(Perumpamoon Tentang Urang Nyo De undang ke Pesta Pernikahon ) ¹ Yesus buik lagi kenempat mike delom perumpamoon-perumpamoon, ujo-Nye, ² " Kerajaon Serga depot deumpamako upa seurang rajo nyo mengadako pesta perkawinon untuk anak jentonnye. ³ Ngan, enye menyuruhko padong hambonye untuk memantou urang-urang nyo sodah de undang ke pesta iye, hambuk mike hopi endok njongok. ⁴ Mengka, rajo nyuruhko lagi hambo-hambo nyo loin, ujonye,' Gerahkolah kenempat urang-urang nyo deundang, Koleko, ake sodah mempersiapko hidangonke. Lembu-lembu jenton ngan ternak-ternak gomok segelo nyelah de semboleh, ngan segelonye sodah siap. Njongoklah keperjamuan kawin nie.' ⁵ Cuma hambuk, mike mengabaiko ngan pogi, nyo sikuk ke humanye, nyo loin ke usahanye, ⁶ Ngan nyo loinnye menangkop hambo-hambo rajo iye, menyikso, ngan membunoh mike. ⁷ Mengka, sang rajo bemarah, ngan mengerem tentara-tentaranye, membinasoko pembunoh-pembunoh iye, ngan menunu kota mike. ⁸ Mengka, enye buik kenempat hambo-hambonye,'pesta perkawinon sodah siap, hambuk urang-urang nyo de undang iye hopi layak. ⁹ Uleh kerana iye, pogilah kejelon-jelon rayo ngan undanglah seberape lobot urang nyo depot kou tomui kepesta perkawinon nie.' ¹⁰ Mengka, hambo-hambo iye pogi kejelon-jelon ngan mengumpulko segelo urang nyo mike tomui, nyo beik ngan nyo jahat. Ngan, tempat perkawinon iye de penuhi dengan padong tamu. ¹¹ Cuma hambuk, tekalo rajo masuk nak betomu dengan padong tamunye, enye ngoleh seurang de sane, nyo hopi menyarungko pakoyon nak pesta perkawinon. ¹² Enye buik ngan mike,'Dulur, upamone kowe pacok masuk ke maie hopi memakoi pakoyon nak pesta perkawinon?' Ngan, urang iye tediom. ¹³ Sesodah iye rajo iye buik kenempat hambo-hambonye,'kobotlah tangon ngan kakinye, ngan tohukkolah enye ke delom kekolomon nyo paleng luor. De sane akan ado ratopon ngan kertak gigi.' ¹⁴ Sabab, lobot nyo de pantou, hambuk nyo sediket nyo de peleh." ¹⁵ Sodah iye, urang-urang Farisi bejelon ngan sekongkol enggak konyo enye depot menjorot Yesus dengan pembuikon-Nye. ¹⁶ Ngan, Mike mengutus murid-murid mike kenempat Yesus, serompok dengan urang-urang Herodian. Mike buik," Guru, kamie tahuko bahwa kowe jujur ngan mengajarko jelon Allah delom kebonoron. Kowe hopi takut ngan siape pun ulenyo kowe hopi mengoleko rupa. ¹⁷ Munye mumunye, kehatokolah pendepot-Me kenempat kamie. Ibo debonorko nak membayar pajak kaisar apo hopi?" ¹⁸ Cuma hambuk, Yesus tahuko kejahoton mike ngan buik," Mengka kowe mencuboi Ake, hai munafik ? ¹⁹ Tunjukkolah ngan Ake duit nak untuk pajak iye." Mengka. mike menyerahko sekepeng dinar kenempat Enye. ²⁰ Ngan, Enye buik kenempat mike," Gambar ngan tulison siapekah nie?" ²¹ Mike menjawab, " Kaisar ". Kemudian, Yesus bekehato kepado mike, "Uleh sabab iye, bayarlah kepodo kaisar hal-hal milik Kaisar, ngan kepodo Allah hal-hal nyo adolah milik Allah." ²² Tekalo mendongornyo, mike temanga-manga, ngan meninggako-Nye ngan bejelon. ²³ Tekalo hari nyo samo, urang-urang Saduki, nyo buik bahwa hopi ado kebangketon, njongok kenempat Yesus ngan betanyo kenempat Enye. ²⁴ Mike buik," Guru, Musa buik bahwa munye seurang jenton teelek ngan hopi mempunyoi anak, dulur jentonnye arus mengawini bininye ngan menerusko keturunon bage dulurnye nyo teelek iye. ²⁵ Kinie, ado tujuh bedulur de antaro kamie. Nyo pertamo kawin, ngan telek hopi ado anak, ngan meninggalko bininye bage dulurnye. ²⁶ Upa iyelah juga dengan nyo kedua, nyo ketiga, sampoi nyo ketujuh. ²⁷ Aher deri segelonye, betina iye jugo teelek. ²⁸ Tekalo hari kebangketon, betina iye menjedi bini siape deri ketujuh bedulur iye? Sabab, mike segelo la mengawininye." ²⁹ Cuma hambuk, Yesus nyimbot ngan buik kenempat mike," Mike tesosot, hopi tereti Kitab Suci ataupun kuaso Allah. ³⁰ Sabab, tekalo hari kebangketon, mike hopi kawin atau pun dekawini, cuma upa malaikat-malaikat de serga. ³¹ Hambuk, mengenai kebangketon urang-urang teelek, bolumkah kowe membeco apa nyo dekehatoko ngan kowe uleh Allah, ³² ' Akelah Allah Abraham, Allah Ishak, ngan Allah Yakub'? Enye bukon Allah urang nyo teelek, meloinko Allah urang nyo hidup." ³³ Tekalo urang lobot mendongor hal iye, mike temanga-manga terhadop pengajoron-Nye. ³⁴ Cuma tekalo urang-urang Farisi mendongor bahwa Yesus lah membuat urang-urang Saduki tediom, bekumpullah mike. ³⁵ Mengka, sikuk deri mike, seurang ahli hukum Torat, betanyo kenempat Yesus untuk menguji-Nye, ³⁶ " Guru, perentah monekah nyo terpenteng delom hukum Torat?" ³⁷ Ngan, Yesus buik nga enye," Kowe harus mengasehi Tuhan Allahme dengan segenap hatime, ngan dengan segenap jiwome, ngan dengan segenap pekeronme. ³⁸ Nie adolah perentah nyo sajo godong ngan nyo pertamo. ³⁹ Nyo kedua adolah upa nie," Kowe harus mengasehi sesamome upa badanme dewek.' ⁴⁰ Delom kedua perentah nie, tergentung segelo Hukum Torat ngan kitab padong nabi." ⁴¹ Kinie, sementaro urang-urang Farisi bekumpul besamo, Yesus betanyo kenempat mike, ⁴² " Upamone pendepotme tentang Kristus? Anak siapekah Enye?" MIke bekehato kepaodo-Nye, "Anak Daud." ⁴³ Enye bekehato kenempat mike,"Munye upa iye, upamonelah Daud, delom Roh, memantou-Nye' Tuan', ujonye, ⁴⁴ ' Tuhan berfirman kenempat Tuanke, " Duduklah de sebelah kanon-Ke, Sampoi Ake menempatko musuh-musuh-Me de bewoh kaki-Me.'? ⁴⁵ Munye Daud memantou Kristus upa 'Tuan', upamone mungkin Enye adolah anak Daud?" ⁴⁶ Hopi seurangpun nyo depot menjawob sikuk kehato pun ngan Enye. Ngan, sejak ari iye, hopi ado urang nyo berani menayoko pertanyoon-pertanyoon lagi ngan Enye.