¹ Iko' muji' kabanaran ka sadat'n Kristus, iko' kati laceh, ge' sarat'n ate ko' nganang basaksi samahu-,ahu nige Roh Kudus, ² Kalo dukacitako' aru aihyo ge' tarus-manarus sedih wak sadat'n ate ko'. ³ Sabab, Iko' barharap tea' adupko tarkutuk, tarara' umpatn Kristus demi ayo ageko', kaum ko' nyabangse sacara jasmani ⁴ diu'ta ayo sok Israel; daumpu' hak ya' gatngantatn jadi anak-anak Jabata, kaatn kamuliaan, parjanjian-parjanjian, kaatn pamangkatn Hukum Taurat, sambayang, ge' sa janji-janji. ⁵ Ayoa'talah katurunan sama'-sama' laluhur, ge' umpatn antara ayoa'talah Kristus gatnbaranak manurut dagin, Ini' da anilah Tuhan atas sagala tarutn ge' da tarpuji salama-lamaa'. Amin! ⁶ Tapi aok'a Firman Jabata kati gagal. Barang, kati samaan sok da brasal Israel diu'ta sok Israel, ⁷ ge' kati samaan katurunan Abraham diu'ta anak-anak'a, tapi "da gat'n nyabut katurunanmu' diu'ta da brasal umpat'n Ishak." ⁸ Hal diah barati kalo inya anak-anak sacara dagin da taritong sabage anak-anak Jabata, malait'nkan anak-anak pajanjian sadi da taritong sabage katurunan. ⁹ Barang, diahlah parkataan jani dakoh: "Pas waktu diahlah Iko' aok utukng, ge Sara aok umpu sook anak are-are." ¹⁰ Inya hanya diah sadi, tapi jangkah Ribka uga batahi anak-anak umpat'n sok nyungan, diu'ta Ishak, ninek moyang ite. ¹¹ Barang, sabalum anak-anak dakohj gat'n ngalahir ge' ti'nga bulah tarut'n da bait ato da jahe, supaya tujuan Jabata manganai pilihan-a gat'n neguh inya karna parbuatan tapi karna Ini' da maba, ¹² gat'n nyansana ka Ribka, "Anak da sulung aok malayani sade'a. " ¹³ Ulah ani gat'n nulis, "Iko' nganyayang Yakub, tapi Iko' bencio Esau." ¹⁴ Jadi, jai da hendak ite muji'? Jai ta Jabata kati adil? Sakali-kali kati! ¹⁵ Barang Ini' muji' ka Musa, "Iko' pamase ka asipun Iko' ngate pamase, ge' Iko' aok bamurah ate ka asi pun Iko' ngate bamurah ate." ¹⁶ Jadi, hal dakoh bagantukng ka kahendak ato karaje karas talino, tapi pas Jabata da nyua kamurahan ate-A. ¹⁷ Barang, Kitab Suci muji' ka Firaun: "Karna ya' alasan diahlah Iko' ngantat'nmu' supaya Iko' nujo kuasa-Ko' wak sadat'nmu', ge' supaya gaat'n-Ko' gat'n nyarita wak saluruh bumi." ¹⁸ Jadi, Jabata pamase ka asi pun da gat'n kahendaki-A. ¹⁹ Jadi, imu' aok muji' ka iko': "Jai Ini' masih mansara? barang, asi da kaat'n manantang kahendak-A?" ²⁰ Sabalik'a, asi ta imu', hei talino, sahingga imu' mambantah ka Jabata? Diu'ta tarut'n da gat'n ngabentuk muji', "Jai akup'm mambantuk iko' ulah diah?" ²¹ Jai ta tukang tambikar kati berhak ka samo tana'liat; ya' bulah umpat'n gumpalan tana' da samu suatu bajana da gat'n mangune ya' hal; da mulia, ge' bajana lait'n da gat'n mangune ya' hal da hina? ²² Langkina sa' Jabata, meskipun ni' bakehendak ya' nyua murka-A ge' nyata kuasa-A, laka nanggong kesabaran da aihyo tradap bejana-bejana kemurkaan-A da laka gat'n'a nyiap ya kebinasaan? ²³ Ini' bulah'a ya' nyata kekayaan kemuliaan-A, da laka gat'n'a nyiap-A ya' kemuliaan, ²⁴ diu'ta ite, da gat'n maba-A, inya hanya umpat'n antara sok Yahudi, tapi uga umpat'n antara bangsa-bangsa lait'n. ²⁵ Ulah da uga gat'n firman-A ka sadat'n kitab Hosea: "Ayo'a da inya umat-Ko', aok Ko' nyabut umat-Ko'. ge' da kati ko' nganyayang, aok Ko' nyabut 'da kekasih'." ²⁶ Ge', "gat'n mana' Jabata muji' wak masa lalu: 'imu' inya umat-Ko',' wak mana' ka dakoh ayo'a aok gat'n nyabut 'anak-anak Jabata da idup.'" ²⁷ Ge' Yesaya nganyayang Israel: "Walopun jumlah anak Israel ulah pasir wak laut, tapi hanya sisa-sisa ayo'a sadi da aok gat'n nyalamat, ²⁸ Barang Tuhan aok bulah firman-A wak samo bumi, sampurna ge' sagera." ²⁹ Samu ulah da gat'n nubuat uleh Yesaya: " Sa' Tuhan Samesta Alam kati ngagat'n ka ite katurunan, ite laka jadi samu ulah Sodom ge' Gomora." ³⁰ Jadi, jai da aokn ite muji'? Kalo bangsa-bangsa inya Yahudi da kati nganang kabanaran, laka kaat'n kabanaran, diu'ta kabanaran da brasal umpat'n iman; ³¹ Tapi aok'a, bangsa Israel da barusaha taat kabanaran Hukum Taurat justru kati sampe ka hukum dakoh? ³² Jai" Barang ayo'a kati nalama'a nige iman, tapi nige parbuatan. Ayo'a tasingkak ka batu sandungan. ³³ Ulah ani gat'n nulis: "Ilelah, Iko' mana' wak sion nyabuah batu sandungan ge' nyabuah batu karang, Ge' asi pacaya ka-Ini' kati aok gat'n manyangun."