Ju'k malekat di'k Matn Ju'k Bencana ¹ Ku'k ngolo tana lai'kng no'k honyiatn, di'k daeh ngan ajaib, ju'k malekat di'k matn ju'k bencana, bai'kkoh bencana di'k kumisi'kng, karna dalapm ju'k bencana hanlah murka Baipunopo'k ho'k mosi'k. ² Lalu, ku'k ngolo koyuh mah lawuat kaca bucampur'k opi ngan balo di''kho'k ngalahkan binata'kng han, patung'e, ngan angka odat'n, tokit no'k soni'k lawuat kaca han ngan migitn kecapi Baipunopo'k. ³ Balo bunyanyi nyanyian Musa,* pembantu'k Baipunopo'k, ngan nyanyian Na'k Domba: "Daeh ngan ajaib sumua pungodi-Mu'k, ya Tuhan, Baipunopo'k di'k Mahakuasa, Adel ngan bonar'k sumua johatn-Mu'k, ya Haja sugolah bangsa. ⁴ Osiahkoh di'k kai gola'k kanu-Mu'k, ya Punopo'k ngan kai memuliakan Odatn-Mu'k? Sobab, hanya Kapmlah di'k kudus. Sumua bangsa ho'k moni'k ngan nyumah no'k joi-Mu'k karna ku adel-Mu'k jeh ninyono'k.'' ⁵ Jehmosi'k sumua koyuh tia, ku'k ngolo Pumonai Baipumopo'k, kemah kesaksian Baipunopo'k // no'k surga, tubuka'k. ⁶ Ju'k malekat di'k matn ju'k bencana han kuluar so'k Pumonai Baipunopo'k, buaduah linen di'k mopu'k bukilau, ngan ngiya'k selempa'kng omas no'k isua'k balo. ⁷ Nyi'k so'k kupat makhluk nganu ku ju'k malekat han ju'k cawatn omas, punu'k nome'k baipunopo'k, di'k midiap sulama'k-lama'k han. ⁸ Pumonai Baipunopo'k nimunu'kng nya'k asap so'k kemulian Baipunopo'k ngan so'k kuasa-Diapm; ngan kadiah nyi'k kunanpun dopit tamo'k pumonai baipunopo'k sebelum ju'k bencana so'k ku ju'k malekat han mosi'k.