¹ Ge', jangkah ano Sabat ngalaka, Maria Magdalena, Maria ama' Yakobus, ge' Salome, ngalaka mari rampah-rampah singge ayoa kaatn anu ya' mangkabinyak Yesus. ² Baru muka asat, wa' ano pamule minggu dakoh, jangkah matuano muncol, ayoa' anu wa' sibur. ³ Ayoa' nyansana nyungan ge' da laitn, "Asilah da nginsit batu' umpatn pintu maruh sibur dakoh?" ⁴ Namun, ngalaka nyantunung ka samo, ayoa' mile' batu da diu' ahyo dakoh ngalaka gatnnginsit. ⁵ Ge', ngalaka maruh ka sadatn sibur, ayoa' mile' nyungan bujakng da ngiak saput ranakng agi unyung ka suhutn sentao', ge' ayoa' takajut. ⁶ Lalu, ini' nyansana wa' ayoa', "Iya' takajut, imu' najo Yesus sok Nazaret da nga gatnnyalib. Ini' nga bangkit. Ini' kati' ani kadiah. Mile' tampat ayoa' magurik-A. ⁷ Tapi, anumih, muji' wa' ayo murid-A ge' wa' Petrus bahwa Ini' agi' nyantulu' imu' ka Galilea. Ka teetn, imu' ao' badaput ge' Ini', ulah da nga Ini' muji' wa imu'." ⁸ Lakadakoh, ayoa' mungkas ge' talama' adup a' umpatn sibur dakoh karna ayoa' bakutur ge' heran, ge' ayoa' kati' muji' jai-jai wa' asi pun karna ayoa' batol buut. [Ge', jai pun tarutn da nga gatnngadu ya' ayoa' nyampe wa' Petrus ge' kawan-kawan a', ayoa' nyampe nige' singkat. Ngalaka dakoh, Yesus sadi'ta da ngutus ayoa' umpatn Timur sampe ka Barat, ya' nyampe agah da kudus ge' da kati' kaatn binasa manganai keselamatan kekal. Amin] Yesus Nyua' Adup-A wa' Murid-Murid-A ⁹ Jangkah Yesus bangkit asat-asat wa' ano pamule minggu dakoh, Ini' partama-tama muncol wa' Maria Magdalena da umpatn ini' Yesus suah nguser ijo' roh jahat. ¹⁰ Lalu, ini' anu ge' mangkatnpane wa' ayoa' da nga samahu nige' Yesus, samantara ayoa' agi' sedih ge' munse'. ¹¹ Ge, jangkah ayoa' dangah bahwa Yesus idup ge' nga gatna' mile', yoa' kati' pacaya. ¹² Ngalaka kajadian dakoh, Yesus uga' utukng sadatn bantuk da laitn wa' dua ungan umpatn ayoa' da agi' bajalatn nuju ka desa. ¹³ Lalu, ayoa' malik ge' muji' wa' da laitna', tatapi da laitna' dakoh uga' kati' macaya ayoa'. Yesus Nyansana wa' Ayo Murid-A ¹⁴ Ngalaka dakoh, Ini' sadi' muncol wa' dasabalas murid-A jangkah ayoa' agi' unyung ge' uman ge' Ini' nagor ayoa' karna kakati'pacayaan ge' kakarasan ate ayoa'. Sabab, ayoa' kati' pacaya wa' ayo sok da nga mile'-A ngalaka Ini' bangkit. ¹⁵ Ge', Ini' nyansana wa' ayoa', "Anumih ka sman-man dunia ge' ngabarta Injil wa' smaan ciptaan. ¹⁶ Asi da nga pacaya ge' ngalaka gatnbaptis ao' gatn nyalamat, tatapi asi da kati' pacaya ao' gatnukum. ¹⁷ Ge, tande-tande diah ao' nganang ayoa' da pacaya: Sadatn gaatn-Ko ayoa' ao' nguser roh-roh jahat; ayoa ao' nyansana sadatn bahasa-bahasa bahu'; ¹⁸ ayoa' ao' minte nipa' nige' barekng ayoa'; ge' sa' ayoa' nyucur tuba da aba' ngamis, hal dakoh kati' ao' ngamisa'; ayoa' ao' mana' barekng ayoa' tumukng ayo sok da anapm, ge' ayo sok dakoh ao' auhatn." Yesus Tarantatn ka Surga ¹⁹ Lalu, ngalaka Tuhan muji a' wa' ayoa', Ini' tarantatn ka surga ge' unyung ka suhutn sentao' Jabata. ²⁰ Lalu, ayoa' anu ge' bakotbah ka dume-ume, samantara Tuhan bakaraje samahu ayoa' ge' nguat firman-A nabo' tande-tande da ngananga'.