Pencobaan de padang Pasir ¹ Yesus te penuh ngau Roh Kudus, bekalih re Sungai Yordan, udek debaik Roh Kudus ke padang pasir. ² Diak Ya nugau empat puluh ari pelamak ngau decuba Iblis. Pelamak diak Ya ndai sik makai nama-nama, udah yak Ya lapar. ³ Udek Iblis banai ngau Ya: "Antik Mih Anak Allah, suruh batu tuk jadi ruti." ⁴ Saut Yesus ngau ya: "Bisik tetulis, mensia idup ndai re ruti na." ⁵ Udek ya ngemaik Yesus ke tempat te tingik, alam sekejap mata ya madah ke kerajaan denia ngau Ya. ⁶ Jekuh Iblis ngau Ya: "Semua kuasa ngau kemuliaan ku berik ngau Mih, empadai semua tuk dah deserah ke ngau aku, ngau kak ku berik ngau sapa te kedekak aku. ⁷ Jadi antik Mih nyemah Aku, semua yak empu Mih." ⁸ Tapi Yesus banai ngau ya: "Bisik tetulis: Kita kalah nyemah Tuhan, Allah, cuma ngau Ya na me kitak bebakti!" ⁹ Udek ya ngemaik Yesus ke Yerusalem ngau naruh Ya de bum'ung Bait Allah, udek banai ngau Ya: "Antik Mih Anak Allah, bak nyatuk ke dirik re tuk, ¹⁰ empadai bisik tetulis: Ngenak ke Mih, Ya bakal merintah ke malaikat-malaikat Ya untuk nyaga Mih, ¹¹ sidak bakal nyangak Mih katau jari sidak, isak kaki Mih ndai tesentuk ke batu." ¹² Yesus nyaut ya, jekuh Ya: "Bisik firman: Nang kitak encuba Tuhan, Allah kitak!" ¹³ Udah Iblis betemuk semua pencobaab yak, ya munur ngau nunguk senta te baik. ¹⁴ Alam kuasa Roh Yesus bekalih ke Galilea. Udek tesiar me kabar tentang Ya sekamat daerah yak. ¹⁵ Sementara yak Ya ngajar de rumah-rumah ibadat diak, ngau semua urang muji Ya. ¹⁶ Yesus ndai deterimak de Nazaret Ya datai ke Nazaret pengkerang Ya debesai ke, ngau menurut kejama Ya pada ari Sabat Ya tamak ke rumah ibadat, udek bediri kak maca Alkitab. ¹⁷ Ngau Ya deberik kitab nabi Yesaya, ngau udah debukak Ya, Ya nemu nas, dini bisik tetulis: ¹⁸ "Roh Tuhan bisik ntang Aku, yak nyuruh Ya ngurapi Aku, untuk nyampai ke kabar baik ngau urang-urang meskin; ngau Ya dah ngutus Aku ¹⁹ untuk madah ke pembebasan ngau urang-urang te detan, ngau pemedak bagi urang-urang butak, untuk ngemebas ke sidak te detin'as, untuk madah maadah ke taun rahmat Tuhan dah datai." ²⁰ Udek Ya nutup kitab yak, merik ke yak agik ngau petugas, udek duduk; ngau mata semua urang alam rumah ibadat yak tetuju ngau Ya. ²¹ Udek Ya mulai ngajar sidak jekuh Ya: "Pada ari tuk, genap me nas tuk rama kitak ninga yak." ²² Ngau semua urang diak ngemenar ke Ya, sidak iran ngau anai baik te detelah Ya, udek jekuh sidak: "Bukai me Ya tuk anak Yusuf?" ²³ Udek banai me Ya ngau sidak: "Tentu kitak kak madah pepatah tuk ngau Aku: "Tabit, semuh ke dirik dulau. Pulah ugak dituk, pengkerang asal Mih, nama te kami dinga de Kapernaum!" ²⁴ Jekuh Ya agik: "Aku madah kitak, ndai sik nabi deterimak de tempat asal ²⁵ Ngau Ku madah kitak, anai Ku tuk benar: Pada zaman Elia mayuh inuk janda de Israel rama langit tetutup selamak tiga taun enam bulan ngau rama bahaya rama lapar nimpak seluruh negeri. ²⁶ tapi Elia d'utus bukai ngau salah sikuk re sidak, melain ke ngau inuk janda de Sarfat, de tanah Sidon. ²⁷ Ngau rama zaman nabi Elisa mayuh urang kusta de Israel ngau ndai sik sikuk re sidak te detahir ke, bukai re Naaman, urang Siria yak." ²⁸ Ninga yak, semua urang te de rumah ibadat yak luat bebenar. ²⁹ sidak angkat, udek ngiring Yesus ke luar kota ngau ngemaik Ya ke tebing bukit, tempat kota yak teletak, untuk nyempalung Ya re tebing yak. ³⁰ Tapi Ya bejalai ngelalu re tengah-tengah sidak, udek angkat. ³¹ Udek Yesus angkat ke Kapernaum, kota de Galilea, udek ngajar diak rama ari-ari Sabat. ³² Sidak tebelenga ninga pengajar Ya, empadai anai Ya penuh kuasa. ³³ Alam rumah ibadat yak, bisik urang te kesarung sitan ngau ya menciak ngau ingan kayah: ³⁴ Ui Mih, Yesus urang Nazaret, nama urus Mih ngau kami? Mih datai kak ngemenasa ke kami? Aku ketau sapa Mih: Te Kudus re Allah." ³⁵ Tapi Yesus nyaut ya, jekuh Ya: "Sunyik, keluar riak!" udek sitan yak ngempas ke urang yak ke tetengah urang mayuh, udek keluar re ya ngau sama sekalik ndai sik medih ya. ³⁶ Ngau semua urang tebelenga, udek banai sama direk, jekuh sidak: "Matang anal benar anai tuk! Empadai ngau penuh wibawa ngau kuasa Ya merik perintah ngau roh-roh jahat ngau sidak sik keluar." ³⁷ Ngau tesebar berita tentang Ya kini-kini de daerah yak. ³⁸ Udek Ya nudi ke rumah ibadat yak, ngau angkau ke langkau Simon. Mentua inuk Simon kuat tabin ngau sidak nyuruh Yesus nulung ya. ³⁹ Udek Ya bediri minik mentua Simon te tabin, udek nusir penabin yak, ngau pemedih yak nudi ke ya. Inuk yak angkat sekelin ngau ngelayan sidak. ⁴⁰ Rama mata panas padam, semua urang ngemaik urang-urang pedih ngau Ya, te ngidam bemacam-macam pemedih. Ya ngeletak ke jari Ya katau sidak sikuk surang ngau nyemuh ke sidak. ⁴¹ Re mayuh urang, keluar ugak sitan-sitan samil menciak: "Mih yak Anak Allah." Udek Ya ndai nyagi sidak banai, empadai sidak ketau ke Ya yak Mesias. ⁴² Rama tengah ari, Yesus angkat ke tempat te sunyik. Tapi urang mayuh ngegak Ya, udek nemu Ya ngau berusaha ngetan Ya isak ndai nudi ke sidak. ⁴³ Tapi Ya banai ngau sidak: "Aku kalau madah ke Injil Kerajaan Allah, ugak de kota-kota bukai, empadai untuk yak mek Aku d'utus." ⁴⁴ Ngau Ya madah ke Injil alam rumah-rumah ibadat de Yudea.