1 Epo Teofilus yo mulia, Deo ulun yo sundok ngomer nyusun srita nau umbang ngket ayap alom yo sundok kjadian mbo taka, 2 kati yo sampe dero epo taka, yo ngket tla nte kito nau ai nte playan Firman. 3 Koe ene, ngket aku nyempeti nau eka-eka kjadian ene tuyu-tuyu mulai ngket tla yo, aku ngalek kputusan nte nulis yo mbo buku binonuen nte ngko, 4 apa iko kate tau, se ise-ise yo tnutui bnatuk epo iko ene beta-beta memang. 5 Des jman Herodes, raja Yudea, Keo imam karan se Zakharia ngket rombongan Abia. Bawe yo yo ene low ulun ngket upus Harun, karan yo Elisabet. 6 Dero duo ene sengkono mbo Allah ai bolum ngaya se ptua Allah, ai ise-ise yo sundok ttep Tuhan diang belo keo bila molon. 7 Tapi dero duo ene belo keo pea, koe Elisabet ene aloi ai umur dero duo ene sundok tuo memang aut. 8 Keo jman yo, des kono bagian pompo yo, Zakharia btugas nte imam ela onon Tuhan. 9 koe des nundi kati biasa yo nte nentu ise lelu imam yo nte btugas, Io ene yo tnunjuk nte sumba epo lang bait susi ai nutung jombu mbo mne. 10 Montuk desung ene eka umat bkumpul ela baling nte smbayang. Des ene memang jman yo nte nutung jombu. 11 Belo ola, Zakharia kito erai kongo mlekat Tuhan akat mbo tadah sanan Mezbah awa nutung jombu. 12 Koe kito ene io tkojet laju keo kanam takut. 13 Tapi mlekat ene ngulek epo io : "Nang iko takut, Zakharia, koe doa ko sundok sinorukui, Elisabet bawe ko ene anta ngmekus pea song nte ngko ai iko arus nampa karan pea ene Yohanes. 14 Iko anta buen pngnanam ai ego, ktine low deo ulun yo lumpat buen pngnanam koe pngulet pea ko ene. 15 Koe io ene anta olai mbo onon Tuhan, io ene belo anta ngisop anggur ai pngisop yo tau nte mauk, diang io ene nindo ponu diang Roh Kudus mulai ngket lang buntung ine io. 16 iyo anta nampa deo ulun Israel mulik epo Tuhan, Allah dero, 17 io anta malan ono se Tuhan lang roh ai kuasa Elia nte nampa kesong bapa-bapa btulik epo pea-pea io ai kesong ulun-ulun triau epo akal ulun-ulun yo kono jadi diang ktine nyedia ente Tuhan umat yo skono nte-Iyo." 18 Trus ulek Zakaria epo malaikat ene': "Ktimbe apa aku tau se soal ene anta jadi? koe aku sundok tuo ai baweku low sundok tuo." 19 Tuing malaikat ene epo io: "Aku endo Gabriel yo nglayan Allah ai aku sundok snuyu nte ngesah diang iko ai nte nyampe kabar buen endo epo iko. 20 Sbeta yo iko anta jadi pepe ai mba di tau bunyal sampe olo, des eka-eka ene jadi, koe iko belo persaya pmensara ku yo anta sampe des yo melak se beta." 21 Des ene ulun deo nginte Zakharia. Dero jadi bengong, koe io ola balo lang bait susi. 22 Des io baling, io belo tau bsra epo dero jadi dero tau,se io sundok keo pengkito lang Bait Suci. Laju io mie isarat epo dero, koe io nokon pepe. 23 Des sundok tugas io abis, io uli epo blai. 24 Tenu-tenu kola nua Elisabet, bawe io, klandung ai kola lima bulan io belo nyoret ekang ulun. 25 Endo doko tanda gawi gata Tuhan nte oki, tempondo Iyo kakan merse pgemai ku onon ulun ." 26 Lang bulan ke onom Allah nyemuyu malaikat Gabriel brangkat epo kota mbo Galilea nan karan se Nasaret, 27 epo ulun bawe ngelok yo sundok kinomanu diang yusuf engket kluarga Daud; karan ngelok ene Maria. 28 Des mlekat ene sumba mbo blai Maria, io ngulek: "Salam,o iko dnie, Tuhan diang iko." 29 Maria tkojet kringo pngesah ene, trus ngunti lang kesong io, ise arti salam ene. 30 Ulek malaekat ene epo io: "Nang takut, o Maria, koe iko kuli die sokoi ela onon Allah. 31 Beta-beta yo, iko anta klandung diang ngmekus erai Pea song ai iko arus nampa karan Io Yesus. 32 Io anta jadi olai ai nulek Anak Allah Yo Paling Ombo. Diang anta Tuhan Allah mie epo Io' pnunge Daud, bapa ombon Io, 33 ai Io anta tetap jadi raja nte upus Yakub skola-kola yo diang Kerajaan-Iyo belo anta abis. 34 Ulek Maria epo malaekat ene : "Ktimbe soal ene anta jadi, koe aku belo pian bsong?" 35 Tuing malaekat ene' epo io: " Roh Kudus anta diwa ombon iko ai kuasa Allah Yo Paling Ombo nte ngugu iko, koe ene Pea yo anta kmekus ko ene anta nulek kudus, Anak Allah. 36 Ai sbeta yo, se Elisabet, nyindai ko ene, io low, ulak tuo diang nulek se aloi ene, desung klandung pea song, endo nte io onom bulan aut. 37 Koe nte Allah belo keo yo belo dapet gawi." 38 Ulek Maria: "Sbeta yo, aku endo ulun nte Tuhan suyu, jadika epo aku jadi kati ulek ko ene." Trus malaekat ene ngndikah io. 39 Belo di ola balo sundok ene Maria brangkat ai peles malan epo daerah ela tunden-tunden epo tadah erai kota mbo Yehuda. 40 Mbo mne io sumba lou Zakaria ai bsalaman epo Elisabet. 41 Des Elisabet kringo salam Maria, nyoet pea lang rahim io ai Elisabet jadi ponu Roh Kudus, 42 trus bdoya diang oyon ries: "Ela ekang bang bawe iko kuli berkat, atok buntung ko kuli berkat. 43 Aku endo ise sampe ine Tuhan ku ulet nuntun aku? 44 Lau-lau beta, des aku kringo salam ko ene, pea lang buntung ku nyoet koe ego. 45 Aso buen kanam bolum io, yo sundok persaya, koe ise yo nulek epo io ngket Tuhan, anta jadi." 46 Ulek Maria: "Rohku ngmulia se Tuhan, 47 ai kesong ku ego koe Allah, tukang slamat aku, 48 koe Iyo sundok nympti nau bolum hamba-Iyo ene se belo di ngkeh-ngkeh. sbetaiyo, mulai engket tempondo eka-eka pea opo lai sori ngulek se aku bulum snang, 49 Koe yo paling kuasa sundok ngawi gawigata yo olai epo aku kudus karan-Iyo ene. 50 Ai die sokoi yo turun-temurun mitek ulun yo takut se Iyo. 51 Iyo memekelak kuasa-Iyo diang gawi kayang-Iyo se ai mtuar ulun-ulun yo sombong kesongiyo; 52 Iyo mdiwa raja-raja emgket pnunge Io ai mkombo ulun-ulun yo snapa, 53 Iyo nudak eka-eka yo buen epo ulun-ulun sietslau, ai tinombuyo ulun yo tatau malan diang kayang osau; 54 Iyo ngawat israel, playan-Iyo, koe Iyo kenop se diesokoi-Iyo. 55 Kati yo jnanji koe-Iyo epo itak kakah taka, epo Abraham ai turunaniyo nte ndok kden." 56 ai Maria nongos bangsa tolu bulan diang Elisabet, sundok ene bayu uli nua epo lou iyo se. 57 Sampe bulan ente Elisabet mekus ai Io ngemekus pea song, 58 des ulun-ulun giling ginting ai mandi mokong Io krio, se Tuhan sundak mkelak pdie sokoi-Iyo yo olai beta epoiyo, eka-eka dero ego diang iyo. 59 Ulet dero des olo ke walu nte ngatep pea ene diang dero kakan nampa karan io Zakharia, kati karan uma io. 60 Tapi ine io ngulek: "nang, karan io arus Yohanes." 61 Ulek dero epo io: "belo keo mo buyut moyang, itak opo, nyari nyindai pea rini ko yo karan ktine. 62 Trus dero nguai epo uma io kakan ngunti karan ise yo kakan die-io epo pea iyo ene. 63 Io tindu batu tulis, trus Io,nulis ktindo: "Karan io Yohanes." eka dero eran 64 Des ene lou wingkang bowa io ai ale pepe io trus bsurah diang memuji Allah. 65 jadi takut eka ulun yo nongos mo naine, eka nau ene jadi lembon biwi bowa mupus nyarak tunden Yudea 66 Ai eka ulun yo kringo ene, ngnanam ai ngulek: "Jadi ise pea ene endo anta?" koe kayang Tuhan diang io. 67 Zakharia, uma io, ponu diang Roh Kudus, trus io nyampe ngket Tuahan ulek io: 68 Tuhan, Allah Israel, yo paling pnuji, koe Io ulet nte ngawat umat-Io diang mie pnous nte dero. 69 Io mie nte nylamat taka, tete upus Daud, batak-Io ene. 70 Kati yo sundok ulek Tuhan ngket bai bareh tete bowa nabi-nabi-Io yo kudus- 71 nte nylamat taka ngket musu-musu taka ai ngket kayang eka ulun yo kekei se taka. 72 nte mekelak rahmat- Io epo itak kakah taka ai mekenop anta janji -Io yo kudus, 73 yo ene sumpah yo ulek Io epo Abraham, uma itak kakah taka, se Io miye taka, 74 apa taka, lopos ngket kayang musuh, kuli smbayang epo-Io diang belo takut, 75 lang kbrese ai yo kono mbo onon-Io kanjang-kanjang umur bolum taka. 76 Ai iko, o' anakku, anta tinompapa nabi Allah Yo paling ombo; koe iko anta malan ono se Tuhan nte ngeraduh boyan nte-Io, 77 nte miye epo umat-Io pentau soal keselamatan yo lang pengampunan dosa-dosa dero, 78 koe rahmat ai sayang kosang ngket Allah taka, diang ise Io anta ngasi ngado taka,Mato olo ma ngket awa yo ombo, 79 nte nampa pa nte dero yo nongos lang seom ai lang slingu maut nte nadah botis taka epo boyan damai sejahtera." 80 Jadi anak ene tambah olai ai tambah galak roh iyo.Ai io nongos mbo padang gurun sampe epo olo io arus mekelak kompu iyo epo ulun Israel.