Kristus pengentara kita ¹ Anak-anakku, semua hal tuk kutulis ngau kitak, isak kitak nang mulah dusa, tapi antik bisik urang mulah dusa, kita bisik pengentara ngau Apai-Yesus Kristus, te adil. ² Ya yak pendamaian untuk semua dusa kita, bukai cuma dusa kita tapi dusa seluruh denia. ³ Tuk kecelik antik kita ngelala Allah; kita nunak semua perintah Ya. ⁴ Sapa te madah: Aku ngelala Ya, tapi ndai nunak semua perintah Ya, ya ngampur, ndai sik te benar alam ya. ⁵ Tapi sapa te nunak ke firman Ya, kasih Allah dah sempurna alam urang yak, piyak mek kita ketau, kita bisik alam Ya. ⁶ Sapa te madah ya bisik alam Ya, maka ya kalah idup upa Kristus suah idup. ⁷ Bala menyadik te kukasih, bukai perintah baru te padah ngau kitak, tapi perintah lamak te udah bisik entang kitak re subak. Perintah lamak yak mek firman te kitak dinga. ⁸ Tapi perintah te baru kutulis ke ugak ngau kitak, udah tenyata benar alam Ya ngau alam kitak; kegelapan dah ayap, terang dah mancak. ⁹ Sapa te banai kalau ya alam terang tapi ngemencik menyadik ya, ya agik nugau alam kegelapan sampai pituk. ¹⁰ Sapa te ngasih menyadik ya, ya nugau alam terang, alam ya ndai sik penyesaatan. ¹¹ Tapi sapa te ngemencik menyadik ya, ya idup alam kegelapan. Ya ndai ketau kini ya kalah angkat empadai kegelapan ngemutak mata ya. ¹² Aku nulis ngau kitak u anak-anak, empadai dusa kitak dah dampun ulih nama Ya. ¹³ Aku nulis ngau kitak bapak-bapak, empadai kitak dah ngelala Ya, te bisik re peruba. Aku nulis ngau kitak, urang-urang biak, empadai kitak dah ngalah ke te jaik. ¹⁴ Aku nulis ngau kitak, anak-anak, empadai kitak ngelala Apai. Aku nulis ngau kitak bapak-bapak, empadai kitak ngelala Ya te bisik mulai re subak. Aku nulis ngau kitak urang biak, empaadai kitak kuat ngau firman Allah bisik alam kitak, kitak dah ngalah ke te jaik. ¹⁵ Nang kitak ngasih denia ngau nama te bisik daalam yak. Antik urang ngasih denia, maka kasih ngau Apai ndai sik alam urang yak. ¹⁶ Empadai semua te bisik alam denia, upa keining mata, keining dagin, keangkuhan idup, bukai berasal re Apai, tapi re denia. ¹⁷ Denia tuk ketengah ayap ngau mayuh te kining, tapi urang te ngereja penekak Allah tetap idup selamak-lamaknya. ¹⁸ Anak-anakku, waktu tuk waktu pengabis, upa te udah kitak dinga, antiKristus bakal datai. Pituk dah mayuh bangkit antiKristus, yak mek kecelik waktu tuk waktu pengabis. ¹⁹ Mimang sidak berasal re'entara kita, tapi sidak yak bukai matang temasuk kita, empadai antik sidak urang re kita, sidak pasti tamai kita. Tapi hal tejadi isak nyata, bahwa ndai semua sidak temasuk re kita. ²⁰ Tapi kitak dah bulih pengurapan re Roh Kudus, ngau upa yak kitak ketau. ²¹ Aku nulis ngau kitak, bukai empadai kitak ndai ketau kebenaran, tapi justru empadai kitak ketau, ngau kitak ketau ugak bahwa ndai sik kampur kemulak (dusta) alam kebenaran. ²² Sapa pengampur yak? Bukai mek ya te nyangkal bahwa Yesuss yak Kristus? Ya yak me antiKristus, ya te nyangkal Apai ngau Anak. ²³ Barangsapa nyangkal Anak, ya ndai ngempu Apai. Barangsapa ngakuk Anak, ya ngempu Apai. ²⁴ Ngau kitak, nama te udah kitak dinga re subak, kalah bisik seruntik entang kitak. Antik nama te udah kitak dinga re peruba subak tetap bisik entang kitak, maka kitak bisik dalam Anak ngau Apai. ²⁵ Tuk mek jan'yi te udah dejan'yi ke Ya ngau kita; idup te kekal. ²⁶ Semua kutulis ngau kitak, tentang sidak te berusaha nyesat ke kitak. ²⁷ Empadai alam dirik kitak tetap bisik pengurapan te udah kitak terimak re Ya. Maka kitak ndai perlu dajar urang bukai. Tapi upa te dajar pengurapan Ya ngau kitak tentang semua hal, ngau pengajaran Ya benar, ndai bulak-upa Ya subak dah ngajar kitak, upa yak mek kitak kalah nugau alam Ya. Anak-anak Allah ²⁸ Maka pituk, anak-anakku, nugau am alam Kristus, isak antik Ya madah kedirik, kita bulih keberanian pecayak ngau ndai sah malu teradap Ya rama ari penatai Ya. ²⁹ Antik kitak ketau, Ya yak benar, kitak kalah ketau ugak, tiap urang te mulah kebenaran, lahir re Ya.