¹ Dari Simon Petrus, hamba dahan rasul, ka sia nya jadi manarima iman nya sama agan nya ada di kami malaluai kabonaran Allah dahan Juru Slamat kita, Yesus Kristus. ² Kiranya anugrah dahan damai sejahtra malimpah akai hunin di dalam pangenalan agan Allah dahan Yesus, Tuhan kita ³ KuasaNya ilahi jadi maanugrahan ka kita sagala jolu nya mangonaai hidup dahan kasalehan, malaluai pangatahuan agan Inya nya jadi mamangil kita manuju ka kamuliaan dahan kabaikanNya. ⁴ Malaluai inya Inya jadi maanugrahan akai kita janyiNya nya maha bosar dahan baroga supaya agan bala janyi inyan tai hunin dapat jumpat nguti bagian dalam kailahianNya, dahan lopas dari karusakan nya bakajadian di dunia, nya di sobaban bamacam hawa nafsu. ⁵ Akai tujuan inyan, bausaha tam bonar-bonar akai manamahai iman hunin agan kabajikan, kabajikan agan pangatahuan, ⁶ agan panguasaan diri dahan panguasaan diri agan katabahan, katabahan agan kasalehan, ⁷ kasalehan agan kasih basamadikan, kasih basamadikan agan kasih nya ntah mamentingan diri siku. ⁸ sobab, amun samuanya ini ada dalam diri hunin trus batamah-tamah, maka tidak mungkin nyadi sia-sia atau ntah babuah dalam pangatahuan agan Tuhan kita, Yesus Kristus. ⁹ Tapi, urang nya tidak ada samuanya inyan nan urang nya ntah dapat maniat jelas dahan buta karna kalupaannya bahawa inya jadi barosiham dari bala dosanya nya holu tai. ¹⁰ Karna inyan am, bala samadikanku, bausaha tam lobih rajin lagi akai mamastian bahawa hunin bonar-bonar dipasngil dahan dipilih; sobab amun hunin malabuhannya, kolai tidak akan jatu. ¹¹ Agan uba inyan, pintu ka dalam krajaan surga kekal Tuhan dahan Juru Slamat kita pacaan tabuka lebar akai hunin. ¹² Inyan am sobabnya, aku banaksud akai hala maingatan hunin agan samua jolu inya, skali pan hunin ntah nangatahuainya dahan jadi di bangun agan kuat dalam kabonaran nya inini ada di kolai am. ¹³ Salama aku ija hidup dalam mantirung duniswi ini, aku maangap perlu akai maanyuran hunin agan cara maingatan hunin, ¹⁴ sobab ktahuku ma amun aku pacaan maningalan mantirung uba ini nya jadi ditunyuan Tuhan kita, Yesus Kristus, ka aku dengan jelas. ¹⁵ Dahan, aku bausaha agan sagala upayaku akai manjawat kolai totap maingat samuanya ini pas sapaningal aku nonanya. ¹⁶ Sobab kami ntah manurutai bala tahayul nya dikarang dengan pintar waktu memperkenalan ka hunin kuasa dahan kadatakan Tuhan kita Yesus Kristus, tapi karna kami ni bala saksi mata akai kamuliaanNya. ¹⁷ Sobab waktu Yesus manarima hormat dari Allah Bapa, uba pas dikataan ka Inya dari Nya Mahamulia, "Iniam AnakKu nya Kukasihai, agan Inya nam Aku bakahona," ¹⁸ Kami pan mandinga suara inyan datang dari surga waktu kami sasama agan Inya di pucu gunung suci. ¹⁹ Kami pan samakin diyakitan dari pamaniran nubuat, nya sabaiknya pan kolai perhatian baik-baik, uba mamperhatian palita nya manyala di tompat nya potang, sampai ari siang dahan bintang fajar mancira dalam hati hunin. ²⁰ Tapi, jolu nya terutama nya harus hunin pahapai inyaam bahawa tidaka ada nubuat dalam Kitab Suci nya baasal dari panafsiran mansia, ²¹ sobab ntah ada sbuti pan nubuat nya muncul dari kahona mansia; sabaliknya, bala urang bapanir badasaran pimpinan Roh Kudus.