¹ Pilatus mengambek Yesus ngan memerentahko enggakkonyo Yesus de sesah. ² Padong prajurit menganyam sebuah mahkota deri ranteng-ranteng beunok ngan memakoikonye ke kepalo Yesus, ngan memakoiko jubah ungu kenempat-Nye. ³ Mike maju memaroko Yesus ngan buik," Salam, hai Rajo urang Yahudi! Mengka, mike menabok muka-Nye. ⁴ Pilatus keluor lage ngan buik kenempat mike, " Kolehko! Ake bakal mengunda Yesus ke luor kenempatme enggakkonyo kowe tahuko behwo ake hopi menomuko kesalahon ape pun pado-Nye." ⁵ Mengka, Yesus keluor dengan memakoi mahkota unok ngan jubah ungu. Pilatus buik kenempat mike, " Kolehko Enye!" ⁶ Tekalo imam-imam kepalo ngan padong prajurit ngoleh Yesus, mike mekek, " Salibko Enye, salibko Enye!" ⁷ Urang-urang Yahudi iye nyimboti Pilatus," kamie mempuyoi hukom, ngan menurut hukom iye, Enye harus te'elek ulehnyo Enye menganggap badan-Nye adolah Anak Allah." ⁸ Tekalo Pilatus mendongor pembuikkon iye, enye semaken takut ⁹ Ngan masuk belek ke gedung pengadilon, ngan buik kenempat Yesus," Deri monekah asol-Me?" Cuma hambuk, Yesus Hopi nyimbotinye. ¹⁰ Pilatus buik kenempat-Nye," Kowe hopi endok buik denganke? Ibo Kowe hopi tahuko behwi ake memilikih kuaso untok membebasko-Me ngan memilikih kuaso untok menyalibko-Me?" ¹¹ Yesus nyimboti," Kowe hopi memilikih kuaso apa pun pucuk badan-Ke, hambuk kuaso iye de boriko kenempatme deri pucuk. Iyelah sababnye, urang nyo menyerahko Ake kenempatme lobeh godong dosonye." ¹² Lah mendongor hal iye, Pilatus beusaha untok membebasko Yesus, hambuk urang-urang Yahudi mekek," munye kowe membebasko Urang nie, kowe bukonlah kanti Kaisar; setiap urang nyo menganggap badannye rajo bearti melawon Kaisar." ¹³ Tekalo Pilatus mendongor kehato iye, enye mengunda Yesus keluor, ngan duduk de kersi pengadilon, de suatu tempat benamo Litostrotos, hambuk delom bahaso Ibrani de sobut Gabata. ¹⁴ Hari iye merupakan hari persiapon untok paskah, tekalo iye sekitar jam keenam. Pilatus buik kenempat urang-urang Yahudi," Nielah Rajome!" ¹⁵ Mengka, mike mekek, " Sayauko Enye! Sayauko Enye! Salibko Enye!" ¹⁶ Ahernye, Pilatus menyerahko Yesus kenempat mike untok de salibko. ¹⁷ Yesus keluor dengan memanggul salib-Nye dewek menuju ke tempat nyo benamo" Tempat tengkorak", nyo delom bahaso Ibrani de sobut " Golgota". ¹⁸ De sane, mike menyalibko Yesus serompok dengan duo urang loin, nyo de salibko de kanon ngan de kiri Yesus, Tekalo Yesus berado de tangah. ¹⁹ Pilatus jugo menules sebuah tuleson ngan memotekkonye de pucuk kayu salib. Tuleson iye bebuik, " YESUS URANG NAZARET, RAJO URANG YAHUDI." ²⁰ Lobot urang Yahudi membeco tuleson iye ulehnyo tempat Yesus de salibko iye berado de parok kota, ngan tuleson iye de tules delom bahasa Ibrani, Latin, ngan Yunani. ²¹ Mengka, imam-imam kepalo urang Yahudi buik kenempat Pilatus, " Jengon tules,' Rajo urang Yahudi,' hambuk tuleslah urang nie buik,' Akelah Rajo urang Yahudi." ²² Jawob Pilatus," Ape nyo sodah ake tules, bakal tetap tetules!" ²³ Padong prajurit, tekalo mike lah menyalibko Yesus, mengambek pakoiyon-Nye ngan membagenye menjedi empat, sikuk bageon untok maseng-maseng prajurit, jugo jubah-Nye; jubah iye hopi ado kelimnye, hanyo de tenun deri pucuk ke bewoh hopi ado jahiton. ²⁴ Padong prajurit iye buik seurang kenempat nyo loin," jengonlah kite merobeknye, meloinko mencampok undi pucuknye untok memutusko siape nyo bakal mendepotkonye." Hal nie terjedi enggakkonyo genaplah nyo lah tetules delom Kitab Suci: " Mike membage-bage pakoiyon-Ke de antaro mike ngan untok jubah-Ke, mike mencampok undi." ²⁵ Tekalo iye, induk Yesus, dulur betina induk Yesus, Maria bini Klopas, ngan Maria Magdalena, togok de parok salib-Nye. ²⁶ Tekalo Yesus ngoleh induk-Nye ngan murid nyo Enye kasehi togok de sane, Enye buik kenempat induk-Nye," Betina, kolehlah, nie anakme!" ²⁷ Mengka, Yesus buik kenempat murid nyo de kesehi-Nye iye," Nielah indukme!" Jak iye, murid iye menerimo induk Yesus tinggal de rumahnye. ²⁸ Lah iye, Yesus, nyo tahuko behwo segelonye sodah telaksana, untok menggenapi Kitab Suci, Enye buik, " Ake raus !" ²⁹ De sie ado sebuah bejana ponuh anggur mason. Ulehnyo iye, mike menancapko bunga karang nyo lah de celupko ke delom anggur masom pado sebetong hisop ngan memborikonye ke mulut Yesus. ³⁰ Lah mengicap anggur masom iye, Yesus buik," Sodah selesai." Kemudion, Enye menundukko kepalo-Nye ngan menyerahko nyawo-Nye. ³¹ Ulehnyo hari iye adolah hari persiapon, ngan enggakkonyo buntang-buntang iye hopi tetap berado de kayu salib pado hari Sabat, sabab Sabat adolah hari godong, urang-urang Yahudi memintak kenempat Pilatus enggakkonyo kaki urang -urang nyo de salib iye de patahko ngan buntang-buntangnye de turunko deri salib. ³² Mengka, padong prajurit njongok ngan mematahko kaki urang nyo pertamo ngan urang nyo loinnye nyo de salibko serompok Yesus. ³³ Cuma hambuk, tekalo mike sampoi kenempat Yesus ngan ngoleh behwo Enye sodah te'elek mike hopi mematohko kaki-Nye. ³⁴ Cuma, saloh seurang prajurit iye menusukko tombaknye ke porut Yesus, ngan tekalo iye jugo, deroh ngan aek mengaler keluor. ³⁵ Urang nyo menyaksiko peristiwa iyelah nyo memboriko kesaksion nie, ngan kesaksionnye bonor ngan enye tahuko munye enye ngehatoko nyo sebonornye, enggakkonyo kowe jugo pecayo. ³⁶ Sabab, segelo nie terjedi enggakkonyo genaplah nyo lah tetules delom kitab Suci :" Pi sikuk pun deri tulang-Nye nyo bakal de patahko." ³⁷ Ngan lage, delom bageon loin Kitab Suci buik," mike bakal mengoleh Enye nyplah mike tikom." ³⁸ Sesodah segelo iye, Yusuf deri Arimatea, nyo jugo menjedi murid Yesus cuma secaro bekerawo ulehnyo takut kenempat urang-urang Yahud, memintak kenempat Pilatus enggakkonyo enye de perbulehko mengambek buntang Yesus; ngan Pilatus mengabulkonye. Jedi, Yusuf deri Arimatea njongok ngan mengambek buntang Yesus. ³⁹ Nikodemus, urang nyo dehulu menomui Yesus pado malom hari, jugo njongok dengan mengunda campuron minyak mur ngan gaharu, nyo beratnye sekitar lima puluh kati. ⁴⁰ Mengka, mike mengambek buntang Yesus ngan membungkusnye dengan koin linen nyo de bori rempah-rempah sesuai adat penguburon urang Yahudi. ⁴¹ De parok tempat Yesus de salibko, terdepot sebuah taman ngan de delom taman iye ado sebuah kuburon beheru nyo pi sikuk buntang pun perenah de potekko de sane. ⁴² Ulehnyo hari iye adolah hari persiapon bage urang Yahudi, ngan letak kuburon iye hopi jouh, mike memotekko buntang Yesus de sane.