(Yesus Mengutus Murid-Murid-Nye) ¹ Ngan, Yesus memantau kedua belas murid-Nye ngan membori enye kuaso pucuk roh-roh najis untuk menggerah roh-roh iye ngan untuk menyembuhko segelo macam penyaket maupun segelo macam kesaketon. ² Nielah namo-namo kedua belas rosul iye : Nyo pertamo, Simon nyo desebut Petrus, ngan Andreas dulurnye, ngan Yakobus anak Zebedeus, ngan Yohanes dulurnye, ³ Filipus, ngan Bartolomeus, Tomas, ngan Matius sepengumpul pajak, Yakobus anak Alfeus, ngan Tadeus, ⁴ Simon urang Zelot, ngan Yudas Iskariot tong menghianati Yesus. ⁵ Yesus mengutus kedua belas rosul iye ngan memerentahko enye, " Jengon bejelon ke jelon bengso-bengso loin atau masuk kedelom kota urang Samaria. ⁶ meloinko bejelonlah kenempat domba-domba nyo tesesat deri antaro umat Israel. ⁷ Ngan, kowe bejelon, beritakolah dengan bekehato, " Kerajaon Serga sodah parok." ⁸ Sembuhkolah nyo saket, hidupkolah nyo teelek, tahirkolah nyo kusta, ngan usirlah roh-roh jahat. Kowe menerimo dengan cuma-cuama, borikolah dengan cuma-cuma. ⁹ Jengon kowe ngunda emas, atau perak, atau tembaga delom pengobot pinggangme, ¹⁰ atau tas untuk bejelon, atau dua helai beju, atau sandal, atau tungkat sabab seurang pekerejo pantas untuk makononnye. ¹¹ Ngan, de kota atau desa mone pun nyo kou masuki, selidikilah siape nyo layak de delomnye ngan tinggallah de sane sampoi kowe bejelon. ¹² Tekaloh kowe memasuki rumah iye, borikolah salam. ¹³ Ngan, munye rumah iye layak, biarlah damai sejahterame turun pucuknye, cuma munye hopi, biarlah damai sejahterame, belek ngan kowe. ¹⁴ Ngan , siape sajo nyo hopi nerimo kowe atau hopi endok ndongor pembuikonme, tekalo kowe keluor dri rumah atau kota iye, kebaskolah debu kakime. ¹⁵ Ake mengehatoko nyo sebonornye ngan kowe bahwa tekalo hari penghakimon, tanoh Sodom ngan Gomora nak lobih pacok menanggungnye diri pado kota iye. ¹⁶ "Koleh, Ake nak ngutus kowe upa domba ke tangah-tangah serigala. Ulenyo iye, jedilah cerdik upa ulor ngan tulus upa burung-burung merpati. ¹⁷ Cuma hambuk behati-hatilah terhadop urang-urang ulenyo enye nak menyerahko kowe kenempat Sanhedrin ngan nak mencambuk kowe de sinagoge-sinagoge enye. ¹⁸ Ngan, kowe nak nyo unda ke hadopon para penguaso ngan para rajo demi Ake, sebagoi kesaksion untuk enye ngan untuk bengeso-bengeso loin. ¹⁹ Cuma, tekalo enye menyerahko kowe, jengon kuatir tentang upamone atau ape nyo kou kehatoko ulenyo tekalo iye jugo nak deboriko ngan kowe ape nyo harus kou kehatoko. ²⁰ Sabab, bukon kou nyo buik-eh, cuma iye adolah Roh Bepakme nyo buik de delom kowe. ²¹ Dulur nak menyerahko dulurnye kenempat kemation, ngan bepak terhadop anaknye. Ngan, anak-anak nak melawon para urang rayo ngan membunoh enye. ²² Kowe nak de benci uleh segelonye ulenyo namo-Ke, cuma urang nyo betahan sampoi aher nak deselamatko. ²³ Tekalo enye menganiaya kowe delom satu kota, larilah ke kota nyo loin. Ake mengehatoko nyo sebonornye dengan kowe ulenyo kowe hopi nak sodah melewati kota-kota Israel sampoi Anak Mendesio njongok ²⁴ Murid hopi melobihi gurunye, upa iyelah juga hambo hopi melobihi tuannye. ²⁵ Cukuplah munye murid menjedi upa gurunye, ngan hambo menjedi upa tuannye. Munye enye menyobut tuan rumah iye Beelzebul, sajo buruk lagi kenempat anggota keluargonye. ²⁶ "Ulenyo iye, jengon kowe takut terhadop enye sabab hopi ado apepun nyo tetutup nyo hopi nak deungkap, atau nyo tekerawo nyo hopi nak deketahui. ²⁷ Ape nyo Aku kehatoko ngan kowe delom kekolomon, kehatokolah iye delom tarang. Ngan, ape nyo kou dongor debesikko de telingame, tetelakolah de pucuk hatop rumah. ²⁸ Jengon takut ngan enye nyo membunoh badan, cuma hopi depot membunoh jiwa, meloinkoh telobih takutlah ngan Enye nyo depot memunahko jiwo atau badan de nderako. ²⁹ Bukonkah dua ikok burung pipet dejual untuk sikok duit? Ngan, hopi ado seikuk pun deri enye nan titek ke tanoh de luor kendok Bepakme. ³⁰ Malahon, rambut kepalome segelonye depot de bilang. ³¹ Ulenyo iye, jengon takut kowe lobih benilai deripado lobot burung pipet." ³² "Jedi, setiap urang nyo mengakui Ake de hadapan mendesio, Ake jugo nak mengakuinye de hadapon Bepak-Ke nyo ado de serga. ³³ Cuma sebeleknye, siape nyo menyangkal Ake de hadapon mendesio, Ake jugo nak menyangkal de hadapon Bepak-Ke nyo ado de serga. ³⁴ "Jengon bepeker bahwa Ake njongok untuk ngunda perdamaion de bumi. Ake njongok bukon untuk ngunda perdamaion meloinko pedang. ³⁵ Sabab, Ake njongok untuk memisahko jenton deri bepaknye, anak betina dri induknye, menantu betina deri induk mentuhanye, ³⁶ ngan musuh seseurang adolah deri anggota keluargonye. ³⁷ Siape nyo lobih mengasehi bepak atau induknye dri pado Ake, hopi layak bagi-Ke. Ngan siape nyo lobih mengasehi anak jenton atau anak betina deripado Ake, hopi layak bagi-Ke. ³⁸ Ngan, siape nyo hopi memikul salibnye ngan mehalau Ake, hopi layak bagi-Ke. ³⁹ Siape nyo mempertahanko nyawonye nak kesayauon nyawonye, ngan siape nyo kesayauon nyawonye demi Ake nak mendepotkonye." ⁴⁰ "Siape nyo menerimo kowe menerimo Ake. Ngan, siape nyo menerimo Ake menerimo Enye nyo mengutus Ake. ⁴¹ Siape nyo menerimo nabi delom namo nabi nak menerimo upah nabi. Ngan, siape nyo menerimo urang bonor nak menerimo upah urang bonor. ⁴² Ngan, siape nyo membori minom dengan saloh sikok deri urang-urang nyo kecik nie bego anyo secangkir aik dingen delom namo seurang murid, Ake ngehatoko nyo sebonornye ngan kowe, enye hopi nak kesayauon upahnye."