¹ Ulenyo iye, dolor-dolorke nye kukasehi ngan kudeloki, nye menjedi gemera ngan kebanggaonke, togoklah dengan togoh delom Tuhan. ² Ake sajo memohon ngan Euodia ngan jugo dengan Sintikhe untuk hidup rukun delom Tuhan. ³ Au, ake minta ngan kowe, kanti-kanti sejatike, tolunglah betina-betina iye ulenyo mike lah begawe kuat denganke ulenyo pelayanon Injil , jugo besamo Klemens ngan kanti-kanti segaweke nyo loin, nyonamo-namonye, tetulis delom buku kehidupon. ⁴ Besukacitalah terus delom Tuhan. Sekali lagi kugerako, bersukacitalah!. ⁵ Biarlah kelombuton hatime deketahui segelo urang. Tuhane lah parok. ⁶ Jengonlah kuatir tentang apepun jugo. Namun, delom segelo sesuatu nyatoko kedokme dengan Allah delom doa ngan permohonan serta ucapon syukur. ⁷ Damai sejahtera Allah nyo melampaui segelo pengertion akan memeliharo hati ngan pekeronme delom Yesus Kristus. ⁸ Akhernye, dolior-dolorke, segelo nyo bonor, segelo nyo mulia, segelo nyo adil, segelo nyo suci, segelo nyo beik, segelo nyo terpuji, segelo nyo sempurno, segelo nyo patut dipuji, pekerkolah segelonyo iye. ⁹ Ape nyo lah kowe pelajori, terimo, dongor, ngan koleh deri ake, lakukolah segelonye iye, mengka Allah sumber damai sejahtera empuknyo menyertai kowe. (Paulus Berterimokaseh dengan urang-urang pecayo de Filipi) ¹⁰ Ake sajo bersukacita delom Tuhan ulenyo kinie, akhernye kowe boriko belek perhationme ke ake. Memang, sebolumnye kowe mboriko perhation denganke, hambuk kowe hopi mempunyoi kesempaton. ¹¹ Ake gerako hal nie bukon ulenyo ake sedang kekurangon, sabab ake lah belajor mencukupko diri delom keadaon apepun. ¹² Ake tahuko ape artinye kekurangon, ngan ake jugo tahuko ape arti kelobihon. Delom segelo ngan setiap keadaon, aku lah belajor resio hidup berkecukupon, apolah dengan konyong ngan kelaporon, apokah hidup neman duit atau hopi ado duit. ¹³ Ake depot melakuko segelo sesuatu melewati Nye nyo mbori kekuaton ngan ake. ¹⁴ Namun, kowe lah berbuat beik endok berbagi bobon denganke. ¹⁵ Kowe dewek tahuko, jemaat Filipi, bahwa tekalo awal pertamo pelayanon Injil, sesodah ake meninggalko wilayah Makedonia, hopi ado jemaat nyo endok berbagi bobon ngan ake delom hal membori ngan menerimo, kecuali kowe. ¹⁶ Bahkan, tekalo de kota Tesalonika, kowe ngirim bentuon untuk kebutuhonke lobih deri sekali. ¹⁷ Namun, bukon bentuaon iye nyo ku delok, meloinko ake ndelok buah nyo mempergodong keuntungonme. ¹⁸ Ake lah menerimo pembayaron ponoh, bahkan lobeh. Ake mempunyoi segelo nyo ake butuhko ulenyo pemborion nyo kowe kirem ngan ake melalui Epafroditus. Pemborionme iye menjedi persembahon nyo harum, korban nyo bekenan, ngan menyenangko Allah. ¹⁹ Allahke akan memonohi segelo keperluonme menurut kesugihon-Nye nyo mulia delom Yesus Kristus. ²⁰ Kemuliaon bagi Allah ngan Bepak kite untuk selamo-lamonye. Amin. ²¹ Sampoiko salam kamie dengan segelo urang kudus delom Yesus Kristus. Salam untukme deri dolor-dolor seiman nyo ado besamoke de sie. ²² Segelo urang kudus ngirem salam untukme, khususnye mike nyo begawe melayani de istana Kaisar. ²³ Anugerah deri Tuhan Yesus Kristus menyertai rohme. Amin.