¹ Tekalo Yesus sodah memboriko perentah dengan kedua belas murid-Nye, Nye bejelon deri sane untuk mengajor ngan bekutbah de kota-kota enye. (Yesus Ngan Yohanes Pembabtis) ² Kinie, tekalo Yohanes, ado de penjara, mendongor pekerjaon-pekerjaon Kristus, enye mengerem poson melalui murid-muridnye, ³ ngan betanyo kepodo-Nye," mengka Kowe nak njongok iye, atau haruskah kamie menunggu nyo loinnye ?" ⁴ Yesus menjawab ngan bekehato dengan enye, "Bejelon ngan tetelakolah dengan Yohanes ape nyo kou dongor ngan koleh, ⁵ nyo buta mengoleh, nyo lumpuh bejelon, nyo saket kusta debeikko, nyo pokok mendongor, nyo teelek dehidupko, ngan kenempat nyo miskin deberitako Injil. ⁶ Ngan, deberkatilah urang nyo hopi tesihan uleh-Ke." ⁷ Ngan, setelah enye bejelon, Yesus mulai buik ngan urang lobot tentang Yohanes, " Ape nyo amat kou koleh de padang belantara? Sebetong buluh nyo de goyang angin? ⁸ Kowe bejelon untuk ngoleh ape? Seurang nyo bepakaiyon halus? Mike nyo bepakaiyon halus iye ado de istana-istana rajo. ⁹ Untuk mengoleh ape kowe pergi ? seurang nabi ? nyo, Ake ngehatoko ngan kowe, enye bukon lobih godong jak deri seurang nabi. ¹⁰ Sabab, de delom urang nyo tentang enye lah tertules : ' Koleh ! Ake mengerem utuson-Ke mendehului-Me. Nye nak mempersiapko jelon bagi-Me de hadapon-Me. ¹¹ Ake ngehatoko nyo sebonornye ngan kowe, de antaro mike nyo de adoko uleh betina, hopi perenah tampil urang nyo lobih godong jak deri Yohanes Pembaptis. Hambuk cuma, nyo paleng kecik delom Kerajaon Serga, sajo godong deri enye. ¹² Sejak zaman Yohanes Pembaptis sehingga kinie, Kerajaon Serga menderito kekarason, ngan urang-urang nyo kejam iye melakuko dengan pakso. ¹³ Sabab, segelo nabi ngan Hukum Torat bernubuat sampoi zaman Yohanes. ¹⁴ Ngan, munye kowe endok menerimonye, enyelah Elia nyo nak njongok iye. ¹⁵ Siape nyo mempunyoi telingo untuk mendongor, hendaklah enye mendongorko ! ¹⁶ Cuma, dengan ape nak Kubandengko generasi nie ? Mike upa anak-anak kecik nyo duduk de nempat-nempat umum, nyo memantaou kanti-kantinye, ¹⁷ ngan bekehato, ' Kamie meniupko suling untukme, cuma kowe hopi menari. Kamie menyanyiko lagu dukacita, cuma kowe hopi berduka.' ¹⁸ Ulenyo Yohanes njongok hopi makon, jugo hopi minom, ngan enye bekehato," Nye kerasukon roh jahat." ¹⁹ Cuma hambok, tekalo Anak Mendesio njongok mengka makon ngan minom, ngan enye bekehato," Koleko, seurang nyo rakus ngan pemabuk, kanti para pengumpol pajak ngan urang-urang bedoso." Cuma hambuk, hikmat de bonorko uleh perbuatonnye." (Peringoton untuk Urang nyo Hopi Pindok Pecayo) ²⁰ Mengka Yesus mulai menghimak kota-kota d nempat Nye melakuko sajo lobot mujizat ulenyo enye hopi betobat. ²¹ " Celakolah kowe, Khorazim! Celakolah kou, Betsaida ! Sabab, munye mujizat-mujizat nyo lah terjedi de antaro kowe jugo terjedi de Tirus ngan Sidon, mike sodah lamo betobat ngan bepakoian kabung ngan abu. ²² Cuma hambok, Ake ngehatoko ngan kowe bahwa podo ari penghakimon, Tirus ngan Sidon nak lobih pacok menanggung nye deri podo kowe. ²³ Ngan, kowe, Kapernaum, angkukkah kowe de tinggiko sampoi kelanget ? hopi, kowe nak de turunko ke denia urang teelek, sabab munye mujizat-mujizat terjedi de antaro kowe iye terjedi de Sodom, kota iye nak tetap sampoi sari nie. ²⁴ Cuma hambuk, Ake ngehatoko ngan kowe bahwa singgo ari pnghakimon, tanoh Sodom nak sajo pacok menanggung nye jak kepado kowe. (Kelegaan bagi urang nyo detong kepodo Yesus) ²⁵ Tekalo waktu iye Yesus buik," Ake memuliako Kowe, Bepak, Tuhan pucuk langet ngan behumi, bahwa Kowe mengerawoko segelo nie jak urang-urang nyo bijaksana ngan calak, ngan mengungkap konye kenempat anak-anak kecik. ²⁶ Ao, Bepak, ulenyo upa iyelah nyo berkenan de hadopon-Me. ²⁷ Segelo sesuatu la deserahko kenempat Ake ulenyo Bepak-Ke. Ngan, hopi seurangpun mengenal Anak, seloin Bepak; hopi seurangpun mengenal Bepak seloin Anak ngan setiap urang nyo dekehendaki Sang Anak untuk mengungkapkonye. ²⁸ Njongoklah kepodo-Ke, segelo nyo litak lesu ngan bebobon berat, ngan Ake nak memboriko kelegaon. ²⁹ Pikullah kuk nyo Kepasongko, ngan belajorlah deri-Ke ulenyo Ake lamah lombut ngan rendah hati, ngan kowe nak mendepotko ketenangan delom jiwome. ³⁰ Sabab, kuk nyo Kupasongko iye mudah ngan bobon-Ke rehan."