(Yesus Menahirko urang Nyo saket Kusta) ¹ Tekalo Yesus turun deri buket iye, tenggenggirukon urang lobot mehaloui-Nye. ² Ngan, koleko urang saket kusta njongok ngan Enye, ngan sujud dehadopon-Nye, ngan bekehato," Tuan, munye Kowe endok Kowe depot menaherko ake." ³ Ngan, Yesus menjulukko tangon-Nye ngan menjamahnye, ujo-Nye, " Ake endok tahirlah." seketiko iye jugo, detahirkolah kusta urang iye. ⁴ Ngan, Yesus sebepelabe ngan enye, " Perhatikolah, jengon kowe menceritoko apo-apo dengan sikok urang pun, cuma pegilah tunjukkolah dirime dengan imam, ngan persembahkolah persembahon nyo de perentahko Musa upa kesaksion enye. " ⁵ Tekalo Yesus masuk ke Kapernaum, seurang perwira njongok ngan Enye, memohon ngan Enye, ⁶ Ngan behekato," Tuan, hamboke sedang tebereng lumpuh de rumah, sangat menderito." ⁷ Ngan, Yesus bepelabeko ngan enye, " Ake todo njongok ngan menyombuh ko enye." ⁸ Cuma sebeleknya, perwira iye menjawab ngan bekehato, " Tuan, ake hopi layak untuk Kowe masuk kebewo hatopke, cuma katokolah sepato kehato bae ngan hamboke akan desembuhko. ⁹ Sabab ake jugo adolah urang nyo ado de bewo kekuasaon, dengan tentera-tentera de bewohke. Ngan ake behekato ngan nyo sikok, " Pegilah ", enye pun pegi, ngan kenempat nyo loin, " Njongoklah ", ngan enye pun njongok, ngan kenempat hamboke," Lakuko nie ngan enye pun melakukonnye." ¹⁰ Tekalo Yesus mendongor hal nie, Enye kagum ngan bekehato kenempat urang-urang nyo mehaloui-Nye," Ake mengehatoko nyo sebonornya ngan kowe, Ake bolum menemuko iman segodong nie de antaro urang Israel. ¹¹ Ake mengehatoko ngan kowe bahwa lobot nyo nak njongok deri timur ngan barat, ngan duduk makon dengan Abraham, Ishak, ngan Yakub delom Kerajaon Serga. ¹² cuma anak-anak kerajaon iye nak decampok ke delom kekolomon nyo paleng kolom. De sane akan ado ratopon ngan kertak gigi." ¹³ Ngan, Yesus bekehato dengan perwira iye, " pegilah, biarlah terjedi ngan kowe upanyo kou pecayoi. " Ngan, tekalo saat iye jugo, hambonye de sembuhko. ¹⁴ Tekalo Yesus sampoi rumah Petrus, Enye ngoleh induk mentuha Petrus sedang tebereng ngan domom. ¹⁵ Lalu, Yesus menjamah tangon induk iye ngan domom nye sayau. Mengka, enye jego ngan melayani Yesus. ¹⁶ Tekalo menjelang malom, enye membewo kepodo-Nye lobot urang kerasukan roh jahat, ngan Nye mengusir roh-roh iye dengan sikok kehato, ngan menyembuhko segelo urang nyo saket, ¹⁷ enggak konyo de genapilah ape nyo dekehato ule Nabi Yesaya : " Enyelah nyo ngambek kelamahon-kelamahon kite ngan menanggung penyaket-penyaket kite," ¹⁸ Kinie, tekalo Yesus mengole urang lobot de sekeliling-Nye, Enye membori perentah untuk betulak ke seberang. ¹⁹ Mengka, seurang ahli Torat njongok ngan bekehato ngan Enye," Guru, ake nak mnghaloui-Me kemono bae Kou bejelon." ²⁰ Ngan, Yesus bekehato ngan enye," Para rubah mempunyoi liang ngan burung-burung de langet mempunyoi sangkor-sangkor. Cuma sebeleknye, Anak Mendesio hopi mempunyoi tempat untuk memotekko kepalo-Nye." ²¹ Sikok deri para murid bekehato ngan-Nye, " Tuhan, izinkolah ake ndehulu bejelon ngan menguburko bepakke." ²² Cuma sebeleknye, Yesus bekehato ngan enye, " Haloulah Ake, ngan biarlah urang mati menguburko urang mati nyo dewek." ²³ Ngan, tekalo Yesus noek ke biduk, murid-murid-Nye menghalou Enye. ²⁴ Ngan, kolehkolah, terjedi badai godong de danau sehingga biduk iye tertutup umbak. Mengka cuma Yesus tidur. ²⁵ Ngan murid-murid menjongok Yesus ngan menjegokon-Nye, ujonye, " Tuhan selamatko kamie ! Kite sedang benasa !" ²⁶ Ngan, Enye bekehato kenempat enye," mengka kowe takut, hai kowe nyo kurang beriman ?" mengka Enye togok ngan buik angen serta denou iye, ngan menjedi tenang sekali. ²⁷ Mengka, urang-urang iye temanga-mangan ngan buik," urang macam ap nyo nie, bahkan angen ngan denou pun menuruti-Nye ?" ²⁸ Tekalo Yesus sampoi de seberang denou, de daerah urang Gadara, dua urang nyo kerasukon roh jahat menomui-Nye. Mike keluor deri kuburon dengan sangat bingas singgo hopi ado urang nyo depot melewati jelon iye. ²⁹ Ngan kolekolah, enye mekek, ujonye," ape uruson Kowe ngan kamie, hai Anak Allah ? ibo Kowe njongok untuk menyikso kamie sebolum waktunye?" ³⁰ Ngan, ekak jeuh deri enye ado serombongan godong bebi nyo sedang bedelok makon. ³¹ Setan-setan iye memintak ngan Enye ngan behekato," munye Kowe nak ngusir kamie, suruhlah kamie pendah kerombongan bebi iye," ³² Ngan Yesus behekato ngan enye, " Pegilah "! mengka enye keluor ngan masuk ke delom bebi-bebi iye. Mengka, segelo rombongan bebi iye pun terjun deri tobing denou ngan teelek de delom aik. ³³ Urang-urang nyo ngingunko rombongan bebi iye melariko diri, ngan masuk kedelom kota, ngan menceritoko segelo iye, termasuk ape nyo terjedi dengan urang-urang derasuk setan nyo iye. ³⁴ Ngan, kolehkolah, segelo kota keluor nak betomu dengan Yesus. Tekalo ngoleh Yesus, enye memintak-Nye enggakonnyo mencampok wilayah mike.