¹ Paulus, hamba Yesus Kristus, da gatn ngadu ya' jadi rasul ge' da gatn khusus ya' Injil Jabata ² Da idu' Jabata ngajanji nabo' nabi-nabi a' ka sadatn Kitab Suci'. ³ tentang Anak-A' da menurut dagin gatnbaranak umpatn katurunan Daud. Saman raja Israel gatnmaba' "anak Daud". Raja uga' pun bisa gatn muji' anak Jabata ⁴ ge' da na'nyata sabage Anak Jabata da barkuasa nabo' kabangkitan-A umpatn ayoa' da nga kabis manurut Roh Kakudusan, kohlah Kristus Yesus, Tuhan te'. ⁵ Nabo' Ini', kai kaatn anugerah ge' jabatan ge' jabatan karasulan ya' minsakng kataatan iman wa' antara smaan bangsa da inya Yahudi demi gaat-A, ⁶ tarmasuk imu' da uga' gatn maba' ya' jadi milik Kristus Yesus. ⁷ Wa' ayo kupm smaan da ani ka Roma, da gatn Jabata nyayang, ge' da gatn maba' ya' jadi sok-sok kudus; Anugerah ge' damai sejahtera bagi ayo kupm umpatn Jabata, Sama' te', ge' umpatn Tuhan Yesus Kristus! Paulus ngatte nganto wa' Jemaat ka Roma ⁸ Partama-tama, iko' basukur wa' Jabata nabo' Kristus Yesus sabab kupm smaan karna imanmu' nga gatnnganyata ka smaan man dunia. ⁹ Sabab, da ko' layan nige' rohkitn sadatn Injil Anak-A, ngajadi saksiko' bahwa iko' ti' baranti-anti ngingat imu' smaan; ¹⁰ ka sadatn doako', iko' salalu bamuhon supaya sekiraa' mati', oleh kehendak Jabata, akhira' iko' berhasil nganto kimu'. ¹¹ Iko' batol-batol ngate badaput nige'imu' supaya iko' bisa mangkatn suatu karunia rohani ya' nguat ayo kupm, ¹² kohta supaya ite' kaatn gatn nguat samahu-mahu oleh iman masing-masing, bait imanmu' atopun imanko'. ¹³ Age-age, iko' ngate imu' pane bahwa iko' nga bakali-kali barencana ya' bakunjungkimu', tatapi masih tarhalang sampe mati', supaya iko' uga' naap hasil panen umpatn antara imu' samu nige' umpatn antara bangsa-bangsa da inya Yahudi laitna'. ¹⁴ Iko' barutang wa' sok Yunani ge' wa' sok barbar, wa' sok da bahikmat atopun wa' sok da baga. ¹⁵ Karna dakohta, iko' batol ngatte ngabar Injil wa' kupm da ani ka Roma. ¹⁶ Iko' kati' mangun nige' Injil, sabab Injil anilah kuasa Jabata ya' kasalamatan satiap sok da pacaya; uru'-uru' ya' da sok Yahudi, lakadakoh ya' sok Yunani uga'. ¹⁷ Sabab ka sadatna', kabenaran Jabata gatnngayata umpatn iman ka iman, ulah ani tertulis: "Sok benar ao' idup oleh iman." Pabaji' Jabata tarhadap Pabulah Dosa Talino ¹⁸ Sabab, murka Jabata gatnnganyata umpatn surga tarhadap smaan kefasikan ge' kajahatan talino da nakan kebenaran nige' kajahatan ayoa'. ¹⁹ Karna dakoh, jai da kaatn panane tentang Jabata nga jelas bagi ayoa' karna Jabata nga nyua' a wa' ayoa'. ²⁰ Memang, sejak dunia gatnnyipta, sifat-sifat Jabata da kati' kaatn mile', kohta kuasa-A da kekal ge' sifat-sifat keilahian-A, nga jelas gatnmile' ya' gatnngarati nabo' hal-hal da gatn Na'nyipta singge ayoa' kati' bisa ngayuma'. ²¹ Ao'a, saandaipun ayoa' kanal Jabata, ayoa' kati' manghormati-A sebage Jabata ato basukur wa' Ini'; sabalik a', pikiran ayoa' jadi kati' bagune ge' ate ayoa' da baga jadi patakng. ²² Ayoa' nganggap adup a' bijaksana, tatapi ngajadi baga, ²³ ge' nukar kamuliaan Jabata da ti' bernoda nige' gambaran-gambaran talino da fana, manuk-manuk, binatang bakaja' apat, ato binatang-binatang melata. ²⁴ Karna dakoh, Jabata nyarah ayoa' wa' jai da ate ayoa' ngatte da ngingin kacamaran singge ayoa' saling ngutor ungan ayoa' ka antara adup ayoa'. ²⁵ Sabab, ayoa' nukar kabenaran Jabata nige' da laceh, ge' sujud sambah wa' makhluk da gatnnyipta, inya Sang Pencipta da tapuji salama-lamaa'. Amin! ²⁶ Karna dakoh, Jabata nyarah ayoa' wa' nafsu-nafsu da hina, sabab mahu-mahu ayoa' nganukar hubungan da wajar nige' da kati wajar. ²⁷ Ladakoh uga' are-are, ayoa' ngagatn hubungan da wajar nige' mahu, tatapi barapi-api sadatn nafsu tarhadap da nyungan ka da lait a'; are nige' are umas parbuatan-parbuatan da manyangun; ge' ka sadatn ungan masing-masing, ayoa' narima hukuman atas duse-duse ayoa'. ²⁸ Ge', barang ayo'a kati ituh mangakui Jabata ka sadat'n pangetahuan ayo'a, maka Jabata manyarahkan ayo'a ka pikiran-pikiran da bobrok sahingga ayo'a bulah hal-hal da saharus'a kati ayo'a bulah. ²⁹ Ayoa' gatnmampanhu nige' sagala macam da kati' taman, kajahatan, kasarakahan, ge' kabencian; panhu nige' iri ate, pangamis, partangkaran, tipu muslihat, ge' kadangkian; ayoa' anilah panggosip, ³⁰ pemfitna, pembenci Jabata, kasar, sumbong, ahyo baba, pane sadatn kajahatan, kati' taat wa' pangama, ³¹ baga, kati' setia, kati' baperasaan, ge' kejam. ³² Ge', sakalipun ayoa' panane paraturan Jabata da muji' bahwa sok da umas hal-hal samacam dakoh pantas kabis, ayoa' inya hanya tatap umas a', tatapi uga' ngadukung ayo sok da umas hal-hal dakoh.