¹ Des jman ene Kaisar Agustus nampa aturan, nyuyu nyatat eka ulun mbo pupus dnia. ² Ndo dko tla nyatat des jman Kirenius jadi pngutok pmerenta ela Siria. ³ Koe ene eka ulun ulet nnte catat, masing-masing la kota dero se. ⁴ Ktine lou Yusuf brangkat ngket kota Nazaret mbo Galilea epo Yudea, epo kota Daud yo karan se Betlehem,- koe io ngket suku ai upus Daud- ⁵ apa cnatat sama-sama diang Maria, saro yo, yo desung klandung. ⁶ Des dero mbo mne sampe des nte Maria kakan mekus, ⁷ ai io ngmekus Anak song, Anak yo tuo, laju bnedong diang ampik ai nlumbi mbo lang klekatuk, ngke belo keo awa nte dero turui nsan. ⁸ La kampong mne keo pngamu-pngamu domba, bembe yo nongos la jaba dikut ngendurung pnyekamu-pnyekamu dero des malom. ⁹ Kolan-kolan akat erai kongo mlekat Tuhan mbo dmpet dero diang kmulia Tuhan ktarang nglekum dero ai dero takut beta. ¹⁰ Trus ulek mlekat ene epo dero: " nang takut, koe sbeta iyo aku nyampe epo ikam pngego mroa nte eka-eka bangsa: ¹¹ Olo ndo sundok kinomekus nte ngkam tukang nylamat, yo ene Kristus, Tuhan, mbo kota Daud. ¹² Ai ndo doko pnanda iyo nte ngkam: Ikam anta ruku erai kongo taru bnedong diang ampik ai lumpi lang klekatuk." ¹³ Ai kolan-kolan melak sama-sama diang mlekat ene deo tentara sorga yo muji Allah, ulek iyo: ¹⁴ "Kmulia nte Allah mbo awa yo paling ombo ai snang koyon mbo dnia nte ulun yo sengkono epo Iyo." ¹⁵ Sundok mlekat-mlekat ene ngndikah dero ai mulik epo sorga, pngamu-pngamu ene bunyal epo sama dero se: "man taka malan epo Betlehem nte meti ise nau umbang ela lane, kati yo snampe koe Tuhan epo taka." ¹⁶ Trus dero nrebe malan ai ngruku Maria diang Yusuf ai taru ene, yo desung lumbi lang klekatuk. ¹⁷ Des dero kito se-Io, dero nyampe ise yo sundok nulek epo dero nau umbang Pea ene. ¹⁸ Eka ulun yo kringo bengong nau umbang ise yo sundok ulek gembala-gembala ene epo dero. ¹⁹ tapi Maria ngona lang kesong eka nau umbang ene ai ngnanam iyo. ²⁰ Gmbala-gmbala ene uli ulak muji ai ngmulia Allah koe ise-ise yo dingo dero ai pengitan dero, eka sengkono diang ise yo sundok nulek epo dero. ²¹ Des gnap umur walu olo Io harus knatep, Io dnie karan se Yesus, yo ene karan yo nontus koe mlekat onon se Io keo lang buntung ma Io. ²² Des gnap jman nte mlio mlius, kati hukum torat Musa, dero moit Io epo Yerusalem nte nyerah-Io epo Tuhan, ²³ kati keo tnulis mbo hukum Tuhan : "Eka pea song yo tuo tingen ene harus knudus nte Allah", ²⁴ ai nte mie persembahan korban kati yo ulek Firman lang hukum Tuhan, yo ene erai pasang tkukur ena belo dou kikuy anak dara. ²⁵ Keo ulun mbo yerusalem karan se Simeon. Io ene ulun yo buen ai patoh, yo minte pngiburan nte Israel. Roh Kudus keo ombon io, ²⁶ ai epo io sundok pinotau koe Roh Kudus, se io belo anta mate ena belo pian kito Mesias, yo ene Io yo sundok bnoso diang lnga urapan koe Tuhan. ²⁷ Io ulet epo bait Allah koe Roh Kudus. Des Yesus, Pea ene, noit sumba koe ulun tuo-Io nte gadoh kati ise yo nulek mbo hukum torat, ²⁸ io ngongkom Pea ene laju nente-Io ulak muji Allah. ulek io : ²⁹ "Tempondo, Tuhan, Koe ka hamba-Ko endo bju lang damai sjahtra, sngkono kati diang Firman-Ko. ³⁰ Koe matoku sundok kito nau selamat yo engket Iko ene, ³¹ yo sundok sinodia koe Ko la onon eka bangsa, ³² yoene pa yo jadi beta nte bangsa-bangsa yo mak ai jadi kemuliaan nte umat-Ko, Israel." ³³ ai ine uma-Iyo bengong beta diang eka ise yo kenesah nau umbang Iyo. ³⁴ Trus Simeon memberkati dero ai bunyal epo Maria, ine Pea ene : " sebetaiyo Pea endo tenetap nte metoyak ai nengkuat deo ulun mbo Israel ai nte jadi tanda yo ngoret ruok rame. ³⁵ ai mendau anta nglosan kesong ko se, apa jadi beta pengenanam kesong ulun deo." ³⁶ Ene lou la mne keo Hana, erai kongo nabi bawe, pea Fanuel engket suku Asyer. umur iyo sundok tuo aut. sundok kawen iyo bolum turu taon kolaiyo diang songiyo. ³⁷ ai tmpo ndo iyo balu ai ketuo iyo walu pulu opat taon. Iyo belo pini ngendikah Bait Allah ai molo malom beibadah diang puasa ai bedoa. ³⁸ Ai des ene lou ulet iyo epo mne ai ngulek syukur epo Allah ai bekesah nau umbang Pea ene epo eka-eka ulun yo minte pengelopos nte Yerusalem. ³⁹ Ai des sundok eka yo harus gnawi kati hukum Tuhan. uli dero epo kota awa nongos jati, yoene kota Nazaret mbo Galilea. ⁴⁰ Pea ene ktambah menduan ai jadi galak ponu hikmat, ai kasih karunia Allah keo la Iyo. ⁴¹ Tongku taon ulun tuo Yesus malan epo Yerusalem des olo raya Paskah. ⁴² des Yesus umur duo belas taon, malan doko dero epo Yerusalem kati jati des olo raya Paskah ene. ⁴³ Sundok olo-olo perayaan ene, des dero malan uli, nongos Yesus mbo Yerusalem belo di tau ulun tuo-Iyo. ⁴⁴ Koe dero ngomoi se Io keo ekang ulun-ulun kerai dalan diang dero, erai olo koro dero malan, bayu dero meto Io ekang kluarga keluarga ai ulun-ulun yo bakotau diang dero. ⁴⁵ Koe dero belo ruku Io, mulik dero epo Yerusalem ulak trus meto Io. ⁴⁶ Des sundok tolu olo dero ruku Io lang Bait Allah; Io desung tunge ela ekang guru-guru agama, ulak nempaning ai rekunti epo dero. ⁴⁷ Ai eka ulun yo nempaning Io ene eran beta koe kpintar-Iyo nuing pemesara dero ene. ⁴⁸ Ai des ulun tuo-Iyo kito se Iyo, dero krengao, trus ulek ine-Iyo epo-Iyo: "Ise moko ktine gawi Iko epo kain? Uma-Ko ai aku diang nyoru meto Iko." ⁴⁹ Tuing-Iyo epo dero : " ise moko ikam meto Aku? mba tau be ikam, se Aku arus keo lang belai Bapa-Ku?" ⁵⁰ Tapi dero belo tau ise yo ulek Iyo epo dero ene. ⁵¹ Trus Io uli sama-sama diang dero epo Nazaret; ai Io nokon bolum lang asi ado dero. Ai ine -Iyo ngona lang pngenanam ene nau umbang ene. ⁵² Ai Yesus tambah menduan ai ktambah pentau-Iyo ai tambah olai pngaruh Iyo ai gnawal koe Allah ai ulun.