¹ Paulus, dipangil sabagai rasul Yesus Kristus obai kahona Allah, dahan Sostenes, samadikan kita. ² Agan jemaat Allah nya ada di Korintus, akai sia di kudusan dalam Kristus Yesus, nya di pangil akai nyadi bala urang kudus sasama agan samua urang di satiap tompat nya di mamangil nama Tuhan kita Yesus Kristus, baik di tompat siaan ataupan di tompat kita. ³ Anugrah akai kolai dahan damai sejahtra dari Allah Bapa kita dahan Tuhan Yesus Kristus. ⁴ Aku hala basyukur agan Allahku mangonaai kolai obai anugrah Allah nya dikonyu ka kolai dalam Yesus Kristus, ⁵ bahwa dalam sagala hal, kolai di perkaya dalam Inya, dalam samua perkataan, dahan samua pangatahuan, ⁶ sama uba kasaksian mangonaai Kristus jadi diteguhan dalam kolai. ⁷ Agan ubainyan, kolai tidak akan kakurakan dalam suatu karunia pan samantara kolai manatian panyataan Tuhan Kita, Yesus Kristus, ⁸ nya maneguhan kolai jam sampai akhirnya akai kolai ntah bacola di ari Tuhan kita Yesus Kristus. ⁹ Allah inyan setia, nya karnaNya kolai dipangil ka dalam persekutuan agan AnakNya,Kristus Yesus, Tuhan kita. ¹⁰ Inini, aku mansihatai kolai,Bala Samadikan, demi nama Tuhan kita Yesus Kristus akai kolai samua mangataan jolu nya sama akai ntah ada pocah bolah di antara kolai, tapi akai kolai diperlengkapai dala pikiran nya sama dahan dalam panapat nya sama jam. ¹¹ Sobab, jadi diboritahuan ka aku mangonaai kolai Bala samadikanku, kaluarga Kloe, bahwa ada patengkaran di antara kolai. ¹² Maksudku inini inyaam kolai masing-masing bapanir, "Aku dari Paulus," dahan, "Aku dari Kefas," dahan, "Aku dari Kristus." ¹³ Ada bi Kristus tabagi-bagi? Ada bi Paulus disaliban akai kolai? Atau, ada bi kolai dibaptis dalam nama Paulus? ¹⁴ Aku basyukur agan Allah obai aku tidak mambaptis siku pan dari kolai, kecuali Krispus dahan Gayus, ¹⁵ Akai jangan ada sikupan nya mangataan bahwa kolai dibaptis dalam namaku. ¹⁶ Akupan mambaptis saisi rumah Stefanus; salobihnya, aku ntah tahu ada ntah pan aku mmbaptis nya bukainya. ¹⁷ Sobab, ntah mautus aku akai mambaptis, tapi akai mambritaan Injil, bukai dalam hikmat kata-kata, akai salib Kritus akai salib Kristus ntah dijawat sia-sia. ¹⁸ Sobab, pamaniran mangonaai salib inyanan kabodohan bagi sia nya tongahan banasa, tapi bagi kita nya disalamatan ni, jolu inyan inyanam kakuatan Allah. ¹⁹ Sobab, ada tatulis, Aku pacaan mahancuran hikmat urang nya bijaksana, dahan kapintaran urang nya carodik panai, Aku pacaan manulanya." ²⁰ Di muna bi urang nya bijak? Di muna bi ahli Taurat? Di muna bi ahli kalar zaman ini? Bukannya Allah jadi manjawat bodoh hikmat dunia ini? ²¹ Obai dalam hikmat Allah, dunia malaluai hikmatnya ntah mangenal Allah, maka Allah mangahonaai malauai kabodohan pambritaan Injil akai manyalamatan nya mempercayaainya. ²² Sobab, bala urang Yahudi maminta tana-tana dahan bala urang Yunani mangoyap hikmat. ²³ Tapi, kami mambritaan Kristus nya di salib'an nya bagi bala urang Yahudi nyadi pahalang, dahan bagi bala urang bukan Yahudi, kabodohan. ²⁴ Tapi, akai sia nya di pangil, baik bala uarang Yahudi ataupan bala urang urang Yunani, Kristus inyanam kakuatan Allah dahan hikmat Allah. ²⁵ Obai nya bodoh dari Allah inyanan lobih bijaksana daripada mansia, dahan nya lomah dari Allah inyanan lobih kuat daripada mansia ²⁶ Tiat am kaadaan kolai waktu kolai dipangil, Bala samadikan, ntah banyak urang ny bijaksana manurut daging, nyah banyak nya bakuasa, ntah banyak nya terpandang, ²⁷ tapi Allah jadi mamilih nya bodoh dari dunia akai mampermaluan nya bijaksana, dahan Allah jadi mamilih apa nya lomah dari dunia akai mampermaluan nya kuat. ²⁸ Dahan, Allah mamilih nya ntah terpandang dari dunia dahan dipandang rendah, Bahkan bala jolu nya ntah baarti, akai maantahan bala jolu nya baarti, ²⁹ akai satiap mansia ntah dapat bamegah di hadapan Allah. ³⁰ Obai Inya nam, kolai ada dalam Yesus Kristus, nya akai kita jadian hikmat, kabonaran, kakudusan, dahan panebusan dari Allah, ³¹ Akai uba nya tatulis, "Biaram urang mamegahan diri, bamegah dalam Tuhan."