( Yesus Desambut Upa Seurang Rajo ) ¹ Tekalo mike sodah parok ngan Yerusalem ngan sodah sampoi de Betfage, de buket Zaitun, Yesus mengutus dua urang murid-Nye; ² Ujo-Nye ngan mike," pogilah kedesa nyo ado de depanme, ngan kowe bakal langsung menomuko seikuk anak keledai besamonye. Rombakilah kobotan mike ngan undalah keduanye kenempat Ake. ³ Munye ado urang nyo ngehatoko sesuatu ngan kowe, kowe harus buik,' Tuhan memerlukonye,' ngan Enye bakal segera ngiremkonnye." ⁴ Hal nie terjedi enggak konyo tegenapi ape nyo de kehatoko ule nabi: ⁵ " Kehatoko ngan betina Sion,' kolekolah, Rajome njongok ngan kowe, rendah hati, ngan noek seikuk keledai, ngan seikuk keledai muda, anak deri keledai bobon. ⁶ Murid-murid bejelon ngan melakuko upa nyo sodah Yesus perentahko ngan mike. ⁷ Mike ngunda keledai sereta anak keledai iye, ngan memotekko jubah-jubah mike de pucuk keledai-keledai iye, ngan Yesus duduk de pucuknye. ⁸ Sebagion godong deri urang lobot iye mengamporko jubah-jubah mike de jelon, ngan nyo loinnye menotok ranteng-ranteng betong, mengka memotekkonye de jelon. ⁹ Lobot urang bejelon de depan-Nye ngan mike nyo mehalou-Nye beseru, " Hosana bagi Anak Daud ! ' Deberkatilah Enye nyo njongok delom namo Tuhan.' Hosana de nempat nyo maha tinggi!" ¹⁰ Tekalo Yesus memasuki Yerusalem, seluruh kota degemparko. Mike betanyo," siape nyo nie?" ¹¹ Ngan, urang lobot iye nyimbot," Enye adolah Nabi Yesus, deri Nazaret de Galilea." ¹² Mengka Yesus masuk ke Bait Allah ngan mengusir urang-urang nyo sedang bejuol bebeli de Bait Allah, mengka membalek geledekko meja-meja penukoron duit ngan bangku-bangku mike nyo menjuol burung-burung merpati. ¹³ Enye buik ngan mike," Lah tetulis, ' Rumah-Ke bakal de sobut rumah doa,' cuma kowe menjedikonnye upa sangkor padong perampok." ¹⁴ Ngan, urang nyo buta serta nyo lumpuh njongok kepodo-Nye de Bait Allah, mengka Enye menyembuhko mike. ¹⁵ Hambuk, tekalo padong imam kepalo ngan ahli-ahli Torat ngoleh mujizat-mujizat nyo sodah delakuko Yesus ngan ngoleh anak-anak nyo beseru delom Bait Allah, " Hosana bag Anak Daud," mike menjedi marah." ¹⁶ Mengka, mike betanyo ngan Yesus," mengka kowe ndongornyo de kehatoko anak-anak nie?" ¹⁷ Mengka, Yesus meninggalko mike ngan keluor deri kota iye ke Betania ngan bemalom de sane. ¹⁸ Kinie, tekalo ari pagi, tekalo Yesus belek ke kota, Enye menjedi lapor. ¹⁹ Ngan, tekalo ngoleh betong ara de pengger jelon, Enye njongok ngan hopi ado apo-apo, kecuali doun-doun bae. Ngan, Nye buik kenempat betong iye,' hopi bakal pernah ado buah lagi deri kowe sampoi selamo-lamonye!" saat iye jugo, betong ara iye dejedikon koreng. ²⁰ Tekalo murid-murid ngoleh tong nie, padong murid temanga-manga ngan betanyo," upamon betong ara iye koreng seketiko iye jugo?" ²¹ Ngan, Yesus nyimboti mike," Sebonornyo Ake buik ngan kowe, munye kowe ado iman ngan hopi bimbang, kowe bukon anyo nak melakuko ape nyo delakuko terhadop betong ara nie, malahon munye kowe buik ngan gunong nie, ' Teangketlah ngan tecampoklah ke delom lout,' tong nie nak terjedi. ²² Ngan, segelo sesuatu nyo kou pintak delom doa, pecayolah, kowe bakal menerimonye." ²³ Tekalo Yesus masuk ke Bait Allah, padong imam kepala ngan padong tua-tua bengso Yahudi njongok kenempat Enye sementaro Enye sedang mengajor ngan betanyo," Dengan kuaso apolah Kowe melakuko hal-hal nie? Ngan, siapolah nyo membori-Me kuaso nie?" ²⁴ Yesus nyimboti mike," Ake jugo nak menayako sikuk hal ngan kowe, nyo munye kowe pacok menjawabnye, Ake jugo nak memboritahuko dengan kuaso ape Ake melakuko segelo tong nie. ²⁵ Deri mone baptison Yohanes? deri serga atau deri mendesio?" Ngan, mike mulai ngengomong konye de antaro mike dewek, ujonye," Munye kite buik, deri Serga,' Enye nak buik, ' Munye upa iye, mengka kowe hopi pecayo ngan Yohanes?' ²⁶ Cuma hambuk. munye kite menjawob,'Berasol deri mendesio.' Kite takut ngan urang lobot ulenyo mike segelo menganggap bahwa Yohanes adolah nabi." ²⁷ Mengka mike nyimboti Yesus,' Kamie hopi tahuko."Ngan, Yesus buik, " Munye mumunye, Ake jugo hopi nak menelako ngan kowe dengan kuaso apolah Ake melakuko hal-hal nie." ²⁸ " Hambuk, ape pendepotme? Ado urang nyo mempunyoi dua anak jenton, ngan enye njongok kenempat nyo pertamo ngan buik," anakke, pogilah ngan begawelah ari nie de kebon anggur.' ²⁹ Ngan, enye menjawob, ' Ao,Bepak,' hambuk sodah iye enye hopi bejelon. ³⁰ Mengka bepak iye njongok kenempat nyo kedua ngan ngehatoko nyo samo. Anak iye menjawob,'hopi endok,'hambuk enye menyosol ngan bejelon. ³¹ Siapolah deri kedua nak iye nyo mematuhi bepaknye?" Mike buik," Nyo teaher." Yesus bekehato kepodo mike, "Sesungguhnye, Ake mengatako kepodome bahwa padong pengumpul pajak ngan pelacur-pelacur nak masuk Kerajaon Allah mendehului kowe. ³² Sabab, Yohanes njongok kenempat kowe delom jelon kebonoron ngan kowe hopi mempercayoinye, hambuk, padong pengumpul pajak ngan pelacur-pelacur mempercayoinye. Ngan, kowe tekalo ngoleh tong nie bukon idok hopi nyosol sodah iye shingga kowe depot mempercayoinye." ³³ " Dongorkolah perumpamoon nyo loin. Ado pemilik kebon nyo tanduri sebuah kebon anggur, ngan memasong kandong bekeliling, ngan menggali tapon pemerahon anggur, ngan menogokko menara. Mengka, enye menyatarko kebon anggurnye kenempat beberape petani, ngan enye bejelon keluor negeri. ³⁴ Tekalo musim buah la nak sampoi, enye mengutus hambo-hambonye kenempat petani-petani iye enggak konyo menerimo buahnye. ³⁵ Ngan, padong petani menangkop padong pelayan iye ngan mengepuknyo sorang, ngan membunuh nyo sikuk, ngan nyo loinnye de petohukko ngan betu. ³⁶ Sekali lagi,pemilik kebon iye menyuruh hambo-hambonye nyo loin, nyo lobih lobot deripado sebolumnye. Ngan, padong petani iye melakuko hal nyo samo terhadop mike. ³⁷ Ahernye, pemilik kebon iye mengutus anaknye kenempat mike, ujonye,' mike nak menghormati anakke.' ³⁸ Cuma hambuk, tekalo padong petani iye ngoleh anaknye, mike buik deantaro mike dewek, ' Enye adolah ahli waris, maro kite bunoh enye ngan merampos warisannye.' ³⁹ Mengka, mike menangkop anak pemilik kebon iye, melemparkonnye ke luor kebon anggur, ngan membunohnye. ⁴⁰ Ulenyo iye, tekalo pemilik kebon anggur iye njongok, ape nyo nak enye lakuko kenempat petani-petani iye?" ⁴¹ Mike buik kenempat Nnye,"Nye nak membinasoko urang-urang jahat iye ngan sajo jahat, ngan nak menyatarko kebon anggur nye kenempat petani-petani nyo loin, nyo nak menyerahko kenempat nye buah-buag singgo musimnyo." ⁴² Yesus buik ngan mike," Ibo kowe hopi perenah membeco delom Kitab Suci: ' Betu nyo decampok uleh tukang-tukang bengunon la menjedi betu penjuru. Hal nie terjedi deri pihak Tuhan, ngan hal nie ajaib de mato kite'? ⁴³ Ulenyo iye, Ake bekehato ngan kowe, Kerajaon Allah nak deambek derime ngan nak deboriko kenempat urang-urang nyo menghasilko buah derinye. ⁴⁴ Ngan, siape nyo titek ke pucuk betu nie nak depecahko bekepeng-kepeng; ngan siape pun nyo detempa betu nie nak remuk." ⁴⁵ Tekalo imam-imam kepala ngan urang-urang Farisi mendongor perumpamoon-perumpamoon-Nye, mike tereti bahwa Yesus sedang ngomong tentang mike. ⁴⁶ Cuma hambuk, tekalo mike berusaha nak menangkop Yesus, mike takut ngan urang lobot ulenyo urang lobot iye menganggap bahwa Yesus adolah nabi.