¹ Ise yo sundok keo ngket tla, yo sundok dingo kain, yo sundok eti kain diang mato kain, yo sundok kesah kain ai yo sundok bulem kain diang kayang kain nau umbang Firman yo bolum- ene doko yo tulis kain epo ikam. ² Bolum ene sundok pinokelak, ai kain sundok metiiyo ai tmpo ndo kain keo kesah ai nyampe epo ikam nau umbang bolum yo kden, yo keo sama-sama diang Bapa ai yo sundok pinokelak epo kain. ³ Ise yo sundok eti kain ai yo sundok dingo kain ene, sampe kain epo ikam lou, apa ikam lou kuli bekowon diang kain. Ai kowon kain ene doko kowon diang Bapa ai diang Pea-Iyo, Yesus Kristus. ⁴ Ai eka endo tulis kain epo ikam, apa pengego kain jadi sempurna. ⁵ Endolah kabar yo dingo kain tentang Io yo bere kain epo ikam, yoene Tuan Ala ene wala, seom belo keo lang Io. ⁶ Ena taka ngulek se taka keo persekutuan lang Io, tapi taka aso bolum lang seom, taka nampa eta diang belo ngelaku yo beta. ⁷ Tapi, ena taka malan lang wala, sama kati Io lang wala, taka kerai diang yo mak, dan daya Yesus, pea Io, merese eka dosa taka ⁸ Ena taka ngulek, se taka belo di keo dosa, jadi taka ngakal taka se ai yo kono belo di keo mbo lang taka. ⁹ Ena taka ngangkan dosa taka, jadi Io ene doko setia ai adil, sengga Io anta ngampun eka dosa taka ai ngembrse taka ngket eka gawi gata dat. ¹⁰ Ena taka ngulek, se taka belo keo nggawi dosa, jadi taka nampa Io jadi pnampa eta ai firman-Iyo mba di keo mbo lang taka.