¹ Dari Paulus, nya nyadi Rasul Yesus Kristus obai kahona Allah, dahan dari Timotius samadikan saiman kita. ² Agan bala urang kudus dahan bala samadikan saiman nya satia dalam Kristus di Kolose. Anugrah bagi kolai dahan damai sejahahtera dari Allah Bapa kita. Doa dahan Ucapan Syukur Paulus ³ Waktu badoa akai kolai, kami hala maucap syukur ka Allah, Bapa dari Tuhan kita Yesus Kristus, ⁴ obai kami mandinga mangonaai iman kolai dalam Yesus Kristus dahan kasih kolai akai bala urang kudus. ⁵ Iman agan kasih inyan muncul obai pangharapan inyan disadiaan bagi kolai di surga, nya jadi hunin dinga dalam firman kabonaran, Inyan am Injil. ⁶ Injil inyan jadi sampai ka hunin malahan ka saluruh dunia dahan Injil ini trus mahasilan buah mongka maha manyadi, sama uba nya bakadian di tongah hunin, dari ari hunin mandinganya dahan mamahapai Anugrah Allah dalam kabonaran. ⁷ Hunin jadi balajar hal ini dari Epafras, kawalku palayanan nya kakasih hati kami nyadi palayan Kristus nya satia bagi hunin. ⁸ Inya nam nya mamadahan ka kami mangonaai kasih kolai dalam Roh. ⁹ Obai inyan, dari ari kami mandinganya, kami ntah kala tonga badoa akai hunin dahan minta akai Tuhan mamonuhai hunin agan pangatahuan mangonaai kahonak-Nya dalam sagala hikmat dahan pangarotian rohani. ¹⁰ Agan uba inyan kolai dapat hidup agan cara nya pantas di hadapan Tuhan, manyonangan hati-Nya dalam sagala jolu, mahasilan buah dalam satiap pakarojaan baik, dahan mongka tumuh dalam pangatahuan agan Allah. ¹¹ Samoga hunin dikuatan agan sagala kakuatan sasuai agan Kamuliaan kuasa-Nya akai hunin dapat sagala katekunan dahan kasabaran agan sukacita. ¹² Basukur tam agan Bapa nya jadi manjawat kolai mamonuhai syarat akai manarima bagian dari warisan bala urang kudus dalam torang. ¹³ Inya jadi malopasan kita dari kuasa kagolapan dahan maminahan kita ka Krajaan Anak-Nya nya kakasih hati. ¹⁴ Dalam Inya, kita dapat panobusan, Inyan am pangamputan bala dosa kita. ¹⁵ Inya nam gambaran dari Allah nya ntah katiatan, nya kajulaan dari samua ciptaan. ¹⁶ Sobab obai Inya bala jolu nya ada di surga dahan di bumi diciptaan, nya katiatan agan nya ntah katiatan, baik tahta, Kakuasaan, Pamarintah, atau pan Panguasa. Bala jolu jadi diciptaan malaluai Inya dahan akai Inya. ¹⁷ Inya jadi ada sabolum bala jolu, dahan bala jolu di Tuna sasama dalam Inya. ¹⁸ Inya nan kapala dari Tubuh, inyaam jemaat. Inya jam nya awal, nya kajulaan dari antara urang mati akai inya njadi nya utama dalam sagala jolu. ¹⁹ Obai, Allah berkenan akai saluruh kaponuhan-Nya dahan diap dalam Inya. ²⁰ Malaluai Inya, Samuanya di damaian agan diri-Nya, baik nya ada bumi atau pan di surga, inyanam kadamaian malaluai darah-Nya nya tacurah di kayu salib. ²¹ Hunin holu tai takasisi, Mamusuhai Allah dalam pikiran hunin dahan malabuhan bala kalakuan jahai, ²² Inini jadi didamaian agan tubuh jasmani Kristus malaluai kamatian-Nya akai mangonyu hunin sabagai persembahan nya kudus, ntah ada cacat cola di hadapan Allah. ²³ Jadi, totap tam hunin baiman, kuat kokoh dahan teguh ntah taguyakan dari pangharapan Injil nya hunin dinga, nya jadi dibritaan ka saluruh ciptaan di babah langit, nya obai inya aku, Paulus, manyadi palayan. ²⁴ Inini aku basukacita dalam pandritaanku demi hunin obai di dalam dagingku aku malengkapai apa nya kurang dalam pandritaan Kristus, demi tubuh-Nya, inyan am jemaat. ²⁵ Aku nyadi palayan jemaat manurut tugas Panatalayatan dari Allah nya disorahan ka aku akai hunin supaya aku dapat mangabaran firman Allah saponuhnya. ²⁶ Iniam rahasia nya dioma'an dari zaman ka zaman dahan generasi ka generasi, tapi inini jadi dinyataan ka bala urang kudus-Nya. ²⁷ Allah hona manyataan ka sia nya maha dampu rahasia mulia ini di antara bala bangsa bukai, obai Yesus ada di dalam hati hunin, inya nam pangharapan dari kamuliaan. ²⁸ Kami mambritaan mangonaai Inya agan manogur dahan mangajar satiap urang agan sagala hikmat sampai kami dapat mambaba satiap urang nyadi dewasa dalam Kristus. ²⁹ Akai inyan am, aku pan bahora bauyuh, bajuang sasuai agan kuasa-Nya nya bakaroja koras di dalam aku.