan inini aku paniran lagi, amun ada urang nya mambritaan injil ka kolai nya ntah sasuai agan apa nya jadi kolai trima,celakatiam inya. ¹⁰ Bilanya inini aku manggoyap persatujuan mansia atau Allah? atau, bilanya aku mancuba manyonangan mansia? Sakiranya aku ija mancuba manyonangan mansia, baarti aku bukainya hamba Kristus. ¹¹ Bala samadikan, aku hona kolai tahu bahwa injil nya kubritaan bukainya injil jawatan mansia. ¹² Aku ntah manarimanya atau mampalajarainya dari mansia, tapi aku manarimanya malaluai panyataan dari Kristus Yesus. ¹³ Sobab, kolai jadi mandinga mangonaai cara hidupku nya manah dari agama Yahudi, aku manganiaya jemaat Allah maha kejam dahan bausaha akai mahancurannya. ¹⁴ Aku pan maju dalam hal agama Yahudi, jauh lobih maju dibaning agan urang sebaya di antara bangsaku. Aku pan rajin dalam mamalihara adat istiadat upuy hiangku. ¹⁵ Tapi, pas Allah, nya jadi misahan aku dari dalam kanukan umaku dahan jadi mamangil aku malaluai anugrah-Nya, diubahan manyataan Anak-Nya dalam aku akai aku dapat manyataan Inya di antara bala urang bukai Yahudi, aku ntah ada minta nasihat ka sopa pan. ¹⁷ Aku pan ntah ada ka Yerusalem manomuai sia nya nyadi rasul am holu dari aku, tapi aku tula ka Arab dahan babalik lagi ka kota Danamkus. ¹⁸ Tiga tahun jadi inyan, aku ka kota Yerusalem akai bakenalan agan Kefas lalu diap gan inya samanah lima bolas ari. ¹⁹ Tapi, aku ntah ada maniat siku pan rasul bukai, kacuali Yakobus, samadikan Tuhan. ²⁰ Aku mayakinan kolai di hadapan Allah bahwa apa nya kutulis ini ntah nya pabulaan. ²¹ Jadi inyan, aku ka daerah Siria agan Kilikia. ²² Bala jemaat dalam Kristus di daerah Yudea bolum kenal sacara pribadi agan aku. ²³ Sia baya ropat mandinga, "Inya nan, holu tai manyiksa kita, inini mambritaan iman nya holu tai kala hona di hancuran." ²⁴ Sia mamuliaan Allah karna aku.