(Jengon Menghakimi) ¹ "Jengon menghakimi enggakkonyo hopi dehakimi. ² Ulenyo dengan penghakimon nyo kou gunako untuk menghakimi, kowe nak dehakimi, ngan dengan ukuron nyo kou gunako untuk mengukur nak deukurkan dengan kowe. ³ Ngan, mengka kowe ngoleh kerempek kayu de mato dulurme, cuma hopi mengetahui balok nyo ado de matome dewek? ⁴ Atau, upamone pacok kowe bekehato ngan dulurme, enggakkonyo ake mengeluarko kerempek kayu iye deri matome, cuma koleh, ado balok de matome dewek? ⁵ Hai, urang munafik, keluarko dehulu balok iye deri matome, ngan beheru kowe nak ngoleh ngan jelas untuk mengeluarko kerempek kayu deri mato dulurme. ⁶ Jengon memboriko barang nyo kudus ngan anjing-anjing, jengon pula nohukko mutiarame ke hadopon bebi enggakkonyo enye hopi menijak-nijak iye dengan kakinye ngan ngulang mengoyak-ngoyak kowe. ⁷ "Mintaklah, ngan hal iye nak deboriko ngan kowe. Deloklah, ngan kowe nak mendepot. ketoklah, ngan hal iye nak debukakko bagime. ⁸ Sabab, setiap urang nyo memintak, enye menerimo, ngan urang nyo bedelok nak mendepotko, ngan bagi nye nyo mengetok nak debukakko. ⁹ Atau, siape deri antaro kowe, nyo munye anaknye mintak roti nak membori betu dengan anaknye iye? ¹⁰ Atau, munye anaknye mintak ikan, enye hopi nak memboriko ular dengan anaknye iye, bukon? ¹¹ Jedi, munye kowe nyo jahat tahuko upamone membori anak-anakme pemborion-pemborion nyo beik, telobeh lagi Bepakme nyo de serga, Enye nak memboriko nyo beik dengan mike nyo memintak dengan Enye. Hukum Nyo Terutamo ¹² "Ulenyo iye, segelo sesuatu nyo kou amat urang lakuko ngan kowe, upa iyelah jugo kowe lakuko ngan enye ulenyo nielah isi Hukum Torat ngan kitab paro nabi." ¹³ "Masuklah melalui gerbang nyo sempet ulenyo leborlah gerbang ngan loaslah jelon nyo menuju kenempat kebinasoon, ngan ado lobot nyo masuk melaluinye. ¹⁴ Sabab sempetlah gerbang ngan kedetlah jelon nyo menuju kenempat kehidupon, ngan sediket nyo menomukonye." ¹⁵ "Cuma, waspadalah terhadop nabi-nabi pelsu nyo njongok ngan kowe ngan bepakoiyon domba, cuma sebonornye enye adolah serigala-serigala nyo bingas. ¹⁶ Deri buahnyelah kowe nak mengenali nye. Depotkah urang mengumpulko buah-buah anggur deri somok-somok unok ngan buah-buah ara deri tumbuhon-tumbuhon berunok? ¹⁷ Upa iyelah jugo, setiap betong nyo beik menghaselko buah nyo beik, cuma betongnyo hopi beik menghaselko buah nyo hopi beik. ¹⁸ Betong nyo beik hopi mungkin menghaselko buah nyo hopi beik, ngan betong nyo hopi beik hopi mungkin menghaselko buah nyo beik. ¹⁹ Tiap betong nyo hopi menghaselko buah nyo beik akan detobong ngan decampok ke delom api. ²⁰ Jedi, deri buah-buahnye kowe akan mengenali enye. ²¹ Hopi segelo urang nyo bekehato dengan-Ke, Tuhan, Tuhan, akan masuk ke delom Kerajaon Serga, meloinko enye nyo melakuko kendok Bepakke nyo de serga. ²² Pado hari iye, lobot urang akan bekehato ngan-Ke, Tuhan,Tuhan, bukonkah kami bernubuat delom namo-Me, ngan mengusir roh-roh jahat delom namo-Me, ngan melakuko lobot mukjizat delom namo-Me? ²³ Lalu Ake nak menyatoko ngan enye, Ake hopi pernah mengenal kowe! Enyehlah diri-Ke, kowe nyo mengerejoko kesalahon! ²⁴ Ulenyo iye, segelo urang nyo mendongor pembuikon-pembuikon-Ke nie ngan melakukonye nak menjedi upa urang bijaksana nyo membengun rumahnye de pucuk betu. ²⁵ Lalu, turunlah hujan ngan detonglah banjir, ngan angen betiup menerpa rumah iye, ngan rumah iye hopi rubuh ulenyo dediriko de pucuk betu. ²⁶ Ngan, setiap urang nyo mendongor pembuikon-Ke nie ngan hopi melakukonye nak menjedi upa urang bodoh nyo membengun rumahnye de pucuk bungen. ²⁷ Mengka, turunlah hujan ngan detonglah banjir, ngan angen betiup menerpa rumah iye, ngan rumah iye roboh, ngan sajo godong kerosakkonnye." ²⁸ Tekalo Yesus sodah mengehatoko hal-hal nie, urang lobot teheran-heran ngan pengajoron-Nye, ²⁹ ulenyo Enye mengajor mike sebagoi urang nyo bekuaso, ngan hopi upa ahli-ahli Torat mike.