¹ Pado hari pertamo minggu iye, Maria Magdalena pogi ke kubur Yesus sajo pagi sekali, tekalo hari lage kolom, ngan ngoleh betu penukup kubur lah de geser deri kubur iye. ² Mengka, enye belari ngan menomui Simon Petrus ngan murid nyo loin nyo de kasehi Yesus, ngan buik kenempat mike, " Mike lah mengambek Tuhan deri kubur, ngan kamie hopi tahuko de mone mike memotekko-Nye." ³ Mengka, Petrus ngan murid nyo loin iye pogi ke kubur. ⁴ Keduanye belari serompok, hambuk murid nyo loin iye belari lobeh gasep deripado Petrus singgo enye sampoi lobeh dehulu ke kuburon. ⁵ Enye menenggak ngan ngoleh ke delom, ngan ngoleh koin linen pembungkus buntang Yesus tepotek de sane, cuma enye hopi masuk kedelom. ⁶ Kemudion, Simon Petrus njongok, menutul enye, ngan masuk ke kuburon ngan enye ngoleh koin linen pembungkus tepotek de sane. ⁷ Ngan, koin penukup wajah nyo membelut kepalo Yesus hopi tepotek serompok koin linen pembungkus tadie, hambuk sodah tegulung de tempat nyo bebeda. ⁸ Kemudion, murid nyo loin tadie, nyo lobeh dehulu sampoi ke kuburon, jugo masuk. Enye ngoleh ngan pecayo. ⁹ Sabab, sebolum kejedion iye, mike bolum tereti Kitab Suci, behwo Yesus harus bangket belek deri te'elek. ( Yesus Menampokko Badan Kenempat Maria Magdalena) ¹⁰ Jedi, kedua murid iye belek ke rumah. ¹¹ Cuma hambuk, Maria togok de luor kuburon ngan meratop. Sambel meratop, enye menenggak ke delom kuburon iye, ¹² Ngan enye ngoleh dua malaikat bepakoyon puteh sedang duduk de tempat buntang Yesus de berengko sebolumnye. Nyo sikuk duduk de bagion kepalo ngan sikuknye de bagion kaki. ¹³ Kedua malaikat iye betanyo kenempat Maria, " Betina, mengka kowe meratop?" ¹⁴ Sesodah ngehatoko upanio, Maria menenggak ke belakong ngan ngoleh Yesus togok de sie, hambuk hopi tahuko munye iye adolah Yesus. ¹⁵ Yesus betanyo kenempatnye, " Betina, mengka kowe meratop? Ibo nyo kowe dalak?" ulehnyo mengiro enye adolah penjego taman, Maria buik kenempat-Nye," Tuan, munye Tuan lah memindahko-Nye, boritahulah ake de mone Tuan lah memoteko-Nye, ngan ake bakal mengambek-Nye." ¹⁶ Yesus buik kenempat-Nye," Maria pun bepaleng ngan buik kenempat-Nye delom bahasa Ibrani," Rabuni"nyo retinye "Guru". ¹⁷ Yesus buik kenempatnye," Jengonlah kowe memogong Ake ulehnyo Ake bolum pogi kenempat Bepak. Cuma hambuk, pogilah kenempat dulur-dulur-Ke ngan kehatoko kenempat mike, ' Ake bakal pogi kenempat Bepak-Ke ngan Bepakme, kenempat Allah-Ke ngan Allahme." ¹⁸ Maria Magdalena pogi ngan memboritahu murid-murid, " Ake lah ngoleh Tuhan," ngan behwo Yesuslah nyo lah ngehatoko hal -hal nie kenempatnye. ¹⁹ Tekalo hari iye sodah malom, yaitu hari pertamo delom minggu iye, ngan pintu-pintu tempat padong murid bekumpul tetutup ulehnyo mike takut kenempat urang-urang Yahudi, Yesus njongok ngan togok de tangah-tangah mike sereta buik, " Damai sejahtera bage mike!" ²⁰ Sesodah ngehatoko upanio, Yesus menunjukko tangon ngan porut-Nye kenempat mike. Padong murid sajo besukacita tekalo mike ngoleh Tuhan. ²¹ Kemudion, Yesus buik kenempat mike lage," Damai sejahtera bage kowe. Samo upa Bepak lah mengutos Ake, upanio jugo kinie Ake mengutos Kowe." ²² Ngan lah Enye ngehatoko upanio, Yesus menghembusi mike ngan buik," Terimolah Roh Kudus! ²³ Munye kowe mengampuni doso seseurang, mengka doso urang iye de ampuni. Munye ado urang nyo doso-dosonye hopi kowe ampuni, mengka doso mike hopi de ampuni." ²⁴ Tomas, saloh seurang deri ke -12 murid, nyo de sobut Didimus, hopi ado serompok mike tekalo Yesus njongok. ²⁵ Mengka, murid-murid nyo loin memboritahuko enye," Kamie lah ngoleh Tuhan." Cuma, Tomas buik kenempat mike, " Hambuk ake ngoleh bekas paku pado tangon-Nye ngan memasukko jarike ke delom bekas paku iye, sereta memasukko tangonke ke delom porut-Nye, ake hopi bakal pecayo." ²⁶ Delapan hari kemudion, murid-murid belek bekumpul de rumah iye, ngan Tomas ado serompok mike. Hambuk pintu-pintu tetutup, Yesus njongok ngan togok de tangah-tangah mike sereta buik," Damai sejahtera bage kowe!" ²⁷ Kemudion, Enye buik kenempat Tomas," Julukkolah jarime de sie ngan kolehlah tangon-Ke; ngan julukkolah tangonme ke sie ngan potekkolah de porut-Ke. Jengon hopi pecayo hambuk pecayolah!" ²⁸ Tomas nyimboti Yesus," Ao, Tuhanke ngan Allahke!" ²⁹ Yesus buik kenempatnye," Ibo kowe kinie pecayo ulehnyo kowe lah ngoleh Ake? De berkatilah mike nyo hopi ngoleh, hambuk pecayo." ³⁰ Lage lobot tando ajaib loin nyo de lakuko Yesus de depan murid-murid-Nye, nyo hopi tetules delom kitab nie. ³¹ Cuma hambuk, segelo nie de tules enggakkonyo kowe pecayo behwo Yesus adolah Kristus, Anak Allah, ngan enggakkonyo melalui kepecayoanme iye, kowe memperuleh hidop de delom namo-Nye.