¹ Dari Paulus Urangnya rasul Yesus Kristus, akai bala urang nya diap sabagai urang asing nya tasebar di saluruh wilayah Pontus, Galatia, Kapadokia, Asia, dahan Bitinia; nya dari samula ² dipilih Allah Bapa malaluai pangudusan Roh akai dapat hidup dalam kataatan agan Kristus Yesus dahan mandapat percikan darahNya: Kiranya anugrah dahan damai sejahtra malimpahai hunin! ³ Tapujiam Allah dahan Bapa kita dari Tuhan Yesus kristus, nya sasuai agan anugrahNya nya maha bosar, jadi malahiran kita lagi dalam pengharapan nya hidup malaluai Kristus dari antara urang mati, ⁴ akai mawarisai harota pusaka ntah dapat banasa, ntah dapat rusak, dahan ntah dapat layu; nya tasimpan di surga akai hunin, ⁵ nyaam hunin nya dilinukai agan kuasa Allah malaluai iman kasalamatan nya siap dinyataan di ahir zaman. ⁶ Dalam iniam hunin sangat bersukscita biar pan akai samantara waktu ma, jika perlu, hunin harus mandrita agan bamacam pencobaan ⁷ nya lobih baroga daripada omas nya fana, sakalipan jadi diuji agan api, lalu tabukti murni dahan mahasilan pujian, kamuliaan, dahan kahormatan di waktu penyataan Yesus Kristus. ⁸ Hunin bolum kala maniat Inya, tapi hunin mangasihaiNya, dahan biarpan inini hunin ntah maniatNya tapi hunin percaya agan Inya. Hunin sonang dahan sukacita ntah dapat dikataan dahan diponuhai kamuliaan, ⁹ obai ahir dari tujuan iman hunin tongahan tacapai, inyaam kasalamatan jiwa hunin. ¹⁰ Mangonaai kasalamatan ini am, para nabi nya manubuatan anugrah nya pacaan nyadi umpu hunin inyan jadi manyalidikai dahan mampalajarainya agan sangat taliti. ¹¹ Sia mangoyap impo mangonaai sopa dahan samila waktu nya dimaksud Roh Kudus nya ada dalam diri sia waktu Inya manubuatan pandritaan Kristus dahan kamuliaan nya pacaan datang jadi inyan. ¹² Agan bala nabi inyan dinyataan bahawa sia bukainya malayatai diri sia siku, tapi malayatai hunin dalam bala jolu nya inini jadi disampaian ka hunin malaluai bala urang nya mangabaran Injil ka hunin agan Roh Kudus nya diutus dari surga; bala jolu inyan am nya maha honak disaksian para malaikat tai. ¹³ Karna inyan, siapan tam akal budi hunin nan dahan waspada tam, lotaan tam pengharapan hunin saponuhnya agan anugrah nya pacaan dikonyu ka hunin waktu Kristus Yesus dinyataan. ¹⁴ Sabagai bala biak nya taat, jangan manurutai agan hawa nafsu jahai hunin uba waktu hunin ija hidup dalam kabodohan hunin, ¹⁵ tapi kudus tam dalam sagala tingkah laku hunin, uba Allah nya mamangil hunin nan Kudus. ¹⁶ Sobab ada tatulis, "Kudus tam hunin obai Aku Kudus." ¹⁷ Dahan, amun hunin mamangilNya sabagai Bapa, inyaam Inya nya mahakipai satiap urang sasuai perbuatan sia agan ntah mambeda-bedaan, hidup tam agan asa gola salama hunin ija diap sabagai urang asing nan; ¹⁸ agan mangatahuai bahawa hunin jadi ditobus dari cara hidup nya sia-sia, nya hunin warisai dari upuy ninik hunin nan, bukai barang nya fana uba omas atau perak, ¹⁹ tapi agan darah Kristus nya mulia, darah Anak Domba nya ntah bacacat dahan sampurna ²⁰ Sobab, Kristus jadi dipilih sabolum dunia diciptaan, tapi Inya horu dinyataan di zaman ahir ini demi hunin. ²¹ Malaluai Inya, hunun nyadi percaya agan Allah nya mambangkitanNya dari antara urang mati dahan Allah mangonyu kamuliaan ka Inya, supaya iman dahan pengharapan hunin nan di dalam Allah. ²² Obai hunin jadi mamurnian jiwa hunin dalam kataan ka kabonaran sampai ada kasih basamadikan nya tulus, maka ayuam saling mangasihai nya bonar-bonar dari hati nya murni, ²³ sobab hunin jadi balik dilahiran, bukainya dari benih nya dapat mati, tapi dari benih nya ntah dapat mati, inyaam malaluai firman Allah nya hidup dahan badiap manotap. ²⁴ Kitap Suci bakata, "sagala nya hidup nan nyaam uba rumput nam, dahan sagala kamuliaannya nan uba bunga rumput nam; Rumput layu dahan bunganya gugur, ²⁵ tapi, firman Tuhan totap salama-lamanya." Dahan firman Tuhan inyanam Injil nya dibritaan ka hunin nan.