Firman te dah jadi mensia ¹ Peruba benar yak Firman; Firman yak tamai Allah, ngau Firman yak mek Allah. ² Ya peruba tamai Allah. ³ Semua utai depulah Ya, antik ndai sik Ya ndai sik utai te jadi re semua te udah depulah. ⁴ Alam Ya bisik idup, ngau idup yak mek terang mensia. ⁵ Terang yak mancak alam keleman, ngau keleman ndai dapat nguasa ya. ⁶ Datai urang te dutus Allah , nama ya Yohanes; ⁷ ya datai sebagai saksi untuk merik kesaksian tentang terang yak, isak empadai ya semua urang jadi pecayak. ⁸ Ya bukai terang yak, tapi ya kalah merik kesaksian tentang terang yak. ⁹ Terang te bebenar terang, te nerang setiap urang, ketengah datai kalam denia. ¹⁰ Ya dah bisik alam denia, ngau denia depulah Ya, tapi denia andaia ngelala Ya. ¹¹ Ya datai ngau empu Ya, tapi urang-urang empu Ya ndai nerimak Ya. ¹² Tapi semua urang te nerimak Ya deberik Ya kuasa isak jadi anak-anak Allah, sidak te pecayak alam nama-Ya; ¹³ urang-urang te deperanak bukai re darah ngau dagin, bukai ugak ulih penekak bakas, tapi re Allah. ¹⁴ Firman yak dah jadi mensia, nugau detengah-tengah kita, kita dah medak kemuliaan-Ya, yak mek kemuliaan te deberik ke ngau Ya sebagai anak tungal Apai, penuh kasih ngau kebenar. ¹⁵ Yohanes merik kesaksian tentang Ya samil banai: "Tuk mek Ya te ku maksud rama ku banai: Page lusak datai Ya te dulau re aku, empadai Ya dah bisik seapan aku." ¹⁶ Re kepenuh Ya kita semua dah bulih kasih karunia demi kasih karunia; ¹⁷ empadai ukum Taurat deberik Musa, tapi kasih karunia ngau kebenar datai ulih Yesus kristus. ¹⁸ Ndai urang te suah medak Allah; tapi Anak Tungal Allah, te bisik depangkuk Apai, Ya mek te madah. ¹⁹ Tuk mek kesaksian Yohanes rama urang Yahudi re Yerusalem ngutus imam ngaua urang-urang Lewi ngau ya kak nanyak ke ya: "Sapa mih?" ²⁰ Ya ngakuk, ndai ngemulak, jekuh ya: "Aku bukai Mesias." ²¹ Udek sidak nanyak agik: "Antik piak sapa mih? Elia?" Ya nyaut: "Bukai!" Mih nama nabi ke kak datai?" Saut ya: "Bukai!" ²² Jekuh sidak ngau ya: "Sapa mih? Empadai kami kalah merik saut ngau sidak te ngutus kami. Jekuh mih, mih sapa?" ²³ Saut ya: "Aku mek urang te bingan de padang pasir: Gitik ke jalai Tuhan! upa te dah depadah nabi Yesaya." ²⁴ Dentara urang-urang te dutus diak bisik urang Farisi. ²⁵ Sidak nanyak ya: "Nama pulah mih bemanik (baptis) antih mih bukai Mesias, bukai Elia, bukai nabi te kak datai?" ²⁶ Saut Yohanes ngau sidak: "Aku bemanik kitak ngau aik, tapi detengah-tengah kitak bediri Ya te ndai kitak kelala, ²⁷ Ya te datai kedude, mukak tali sanal Ya na aku ndai pantas." ²⁸ Hal yak tejadi de Betania te deseberang sungai Yordan, dini Yohanes bemanik. ²⁹ Ari sutek, Yohanes medak Yesus datai ngau ya, yohanes banai: "Pedak Anak Domba Allah, te ngapus dusa denia. ³⁰ Ya tuk me te kumaksud rama ku madah: Udek re aku bakal datai urang, te udah ngenulau aku, empadai Ya dah bisisk se'apan aku. ³¹ Ngau aku subak perubah sik ndai mek ngelala Ya, tapi untuk yak mek aku datai ngau bemanik ngau aik, isak Ya depadah ke ngau urang Israel." ³² Yohanes merik kesaksian, jekuh ya: "Aku dah medak Roh turun re langit upa merpati, ngau Yak nugau datau Ya. ³³ Ngau aku pun ndai ngelala Ya, tapi YA te ngutus aku untuk bemanik ngau aik, dah befirman ngau aku: Antik mih medak Roh turun katau urang ngau nugau datau Ya, Ya yak mek te bakal bemanik ngau Roh Kudus. ³⁴ Ngau aku dah medak Ya ngau merik kesaksian: Ya tuk mek Anak Allah." ³⁵ Ari sutek, Yohanes bediri diyak tamai dua urang murid ya. ³⁶ Rama ya medak Yesus ngelalu, ya banai: "Pedak Anak domba Allah!" ³⁷ Kedua murid yak ninga nama te depadah ya, udek angkat namai Yesus. ³⁸ Udek Yesus malik ke belakang. Ya medak, sidak nurut Ya , udek Ya banai: "Nama te kitak gegak?" Saut sidak ngau Ya: "Rabi, dini Nuan nugau?" ³⁹ Ya banai ngau sidak: "Buh, ilak kitak medak." Sidak datai ngau medak pengkerang Ya, ari yak sidak nugau sama diak, kekira jam empat. ⁴⁰ Sikuk re sedua te ninga anai Yohanes yak Andreas menyadik Simon Petrus. ⁴¹ Andreas peruba betemu ngau Simon menyadik ya, udek banai: "Kami dah nemu ke Mesias (Rete e Kristus)." ⁴² Debaik ya ngau Yesus. Yesus medak ya samil banai: "Mih Simon, anak Yohanes, mih deberik nama Kefas (rete e Petrus)." ⁴³ Ari sutek Yesus mutus angkat ke Galilea. Ya betemu ngau Filipus, udek banai ngau ya: "Buh tamai Aku!" ⁴⁴ Filipus yak berasal re Betsaida, kuta Andreas sedua Petrus. ⁴⁵ Filipus betemu ngau Natanael, udek banai ngau ya: "Kami dah nemu Ya, te detelah Musa alam kitab Taurat ngau ulih bala nabi, Yesus, anak Yusuf re Nazaaret." ⁴⁶ Jekuh Natanael ngau ya: "Patut ndai utai te baik datai re Nazaret?" ⁴⁷ Jekuh Filipus ngau ya: "Buh pedak!" Yesus medak Natanael datai ngau Ya, udek banai tentang ya: "Pedak, tuk mek urang Israel sejati, ndai sik pelesu alam ya!" ⁴⁸ Jekuh Natanael ngau Ya: "Tipa Nuan ngelala aku?" Saut Yesus: "S'apan Filipus ngumai mih, Aku dah medak mih debabah pun ara." ⁴⁹ Jekuh Natanael ngau Ya: "Rabi, Nuan Anak Allah, Nuan Raja urang Israel!" ⁵⁰ Saut Yesus: "Empadai Ku madah mih: Aku medak mih debabah pun ara, maka mih pecayak? Nuan bakal medak hal-hal te lebih besai repada yak." ⁵¹ Udek jekuh Yesus ngau Ya: "Aku madah mih, mih bakal medak langit tebukak ngau malaikat-malaikat Allah turun naik ke Anak Mensia."