( Umat Allah Menyanyiko Nyanyion Beheru ) ¹ Mengka, ake mengoleh Anak Domba togok de Buket Sion, ngan serompok-Nye ado 144 ribu urang, nyo memilikih namo Bepa-Nye podo dahi mike. ² Ake mendongor suaro deri serga upa gemuruh aek nyo lobot ngan upa bunyi guntur nyo karas, hambuk suaro nyo ke dongor iye upa bunyi padong pemain kecapi nyo memainko kecapi mike. ³ Mike menyanyiko suatu nyanyion beheru de hadopon takhta ngan de depan keempat makhluk, sereta de depan tuha-tuha. Pi seurang pun depot mempelajori nyanyion iye seloin keseratus empat puluh empat ribu urang nyo lah de tobus deri behumi. ⁴ Mike adolah urang-urang nyo hopi menajisko diri dengan betina-betina ulehnyo mike perjako. Mike adolah urang-urang nyo mehilui Anak Domba ke mone pun enye pogi. Mike lah de tobus deri antaro mendesio sebagebuah-buah pertamo bage Allah ngan Anak Domba. ⁵ Hopi ado pelato delom mulut mike; mike hopi besaloh. ⁶ Ake mengoleh malaikat loin terbang de tangah-tangah langet, mengunda Injil kekal untok de beritako kenempat mike nyo tinggal de behumi ngan kenempat segelo bengeso, suku, bahasa, ngan kaum. ⁷ Ngan enye buik dengan suaro karas, "Takutlah bakal Allah ngan borikolah kemuliaon kenempat-Nye ulenyo waktu penghakimon-Nye lah sampoi; sembahlah Enye nyo menciptako langet, behumi, lout, ngan segelo mato aek." ⁸ Mengka, malaikat nyo loin, nyo kedua, menutul ngan buik, "Runtuh, lah runtuh Babel nyo godong iye ulehnyo enye lah membuat segelo bengeso meminom anggur nafsu seksualnye nyo bejat." ⁹ Mengka, malaikat nyo loin, nyo ketiga, menutul kedua malaikat sebolumnye, ngan buik dengan suaro karas, "munye siape bae menyembah binatong iye ngan patungnye, ngan menerimo sikuk tando pado dahi atau tangonnye, ¹⁰ Urang iye bakal minom anggur murka Allah, nyo de tuangko dengan kekuaton ponuh ke delom cawan murka-Nye, ngan enye bakal de sikso dengan api ngan belerang de hadopon malaikat-malaikat kudus ngan de hadopon Anak Domba. ¹¹ Ngan, hasop siksaon mike noek selamo-lamonye. Mike hopi ado waktu untok istirahat, beik tangah hari atau malom, yaitu mike nyo menyembah binatong iye ngan patungnye, atau siape pun nyo menerimo tando namonye." ¹² Nielah ketekunon urang-urang kudus nyo memeliharo perentah Allah ngan iman mike de delom Yesus. ¹³ Mengka, ake mendongor suaro deri serga buik, "Tuleskolah nie : Mulakih kinie, de berkatilah urang te'elek, nyo te'elek de delom Tuhan." Roh buik, "Bonor, enggakkonyo mike depot beristirahat deri jerih lelah mike ulehnyo perbuaton-perbuaton mike mehilui mike." ¹⁴ Mengka, Ake mengoleh suatu awan puteh ngan duduk de pucuk awan iye seurang upa Anak Mendesio, mengenako mahkota emas de kepalo-Nye ngan sabit nyo tajom de tangon-Nye. ¹⁵ Mengka, malaikat loin keluor deri Bait Allah, ngan mekek dengan suaro karas kenempat Enye nyo duduk de pucuk awan, "Ayunko sabit-Me ngan panenlah ulehnyo waktu untok memanen sodah sampoi ngan panenan de behumi sodah masok." ¹⁶ Mengka, Enye nyo duduk de pucuk awan mengayunko sabit-Nye ke pucuk behumi, ngan behumi pun de panen. ¹⁷ Mengka, malaikat loin keluor deri Bait Allah nyo de serga, ngan enye jugo memilikih sabit nyo tajom. ¹⁸ Ngan, malaikat loin lage, nyo bekuaso pucuk api, keluor deri altar. Enye mekek dengan suaro karas kenempat malaikat nyo memogong sabit tajom iye, "Ayunko sabitme nyo tajom iye ngan kumpulkolah guguson buah anggur deri betong anggur de behumi." ¹⁹ Mengka, malaikat iye mengayunko sabitnye ke behumi ngan mengumpulko guguson buah anggur deri betong anggur de behumi ngan melemparkonye ke delom betu kilangon godong murka Allah. ²⁰ Pemerason buah anggur iye de lakuko de luor kota, ngan deroh mengalir deri alat pemeras anggur iye kiro-kiro setinggi kekang kuda ngan sepanjong seribu enam ratus stadia.