¹ Mengka, ake mengoleh seekor binatong buas keluor deri delom lout, memilikih sepuluh tanduk ngan tujuh kepalo. Podo setiap tanduknye terdepot sebuah mahkota ngan podo setiap kepalonye tetules namo-namo hinaon. ² Binatong buas nyo ake koleh iye upa dengan macan tutul, kakinye upa kaki beruang, ngan mulutnye upa mulut singa. Nago iye membori binatong buas iye kekuaton, takhta, ngan kuaso nyo godong. ³ Ake mengoleh sikuk deri kepalo-kepalonye upa terkena luka nyo depot mengakibatko te'elek, hambuk luka iye menjedi sombuh. Segelo denia temanga ngan mehilui binatong buas iye. ⁴ Ngan, mike menyembah nago iye ulehnyo sodah memboriko kekuatonnye kenempat binatong buas iye; ngan mike menyembah binatong buas iye dengan buik," Siapekah nyo upa binatong buas nie ngan siapekah nyo depot beperang melawon enye?" ⁵ Ngan, kenempatnye de boriko sebuah mulut nyo buik keber ngan menghujat, ngan kuaso untok melakukonye selamo 42 bulan. ⁶ Enye membuka mulutnye delom hujaton melawon Allah, untok menghujat namo-Nye, ngan kemah-Nye, ngan mike nyo tinggal de serga. ⁷ Enye jugo de bulehko untok memerangi urang-urang kudus ngan mengalahko mike; ngan kenempatnye de boriko kuaso pucuk segelo suku, kaum, bahaso, ngan bengeso. ⁸ Segelo nyo tinggal de behumi bakal menyembahnye, yaitu setiap urang nyo namonye hopi tetules deri denia de jediko delom kitab kehidupon milik Anak Domba, nyo lah de sombeleh. ⁹ Setiap urang nyo betelingo hendaklah enye mendongorko nie : ¹⁰ "Apabila seseurang de tentuko sebage tawanon, enye bekal menjedi tawanon; apabila seseurang membunoh dengan pedang, dengan pedang enye harus de bunoh." Ielah ketekunon ngan iman urang-urang kudus. ¹¹ Mengka, ake mengoleh seekor binatong buas loin keluor deri delom behumi; ngan binatong iye memilikih dua tanduk upa anak domba, hambuk enye buik upa seekor nago. ¹² Enye menjelonko segelo kuaso binatong buas nyo pertamo iye de hadoponnye, ngan membuat behumi ngan mike nyo tinggal de delomnye menyembah binatong buas nyo pertamo, nyo luka parahnye lah de sombuhko. ¹³ Enye melakuko tando-tando ajaib nyo godong, bahkan menurunko api deri langet ke behumi, de hadopon urang-urang. ¹⁴ Ngan, enye menyosotko urang-urang nyo tinggal de behumi dengan tando-tando ajaib nyo de izinko bagenye untok de lakuko de hadopon binatong buas nyo pertamo. Enye ngehatoko kenempat mike nyo tinggal de behumi untok membuat patung binatong buas nyo pertamo, nyo terluka ule pedang, hambuk tetap hidop iye. ¹⁵ Enye mengizinko untok memboriko napas kenempat patung binatong buas iye singgo patung binatong buas iye pacok buik ngan menyebabko urang-urang nyo hopi menyembah patung iye de bunoh. ¹⁶ Ngan, enye menyebabko segelo urang, sugeh atau meskin, budak atau urang merdeka, de bori sikuk tando podo tangon kanon atau dahinye, ¹⁷ Enggakkonyo hopi ado seurang pun depot memboli atau menjuol hambuk enye memilikih tando iye, yaitu namo binatong buas iye atau bilangan namonye. ¹⁸ Hal nie membutuhko hikmat. Biarlah urang nyo bijaksana menghitung angko binatong buas iye ulenyo angko iye adolah angko seurang mendesio; ngan angkonye enam ratus enam puluh enam.