¹ Yesus mulai ngajar agik de sisi danau, dah yak datai mensia banyak ngerumun Ia. Yak nyuruh Ia naik sutik perau te tengah bisik diak. ² Ia merik sidak pengajar banyak halngau banyak perumpamaan. Dalam pengajar Ia, Ia betutur, ³ Dinga keh! Bisik surang pengunsai te angkat ngunsai ke benih. ⁴ Pas Ia ngunsai benih, bisik benih te jatuk de sisi jalai, dah yak datai burung makai a. ⁵ Kedak bisik jatuh datau tanah te banyak batu. Benih yak nadai lamat tumuh empadai tanah yak nadai dalam. ⁶ Pas mata panas pansut, kemaya yak layus empadai nadai bisik akar. ⁷ Kedak bisik te jatuk tang kebala tanah te berumput, dah yak makin besai kebala rumput ngapit sampai mati, yak nyuruh ia nadai tau bebuah. ⁸ Bisik ugak te jatuk de tanah te baik, ngasil ke buah, tumuh dah yak betamah besai. ⁹ Dah yak, Yesus betutur, "Sapa te bisik pening ngau ninga, isak ke ia ninga". ¹⁰ Pas Yesus kedirik, mensia banyak te tamai Ia nanyak nama reti perumpamaan yak. ¹¹ Lalu, Ia madah sidak, "Hal kerajaan Allah udah de berik ngau kitak, antik mensia te bukkai angak de padah ngau kebala perumpamaan. ¹² Ngulih ke (supaya), "Meskipun sidak medak tapi nadai ketau ke nama-nama, ninga pun sidak nadai nyaruk. Ngulih ke sidak anang betubat ngau de ampun" (Yesaya 6:9-10) ¹³ Dah yak Yesus betutur ngau sidak, "Nadai nama kitak nyaruk perumpamaan tuk? Tipa kitak tau nyaruk perumpamaan tuk? ¹⁴ Pengunsai yak ngunsai ke Firman. ¹⁵ Sidak yak mensia te jatuk de sisi jalai, awak Firman yak de unsai. Pas sidak ninga, sigat antu jelu datai ngerampas Firman te udah de unsai. ¹⁶ Piak ugak te de unsai de tanah bebatu, yak mensia te ninga Firman dah yak ninga ngau pegaga. ¹⁷ Ulih yak am, sidak nadai be akar dalam, yak nyuruh ia betan angak sekejap na. ¹⁸ Te kedak e jatuk de tanah berumput. Sidak yak mensia te ninga Firman, ¹⁹ ulih gaduh ke tanah aik, penai kak te jaik (hawa nafsu) medak ke kaya, penai kak-penai kak te ke bukai te masuk tang Firman yak, ngapit ia yak nyuruh nadai bebuah. ²⁰ Dah yak te de unsai de tanah te baik yak sidak te ninga, nerimaak lalu ngasil ke buah, tiga puluh kalik lipat, nam puluh kalik lipat, seratus kalik lipat. ²¹ Udah yak Yesus betutur ngau sidak agik, "Bukaikah lampu pelita nadai de baik de letak kai de baruh kulak atau de baruh empangung? Bukaikah lampu pelita yak tunak e de engkah ke datau penuduk lampu pelita? ²² Nadai bisik te de lamun te nadai de pedak. Piak ugak nadai bisik te tau de lamun karna yak pasti tampau. ²³ Sapa te bisik pening, ugai ke ia ninga!. ²⁴ Udah yak Yesus betutur ngau sidak, "Pedak ke amat-amat te kitak dinga. Nama te kitak pengau yak de ngau ngau ngukur kitak ugak, agik bisik te de tamah ke kitak. ²⁵ Karna sapa te bisik, ia de berik, ulih sapa te nadai bisik nama te bisik entang ia damik ari ia. ²⁶ Udah yak Yesus betutur, "Kerajaan Allah upa mensia utai ngunsai benih de tanah. ²⁷ Pengunsai yak tinuk, was lawas malam, benih yak betunas udah yak tumuh besai. Pengunsai nadai ketau tipa tau upa yak. ²⁸ Tanah yak ngasih ke buah ngau kedirik e. Mula ia betunas udah yak berenas udah yak igik ganum entang renas yak ²⁹ pas igik-igik ganum yak besuh, mensia yak sigat-sigat ngetau a karna rama ngetau udah datai. ³⁰ Udah yak, Yesus betutur, "Ngau nama kitai tau nyemak ke kerajaan Allah? Atau ngau penyemak te ni tau nyemak ke yak? ³¹ Kerajaan Allah yak upa igik ensabi. ³² Tapi pas de unsai, igik yak tumuh lebih besai ari pentanam uma te lain, ngeluar ke dan-dan besai ngasuh ke burung-burung terebai tau mulah sarang diak. ³³ Ngau nguna ke banyak penyemak upa yak, Yesus madah kai Firman ngau sidak baka ngau te tau sidak dinga. ³⁴ Ia nadai nyelas kai semua yak kedirik-kedirik ngau murid-murid a. ³⁵ Ari yak ugak, pas udah melem mari Yesus betutur ngau murid-murid a, "Abuh kitai angkat ke sepiak danau. ³⁶ Udah yak mensia banyak yak ngemaik Yesus bereta sidak tamak ke perau te de tumpang Yesus. ³⁷ Udah yak datai angin ribut te besai, bisik ugak gelumang besai ngempas ke perau sidak sampai mayuh tamak aik. ³⁸ Pas yak Yesus bisik de kemudi perau, agik tinuk, sidak pun nguas ke Ia samil betutur, "Tuan Guru, ngapa Nuan nadai ibuh ke kitai kak mati? ³⁹ Udah yak Yesus wuas merak ribut, "Sunyik, baduk! Ribut pun baduk kemaya yak. ⁴⁰ Udah yak, Ia madah sidak, "Ngapa kitak tuk takut? Dini iman kitak yak?" ⁴¹ Sidak nadai bisik te berani ngau Ia, udah yak sidak bekisah, "Sapa mensia yak? Kebala ribut tau tunuk ke Ia.