¹ Bala samadikan nya kukasiahai, ini ni surat kadua nya aku tulis akai hunin. Dalam kadua surat inyan, aku bausaha mangompa pikiran hunin nya murni agan cara maingatan hunin, ² supaya hunin maingat bala perkataan nya holuan tai jadi dikataan bala nabi kudus dahan bala printah Tuhan dahan Juru Slamat malaluai para rasul. ³ Pertama-tama, katahuai tam bahawa di ari-ari tarahir nona, para paojok pacaan datang akai manurutai hawa nafsu sia nya badosa. ⁴ Sia pacaan bakata, "Muna nyam janyi mangonaai kadatakanNya tai? Obai dari upuy ninik kita mati, samuanya ija totap bajalan uba ija permulaan penciftaan." ⁵ Sobab siaan sangaja malupaan kenyataan bahawa obai firmanNya nam, langit jadi ada dari holuan tai ma, dahan bumi dijadian dari arai dahan malaluai arai. ⁶ Agan arai inyan jam, dunia nya ada inyan dihancuran agan arai bah. ⁷ Tapi, agan firman nya sama jam, langit dahan bumi nya ada inini disimpan akai dicucul agan api di ari penghakipan dahan kahancuran bala urang jahai. ⁸ Bala samadikan nya kukasihai, jangan klupaan kenyataan nya sabuti ini ni: Bagi Tuhan, saari asa saribu tahun dahan saribu tahun asa saari. ⁹ Tuhan ntah kala batele-tele akai mamonuhai janyiNya uba nya diangap babaropa urang sabagai katalamatan. Sabaliknya, Inya sabar agan hunin obai Inya ntah hona siku pan nya banasa, tapi supaya samua urang datang dahan batobat. ¹⁰ Ari kadatakan Tuhan pacaan sampaiam uba urang pangolit, dahan langit pacaan hilang agan suara kuat. Bala benda langit pacaan lobur habis dahan maleleh obai api nya maha hangat, dahan dunia agan sagala isinya pan pacaan lobur habis jam. ¹¹ Jika sagala jolu pacaan dihancuran agan cara ini ni, ubaapatam saharusnya hunin hidup? Mongka hunin harus hidup suci dahan mangabdi agan Allah, ¹² kaping pan kanantian dahan maparcopat ari kadatakan Allah? Di ari Tuhan, langit pacaan hancur obai api, dahan samua bala benda langit maleleh obai hangatnya. ¹³ Tpi, sasuai agan janyi Allah, kita manati langit dahan bumi nya baharu, akai tompat bala urang nya bonar pacaan badiap. ¹⁴ Bala samadikan nya kukasihai, obai kita manti jolu in yan, maka bausaha tam agan rajin supaya Allah manomuai hunin ntah badosa, ntah banoda, dahan badamai agan Allah. ¹⁵ Angap tam kasabaran Tuhan sabagai kasompatan. Sama uba nya Paulus, samadikan terkasih kita, jelasan agan hunin dengan hikmat nya dikonyuai Allah ka inya. ¹⁶ Inya pan mamaniran bala jolu ini dalam samua suratnya nya bukai. Memang ada bala jolu nya sulit dimengerti sampai diputarbalikan bala urang nya bodoh dahan nya lomah imannya. Sia pan malabuhannya jam di bagian-bagian bukai dari Kitab Suci, nya maakibatan kabinasaan akai diri sia siku. ¹⁷ Bala samadikan nya kukasihai, obai hunin jadi tahuam agan jolu ini ni, hati-hati tam akai hunin jangan disosatan obai kasalahan dari bala urang nya ntah mangenal hukum. Jangan hunin jatuk dari iman hunin nya kuat nan. ¹⁸ Tapi, batumuh tam dalam anugrah dahan pangenalan agan Tuhan dahan Juru Slamat kita, Yesus kristus. Akai Inyanam kamuliaan, inini dahan sampai salama-lamanya! Amin.