¹ Karna han, libo mik jeh kai tahatn agik, mik hok ponai todiap maih nok Atena, ² dan ngirim Timotius, posik mik dan nak buah Bai Punopok, dan kayau kihija mik wah Injil Kristus, kanu muk nyak nguatkan dan nasehat muk bukait ngan iman muk, ³ supaya kadiah nyo pun di'k nih goyahkan oleh punyohok-punyohok tia. Sobab mu'k tauk bahwa yah memang ninentukan nyak han. ⁴ Bahkan, libo mik busama muk, mik pagotn nyonok muk bahwa yah akan ngalami punyohok, dan han jeh jodi mah dik muk tauk. ⁵ Oleh karna han, libo muk kai tahatn agik, kuk ngutus nyak tauk iman muk. Kuk golak, lak nyo purayu jeh rayu muk dan punyohok mik kai sia-sia. ⁶ Namun, tia, Timotius jeh boliak kanu mik nok ahokng muk, dan jeh matn cihito baik tentakng imsn dan kaseh muk nyak mik, bahwa muk ngonok nonuh cihito dik bai'k akan mi'k dan hoyu nya'k budopit mi'k, mah mi'k hoyu gi'k i budopit ngan mu'k. ⁷ Karna han, balo posi'k, no'k wah punyoho'k tia, mi'k ningibur oleh mu'k so'k iman mu'k. ⁸ Tia, mi'k midiap la'k mu'k tokit nonuh wah iman. ⁹ Sobab, ngucap syukur oniah oniah di'k dopit mi'k nyilu'k kanu Bai Punopo'k karna mu'k, subagai nyili'k sumua sonang di'k mi'k kinapm no'k jowi Bai Punopo'k karna mu'k? ¹⁰ Hanu sampai ngohipm mi'k budoa ngan sunguh-sunguh nya'k mi'k dopit budopit agi'k ngan mu'k, dan dopit nyukup oniah di'k agi'k kuha no'k iman mu'k. ¹¹ Tia, adunglah Bai Punopo'k dan Pa'k todiap, dan Yesus, Punopo'k yah, di'k nuntun johatn mik kanu mu'k. ¹² Punopo'k akan ngado'k mu'k timu'k dan obia wah kaseh akan nyo kanu di'k laikng, dan akan sumua nyo, mah di'k mi'k hija kanu mu'k. ¹³ kira'a Diap neguhkan oti mu'k kai bucacat wah di'k bai'k no'k jowi Bai Punopo'k dan Pa'k yah libo punopo'k yah moni'k, Yesus, Busama balo nyo kudus-Diapm.