¹ Iko' nyarah ka imu' Febe, adi' ite da diu'ta sook palayan jamaat wak Kengkrea. ² tarimalah ini' wak sadat'n Tuhan salayak'a ayo-sok kudus, ge' nuloknglah ini' ka sadat'n sagala tarut'n da gat'n'a palalu umpat'nmu' barang ini' sadi laka mangkat'n bantuan ka sok da karah ge' uga ka adupko'. ³ Nyampe ta lah salamko' ka Priskila ge' Akwila, kawan-kawan sapalayananko' ka sadat'n Kristus Yesus, ⁴ da laka mangkat'n nyawa ayo'a demi idupko'. Ka samo ayo'a, inya hanya iko' sadi da ngucap syukur tapi uga samaan jamaat inya Yahudi. ⁵ Nyampe ta uga salamko' ka jamaat wak ramin ayo'a. Nyampe ta uga salam ka Epenetus da ko'nganyayang, ini' diu'ta sok partama wak Asia da narima Kristus. ⁶ Salam ka Maria da laka karaje karas yak imu'. ⁷ Salam ka Andronikus ge' Yunias, ayo-age sabangsako' sakaligus samu tahanan da uga gat'n nganal wak antara ayo rasul, da uga laka madi wak sadat'n kristus sabalum iko'. ⁸ Salam ka Ampliatus, da ko' nganyayang ka sadat'n Tuhan. ⁹ Salam ka Urbanus, kawan sapalayanan ite wak sadat'n Kristus, ge' ka Stakhis da ko'nganyayang. ¹⁰ Salam ka Apeles, da tabukti laka tahan uji ka sadat'n Kristus. Nyampe ta uga salamko' ka ayo angota kaluarga Aristobulus. ¹¹ Nyampe ta salamko' ka Herodion, age sabangsako'. Salam ka ayo angota kaluarga Narkisus, da ani ka sadat'n Tuhan. ¹² Nyampe ta salamko' ka Trifena ge' Trifosa, da bajarih lalah wak sadat'n Tuhan. Ge', ka Persis da ko'nganyayang, da uga laka karaje karas wak sadat'n Tuhan. ¹³ Salam uga ka Rufus, sok pilihan wak sadat'n Tuhan, ge' uga ka sino'a da jadi sino' bagiko' pula. ¹⁴ Salam ka Asin kristus, Flegon, Hermes, Patrobas, Hermas ge' ayo-age da samahu nige ayo'a. ¹⁵ Salam ka Filologus ge' Yulia, Nereus ge' adi'a gae ka Olimpas, ge' samaan sok kudus da samahu nige ayo'a. ¹⁶ Mangkat'n ta lah salam nyungan samu lait'n nige nyium kudus. Samaan jamaat Kristus nyampe ta salam ayo'a ka imu'. ¹⁷ Mati' iko' nyurong imu', ayo-age, ngawaslah ayo'a da nimbul parpecahan ge' panyasat, gae da batantangan nige pangajaran da laka imu' narima; ngajauhlah ayo'a. ¹⁸ Barang, ayo-sok ulah dakoh kati malayani Tuhan ite Yesus Kristus, tapi malayani hasrat ayo'a sadi; ge' nige sarat'n da halus gae sarat'n-sarat'n sanjungan, ayo'a nipu ate ayo-sok da kati mana' curiga. ¹⁹ Sa', kataatanmu' laka gat'n panane samaan sok, sa' dakoh iko' basukacita barang imu'. Tapi aok'a, iko' ngate supaya jai da bait ge' barasih umpat'n hal da jahe. ²⁰ Jabata sumber dame sejahtera aok lajak mangkulas Balis wak saroh kajamu'. Anugerah Yesus, Tuhan ite, manyartaimu'. ²¹ Timotius, kawanko' sapalayananko', nyampe ta salam yak'mu', ge' uga umpat'n Lukius, Yason, ge' Sosipater, ayo-age sabangsako'. ²² Iko' Tertius, da nulis surat diah, nyampe ta salamko' ka imu' ka sadat'n Tuhan. ²³ Gayus, da mangkat'n tumpangan ka iko' ge' ka samaan jamaat, nyampe ta salam ka imu'. Erastus, bendahara kota, ge' Kwartus age ite, nyampe ta salam ka imu'. ²⁴ (Anugerah Yesus Kristus, Tuhan ite, manyartai imu' samaan! Amin.) ²⁵ Bagi Ini' da sanggup managuh imu' sasuai Injil da ko'minsakng ge' pamberitaanko' tentang Yesus Kristus, ge' da sasuai nige panyingkapan rahasia da laka gat'n nyukat'n salama ba abad-abad, ²⁶ tapi da mati' laka gat'n nganyata nabo kitab-kitab ayo nabi, sasuai nige parintah Jabata da kekal da laka gat'n mangkat'n pane ka sagala bangsa yak mimpin nuju kataatan iman, ²⁷ ka nyiteng-nyiteng'a Jabata da pahnu hikmat nabo Kristus Yesus; Kamuliaan sampe salama-lama'a! Amin.