¹ Age-age, kainginan ateko' ge' doako' wa' Jabata ya' ayoa' anilah supaya ayoa gatnnyalamat. ² Sabab, iko' bisa basaksi tentang ayoa' bahwa ayoa' ani gairah ya' Jabata, tatapi kati' badasar wa pangatuan da taman. ³ Sabab, ayoa' kati' panane kebenaran Jabata ge' barusaha mantagutn kebenaran adup ayoa' sadi', ayoa' kati' tunuk wa' kebenaran Jabata. ⁴ Sabab, Kristus anilah kaganapan Hukum Taurat da ngajadi kabenaran bagi setiap sok da pacaya. ⁵ Musa manulis tentang kabenaran da baasal umpatn Hukum ao' idup gatna. ⁶ Ao' tatapi, kabenaran da baasal umpatn iman muji ladiah, "Iya' nyansana sadatn atemu', 'Asilah da ao' makka ka surga?' Ratia, ya' minsakng Kristus sosor. ⁷ Ato 'Asilah da ao' sosor ka jurang maut?' Ratia, ya' minsakng Kristus makka umpatn antara sok kabis. ⁸ Ao' ta, jai da gatna'muji'? "Firman madi' jiket kimu', kohta ka sadatn baba'mu' ge' ka sadatn atemu'." Dakohlah saratn iman da kai' nyampe. ⁹ Sa' nige' babamu' imu' ngako' bahwa Yesus anilah Tuhan, ge' pacaya sadatn atemu bahwa Jabata ngangkidup Ini' umpatn antar sok kabis, imu' ao' gatnnyalamat. ¹⁰ Karna nige' ate, sok pacaya singge ani kaatn kabenaran; nige' baba', sok mangako' singge ani' kaatn kasalamatan. ¹¹ Karna Kitab Suci muji', "Asi pun da pacaya wa'-Ini' ti' ao' suah gatnmanyangun." ¹² Sabab, kati' ani perbedaan antara ayo sok Yahudi ge' ayo sok Yunani; Tuhan da nyungan anilah Tuhan ya' smaan, da balimpah kakayaan bagi smaan sok da ngampak wa'-Ini'. ¹³ Sabab, "Smaan sok da ngampak sadatn gaatn Tuhan ao' gatnnyalamat." ¹⁴ Ao' tatapi, langkina ayoa' ao' ngampak wa' Ini' da tinga ayoa' pacayai? Ge', langkina ayoa' kaatn pacaya wa' Ini' da tinga suah ayoa' dangah? Ge', langkina ayoa' kaatn dangah, sa' kati' ani da ngabar-A? ¹⁵ Ge', langkina ayoa' kaatn ngabar-A, sa' ayoa' kati' gatnngutus? Ulah ani tatulis: "Batapa indah a' kaja'-kaja' ayoa' da utukng misakng kabar da bait!" ¹⁶ Namun, kati' smaan sok ituh taat ka Agah Bait dakoh sabab Nabi Yesaya muji', "Tuhan, asilah da nga pacaya tarhadap barita da nga gatna dangah umpatn kai?" ¹⁷ Jadi, iman timbul umpatn pandangahan, ge' pandangahan kat Firman Kristus. ¹⁸ Tatapi iko' mansikatn, "Ania ayo sok dakohkati dangaha'?" Tantu ayoa ani dangah sabab, "Saratn ayoa' nyampe ka smaan-maan dunia, ge' saratn ayoa' sampe ka ujung-ujung bumi," ¹⁹ Namun, iko' muji, "Ania bangsa Israel kati' mamahamia'?" Partama Musa muji, Iko' ao' ngangkidup camburumu' tarhadap ayoa' da inya nyabuah bangsa, ge' mambangkit pabajimu' tarhadap bangsa da baga." ²⁰ Ge' nige' barani, Yesaya nyansana: "Iko' gatnamput oleh ayoa'da kati' najo Iko'; Iko' nyua' adup ka ayoa da kati' mansikatnko', ²¹ Ao' tatapi, tentang bangsa Israel Ini' muji', "Sapanjang ari Iko' laka ngulur barekng-Ko' wa' bangsa da kati' taat ge' malawan."