¹ Ngket Paulus, rasul Kristus Yesus, koe ptua Allah, ai Timotius eraibuntung taka, ² epo eraibuntung-eraibuntung yo kudus ai yo persaya lang Kristus mbo Kolose. Kasih karunia ai damai sejahtera ngket Allah, Bapa taka, dor diang ikam. ³ Kain dor ngmokas sukur epo Allah, Bapa Tuhan taka Yesus Kristus, tongku kain bdoa nte ngkam, ⁴ koe kain sundok kringo nau iman kam lang Kristus Yesus ai nau pngkosang kam epo eka ulun kudus, ⁵ koe keo yo knundong, yo sinodia nte ngkam mbo sorga. Nau umbang yo knundong ene sundok ngket tla ikam kringo lang firman yo kono, yo doko Injil, ⁶ yo sundok sampe se ikam. Injil ene kbua ai mnduan mbo pupus dnia, ktine low mbo ikam mulai ngket des ikam kringo-iyo ai tau se kasih karunia Allah yo beta-beta-iyo. ⁷ Eka ene sundok ikam tau ngket Epafras, tman playan yo tngkosang kain, yo nte ngkam io ene playan Kristus yo stia. ⁸ Io low doko yo sundok ngurai nau kosang kam epo kain lang Roh. ⁹ Koe ene ngket des kain kringo ene, belo keo sdang-sdang kain bdoa nte ngkam. Kain tindu, apa ikam nrima eka hikmat diang pngertian yo kono, nte tau ptua Tuhan diang smpurna, ¹⁰ sampe bolum kam pantas onon-Iyo ai sngkono epo-Iyo lang eka nau umbang, ai ikam kbua lang eka gawi yo buen ai mnduan lang pntau yo kono nau umbang Allah, ¹¹ ai pinoturon diang eka kturon koe kuasa yo mulia ngket-Iyo nte nantai eka-eka ene diang tahan ai doloh, ¹² ai ngulek sukur diang pngnanam ego epo Bapa, yo mkate ikam nte kuli bagi lang ise yo pinotoko nte ulun-ulun kudus lang krajaan trang. ¹³ Io sundok nglopos taka ngket kuasa seom ai ngensut taka epo lang Krajaan Pea-Iyo yo knosang; ¹⁴ mbo lang Io taka kuli pnous taka, apa nampun dosa. ¹⁵ Io ene gambar Allah yo belo di melak, yo ono tingen, paling nuon ngket eka yo tnampa, ¹⁶ koe mbo lang Io doko sundok tnampa eka-eka ene, yo keo mbo sorga ai yo keo mbo dnia endo, yo melak ai yo melim, kati awa raja, panan krajaan, kati pmrenta, panan yo keo kuasa; eka-eka ene tnampa koe Io ai nte Io. ¹⁷ Io keo paling ono se eka-eka ene ai eka-eka ene keo mbo lang Io. ¹⁸ Io ene utok ngket kompu, yo doko jemaat. Io doko yo ono tingen, yo tla nyuli ngket ekang ulun mate, koe ene Io yo nuon tingen se eka ise masam. ¹⁹ Koe eka kponu Allah kate nongos lang Io, ²⁰ ai koe Io ene doko Io mdamai eka-eka ene diang Io se, buen ko yo keo mbo dnia endo, ndok yo keo mbo sorga, sundok Io mkeo damai koe daya salib Kristus. ²¹ Ktine low ikam yo bai bolum oro ngket Allah ai yo ngmbali-Iyo lang kesong ai pngnanam kati yo melak ngket gawi gata kam yo triaw, ²² tempo ndo pdamai-Iyo, lang kompu yo tau mate ngket Kristus koe pngmate-Iyo, nte mayak ikam kudus ai belo keo sala ai belo keo bila molon mbo onon-Iyo. ²³ Koe ene ikam arus moyoh beta lang iman, nokon turon ai belo di skukui, ai nang kakan knensor ngket yo knundong lang Injil, yo sundok dingo kam ai yo sundok snampe mbo mupus dnia mbo iwat langit, ai yo aku endo, Paulus, sundok jadi pelayan-iyo. ²⁴ Tempo ndo aku ego koe aku kate ssa nte ngkam, ai mgnap lang isi upak ku ise yo aso tuno se kssa Kristus, nte kompu-Iyo, yo doko jemaat. ²⁵ Aku sundok jadi pelayan jemaat ene sngkono diang tugas yo tape Allah epo aku nte nlaju firman-Iyo diang bol-bol mbo nau umbang-iyo epo ikam, ²⁶ yo doko nau umbang yo melim ngket bjatus taun epo bjatus taun ai ngket upus epo upus, tapi yo tempo ndo pinokelak epo ulun-ulun kudus-Iyo. ²⁷ Epo dero Allah kakan mmtau, bukan main ktatau ai kmulia-iyo yo melim ene mbo bangsa-bangsa yo mak, yo doko: Kristus keo ela ekang ikam, Kristus ene doko knundong nte jadi mulia. ²⁸ Io ene doko yo sampe kain, ena tongku-tongku ulun nasehat kain ai tongku-tongku ulun yo tutui batuk kain lang eka-eka hikmat, nte ngayak tongku-tongku kongo ulun epo yo smpurna lang Kristus. ²⁹ Ene ka doko yo komer-ku ai tungka-ku diang eka pnglian sngkono diang kuasa-Iyo, yo bgawi diang kois mbo lang aku.