Kesaksian rasul tentang firman idup ¹ Nama te udah bisik mulai re subak, nama te kami dinga, nama te kami pedak ngau mata kami, nama te kami pedak, japai ngau jari kami tentang firman idup-yak mek te kami tulis ngau kitak. ² Idup yak dah depadah, dah kami pedak, pituk kami besaksi madah kitak tentang idup kekal, tamai Apai, te udah depadah ngau kami. ³ Nama te kami pedak ngau kami dinga, yak ugak mek te kami padah ngau kitak, isak kitak besekutu ngau kami, empadai pesekutuan kami yak ngau Apai, ngau Anak Ya, Yesus Kristus. ⁴ Semua tuk kami tulis ngau kitak, isak pengaga (sukacita) kami sempurna. ⁵ Tuk berita te kami dinga re Ya, kami padah ngau kitak: Allah yak terang, alam Ya ndai sik te kegelapan. ⁶ Antik kita madah kita besekutu ngau Ya tapi idup alam kegelapan, kita ngampur, kita ndai mulah te benar. ⁷ Tapi anatik kita idup alam terang upa Ya, kita bulih pesekutuan ngau urang bukai, ngau darah Yesus Anak Ya yak nyuci ke kita re semua dusa. ⁸ Antik kita banai madah kedirik ndai sik dusa, kita nipu dirik ngau kebenaran ndai sik alam kita. ⁹ Antik kita ngakuk dusa, maka Ya te adil ngampun dusa kita, nyuci ke kita re semua te jaik. ¹⁰ Antik kita banai madah kita ndai sik mulah dusa, maka kita mulah Ya nyadi pemulak ngau firman Ya ndai sik alam kita.