¹ Bala urang Farisi ngau bala ahli Taurat te datai ari Yerusalem beruguk ngegak Yesus. ² Sidak medak bala murid Yesus makai rempah ngau jari bau jaik kelupa bebasuk. ³ Bala urang Farisi ngau Yahudi ngai makai ngau jari nadai de basuk, sidak masuk jari sangak pun tapak, yak adat akik inik sidak te de ngau manak. ⁴ Asa bisik urang Yahudi pulai betemu ngau mensiak banyak, sidak nadai tau dulau se empai masuk jari. Banyak agik adat te agik de pegai sidak upa masuk keba cawan, buat (tempayan) ngau badah-badah te de pulah ari buat, ⁵ Udah, bala urang Farisi ngau ahli Taurat nanyak ngau Yesus, "Ngapa bala murid Nuan nadai nunak adat akik-inik, sidak makai rempat ngau jari bau jaik? ⁶ Yesus madah ke sidak, "Nabi Yesaya udah madah ngau pengamat, kitak tuk mensia te pemulak, te antik de tulis entang Kitab Suci, Baansa sidak tuk baik ngau Aku de mulut mapah, ati pemikir sidak jauh ari Aku." ⁷ Sidak ngakuk kedirik de mua Aku nadai bisik reti medak pengajar pemadah sidak de pulah mensia. ⁸ Adat bala mensia kitak ingat pemadah Tuhan Allah nadai kitak pegai. ⁹ Udah yak, Yesus betutur ngau sidak,"Berakal mati kitak tuk, pemadah Tuhan Allah nadai kitak ngau isak ke adat mensia de ingat. ¹⁰ Meliyak Nabi Musa udah madah intu bebaik apai-inai kitak, sapa te ngutuk apai-inai dirik a alah de bunuh. ¹¹ Udah bekiyak, jekuk kitak agik: Antik bisik mensia madah ngau apai-inai dirik a: Bala utai (remu reta) te bisik entang aku te tauk ngau ngidup sedua udah aku berik k e gereja, ngau persembahan - ¹² Medak bekiyak kitak nadai nyuruh agik ngintu apai inai dirik a. ¹³ Pemadah Tuhan Allah de padah ke kitak nadai de ngau sah ke agik utai te bukai te nadai baik a kitak padah ngau urang. ¹⁴ Ngasa piyak Yesus ngumai mensia banyak agik betutur ngau sidak, "kitak semua tuk dingar amat-amat ke pemadah Aku tuk. ¹⁵ Bala utai te re luar te tamak kalam tubuh mensia nadai ngutur ke kitak, utai te pansut ari mensia utai yak mek te tauk ngutur ke kitak. ¹⁶ [Sapa te bisik pening te tauk ninga, dinga ke amat-amat]. ¹⁷ Pas udah tamak ke bilik mintak ke dirik re mensia banyak, bala murid Yesus betanyak ngau Yesus nama reti te de tutur ke Yesus tadik. ¹⁸ Yesus nyaut sidak, "Jadi kitak nadai ngelala uugak nama te Aku padah tadik? Kitak nadai ketau mek keba utai te re luar te tamak kalam mensia nadai tauk ngutur ke kitai, ¹⁹ Bukai te tamak kalam ati tapi te kalam perut, udah yak de buai de plangan! Semua utai te tauk de makai, nadai ngapa jekuk Yesus ngau sidak. ²⁰ Udah bekiyak Yesus betutur, "Te keluar re mensia yak mek te tau ngutur ke mensia, ²¹ Re alam, re ati mensia, timul pemikir jaik, dosa kanyi, encuri, munuh. ²² Bekingin ke pangan, pengakak, jaik ati, ngakal, ngiri ke pangan, bejaik pangan, sumung, mensia budu. ²³ Bala utai te jaik datai re alam mensia, utai yak te ngutur ke idup. Iman Rinuk Siro Fenisia ²⁴ Angkat riyak, Yesus bejalai agik ke Tirus ngau Sidon. Ia tamak ke sutik lawang, Ia ngai bisik mensia sikuk pun te ketauk, amat piyak bisik na mensia te medak. ²⁵ Pas udah ninga bisik Yesus, rinuk te bisik anak inuk te de tamak roh jaik datai ngau mungkuk ke dirik alai kaki Yesus. ²⁶ Rinuk yak bansa Yunani, adai de Siro-Fenisia. Ia mintak tulung Yesus nyuruh antu jelu (roh te jaik) angkat ari anak ia. ²⁷ Udah yak Yesus madah rinuk yak, "Ayu ke nemiak yak kenyang dulau. Nadai baik ngamik rempah ari ia, udah piak de tikam ke ngau ukui. ²⁸ Rinuk yak nyaut Tuhan Yesus, "Amat Tuhan, amat piyak, ukui te de baruh meja makai ugak kredak-kredak rempah te de jatuk ke nemiak ek. ²⁹ Udah yak Yesus madah rinuk yak, "Ninga ke tutur dik te munyi yak, dik tau angkat. Antu jelu (roh te jaik) udah nudi ke anak dik." ³⁰ Udah yak, rinuk yak pulai ke lawang dirik a, medak anak a tengah galik de peninuk, antu jelu (roh te jaik) udah nadai isik ngalau ia agik. ³¹ Udah piyak, Yesus angkat agik ari Tirus mansak Sidon nuju ke Galilea, entang Dekapolis. ³² Bisik sidak ngemaik mensia te tulik nadai ngala betutur ngusung Yesus. Sidak mintak tulung amat ngau Yesus engkah ke jari datau mensia te tulik. ³³ piyak, Yesus ngemaik mensia te tulik misah ke mensia banyak. Yesus namak ke jari dirik Ia ke lubai pening mensia te tulik, udah yak Yesus ngelecui ke tanah, Yesus nyamah lidah mensia te tulik tadik. ³⁴ Udah yak, Yesus nengkadah ke langit, Ia bepenyuan panyai keping betutur, "Efata" reti e "Tebukaklah". ³⁵ Sekelin yak ugak pening mensia, te tulik tebukak, tali pengetang entang lidah ia telepas, ia lalu tau betutur rantas. ³⁶ Udah yak, Yesus nyayau ke sidak, madah ke kisah tadik ngau urang bukai, amat de sayau matang manting sidak bekisah ngau urang bukai. ³⁷ Sidak amat-amat tengangak ninga, keping madah, "Ia udah mulah keba utai baik ke mati. Mensia te tulik tauk ninga, mensia te bisuk tauk betutur empadai Ia.