¹ Anita imu' kati' panea, he age-ageko' (sabab iko' nyansana wa' ayoa' da ngapane Hukum Taurat), bahwa Hukum Taurat bakuasa wa' sook salama sok dakoh idup? ² Karna dakohta, nyungan mahu da bainyha' tatingo' kat hukum wa' banun a' salama ini' idup; tatapi sak banun a' kabis, ini' ao' gatnngarapas umpatn hukum inyha'a' dakoh. ³ Jadi, sak mahu dakoh jadi sautn are laitn padahal banun a' maseh idup, ini' ao' gatnmuji' penzina, tatapi sak banun a' kabis, ini' bebas umpat hukum singge ini' kati' gatnmuji' penzina sak bainyha' nige' are laitn. ⁴ Karna dakoh, age-ageko', imu' uga nga kabis bagi Hukum Taurat nabo' ungan Kristus supaya imu' jadi umpu' da laitn, dakohta Ini' da nga gatnngangkidup umpatn pangkabis singge ite' kaatn ngasel buah bagi Jabata. ⁵ Sabab, jangkah ite' maseh idup sadatn kadaginan, hawa nafsu duse da gatnransang kat Hukum Taurat bakaraje sadatn anggota-anggota ungan ite' ya' ngasel buah bagi maut. ⁶ Tapi, mati' ite' nga gatnngabebas umpatn Hukum Taurat, nga kabis tarhadap jai da idu' ninggo' ite' singge ite' mati' malayan sadatn kaadaan bahu nurut Roh, inya nurut hukum dama da tatulis. Duse ge' Hukum Taurat ⁷ Sak ladakoh, jailah da ao' te' muji'? Anita Hukum Taurat dakoh duse? Nyakali-kali kati'! Sabalik a', iko' kati' ao' ngarati rati umpatn ngate umpu' da sok lain umpu' sak Hukum Taurat kati' muji' a', "Iya' ngate umpu'." ⁸ Tapi, duse naap kasampatan nabo' parintah dakoh ya' ngasel bamacam da gatnngate sadatn adupko'; sabab tampa Hukum Taurat duse ao' kabis. ⁹ Idu' iko' idup tsmps Hukum Taurat, tatapi jangkah hukum dakoh utukng, duse jadi idup ge' iko' kabis; ¹⁰ ge' parintah diah, da saharus a' minsakng wa' idup, malah mimpinko' wa' maut. ¹¹ Sabab, duse naap kasampatan nabo' hukum dakoh ya' nipu ge' ngamisko'. ¹² Jadi Hukum Taurat dakoh anilah kudus, ge' hukum dakoh kudus, taman ge' bait, ¹³ Sak ladakoh, anita da bait dakoh mangkutukng pangkabis bagiko'? Kati' ta! Duselah da ngasel maut ka sadatnko' nabo' jai da bait supaya nyata bahwa duse anilah duse, ge' nabo' hukum dakoh duse semangkin tile' da batol duse. Da Balawan ka Sadatn Adup Ite' ¹⁴ Sabab ite' pane bahwa Hukum Taurat sifat a' rohani, tatapi iko' sifat a' jasmani, gatnnyual ka saroh duse. ¹⁵ Sabab, iko' kati' ngarati jai da ko'umas karna iko' kati' bulah hal da ko' ngate, malah iko' bulah hal da ko'rusi'. ¹⁶ Tapi ba, sak iko' bulah hal da kati' ngate ko'bulah, iko' ngasetuju bahwa Hukum Taurat dakoh bait. ¹⁷ Jadi mati', inya agi' iko' da bulah a', tatapi duse da idup ka sadatnko'. ¹⁸ Sabab, iko' pane bahwa kati' ani hal bait da idup ka sadatnko', dakohta ka sadatn daginko', karna kehendak dakoh ani ka sadatn adupko', tatapi ya' bulah da bait dakoh kati'. ¹⁹ Sabab, iko' kati' bulah parbuatan bait da ko'kahendaki, tatapi iko' bulah hal da jahe', da kati' ko'kehendaki! ²⁰ Jadi, sak iko' bulah hal da kati' ko'kehendaki, dakoh inya sgi' iko' da bulah a', tatapi duse da idup ka sadatn iko'. ²¹ Jadi, iko' amput hukum diah, dakohta: Jangkah iko' ngate bulah hal da bait, kajahatan uga' ani samahuko'. ²² Sabab, iko' suka wa' hukum Jabata ka sadatn batinko', ²³ tatapi iko' mile' hukum laitn sadatn anggota-anggota unganko' da bajuang malawan hukum akal budiko' ge' mennjarako' ka sadatn duse da ani sadatn anggota-anggota unganko. ²⁴ Iko' talino celaka! Asilah da ao' nyalamat iko' umpatn ungan maut diah? ²⁵ Syukur wa' Jabata nabo' Tuhan ite, Kristus Yesus! ²⁶ Jadi, nige' akal budiko', iko' malayan Jabata, tatapi nige' ungan jasmaniko' iko' malayan hukum duse.