¹ Zaman holu tai, ada bala nabi palsu di tongah umat Allah, uba inini pan ada bala guru palsu di tongah hunin nan nya diam-diam mangajaran bala ajaran nya marusak, bahkan manyangkal Tuhan nya jadi manobus sia, sampai mandatakan kahancuran nya copat agan diri sia siku. ² Dahan pacaan banyak urang nya manurutai cara hidup sia nya ntah bamoral, dahan obai sia nam, jalan kabonaran pacaan dihujat. ³ Dengan serakah sia pacaan manguti untung dari hunin agan kata-kata nya ponuh tipu daya; hukupan akai sia nya jadi disiapan dari holuan tai tidak akan di tunda-tunda, dahan kahancuran sia tidak akan terlelap. ⁴ Sobab, amun Allah ja ntah manahan diri waktu para malaikat badosa, tapi mambuakan sia ka dalam naraka am dahan manyorahan sia ka dalam rantai potang kabut akai ditahan sampai penghakipan, ⁵ dahan amun Allah pan ntah ngidahan dunia purba kacuali Nuh, Urang pambrita kabonaran sasama agan tujuh urang nya bukainya, tapi mandatakan arai bah ka dunia nya tidak mangenal Allah; ⁶ amun Allah mahukum kota Sodom agan Gomora agan cara mahancuran kadua kota inyan sampai nyadi habu, dahan manyadian sia sabagai contoh mangonaai apa nya pacaan bakajadian agan bala urang jahai nya hidup di masa berikutnya; ⁷ dahan amun Allah manyalamatan Lot, urang bonar inyan, nya mandrita obai cara hidup nya najis dari bala urang nya ntah mangenal hukum, ⁸ [akai samantara waktu, Lot hidup di tongah-tongah sia satiap ari, dahan jiwanya nya bonar mandrita obai maniat dahan mandinga bala kalakuan jahai nya inya tiat dahan dinga;] ⁹ maka Allah pasti tahu uba apa malopasan bala urang bonar dari pencobaan dahan manahan bala urang jahai akai dihukum di ari penghakipan. ¹⁰ HUsusnya sia nya mamuasan tubuhnya dalam kahona comarnya, dahan nya maremehan pamarintah. Agan sangat lancang dahan somong, bala guru palsu inyan ntah gola mahina bala bintang nya mulia, ¹¹ padahal para malaikat, nya biar pan jauh lobih kuat dahan bakuasa daripada sia, ntah mangaluaran tuduhan nya manganung hujatan agan sia di hadapan Tuhan. ¹² Bala guru palsu ini uba binatang nya ntah baakal, nya dilahiran akai ditangkap dahan dibunuh; sia mahujat apa nya ntah sia mangerti, pacaan dibinasaan dalam kahancuran sia siku; ¹³ sia pacaan dilabuhai kajahaian sabagai upah perbuatan sia nya jahai. Sia manggap mabuk-mabukan di siang ari sabagai kasonangan. Sia nan noda dahan cela, basonang-sonang dalam kapalsuan sia waktu makan sasama agan hunin. ¹⁴ Mata sia ponuh agan nafsu perzinahan dahan tidak akan tonga bajawat dosa, sia mampangaruhai bala urang nya lomah jiwanya, dahan sia jadi terbiasa dalam kasarakahan. Sia nan anak-anak nya terkutuk! ¹⁵ Sia manigalan jalan nya lurus dahan manyurutan jalan nya sosat, nyaam jalan Bileam bin Beor, nya hobi manarima upah akai perbuatan jahai. ¹⁶ Tapi, inya dapat toguran koras akai palangarannya dari siku keledai nya bisu, tapi inya bapanir uba suara mansia sampai manongaan kalakuan gila nabi palsu inyan. ¹⁷ Bala urang ini uba mata arai nya koring dahan uba kabut nya dilabuhai badai. Golap nya maha potang kabut jadi disadiaan akai siaan. ¹⁸ Bala pamaniran somong, tapi kosong, sia manjebak bala urang nya jadi talopas dari sia nya hidup dalam kasosatan agan bala kahona daging dahan agan percabulan. ¹⁹ Bala guru palsu itu manjanyian kabebasan, padahal sia siku pan budak dari kabinasaan. Sobab, apa pan nya jadi mangalahan siku urang, kainyanam urang inyan diperbudak. ²⁰ Sobab, amun sia jadi dilopasan dari pencemaran dunia nya jahai malaluai pangenalan agan Tuhan dahan Juru Slamat kita, Yesus Kristus, tapi jadi inyan babali lagi ka dunia nya jahai inyan dahan dikuasaainya, maka sia pacaan manyadi lobih parah daripada sabolumnya. ²¹ Sabonarnya lobih baik jika sia ntah kala mangenal jalan kabonaran inyan, daripada jadi mangenalnya sia babalik dari hukum suci nya jadi dikonyu ka sia. ²² Sia nan gamaran dari pribahasa nya bonar ini: "Kuduk babali ka mutahnya siku" dahan "Babi nya jadi di mani ai, babali lagi bakudang ka lumpur".