¹ " Jengonlah hatime menjedi gelisah; pecayolah kenempat Allah, pecayolah jugo kenempat-Ke. ² De rumah Bepak-Ke ado lobot tempat tinggal; munye hopi upanio, Ake tentu sodah ngehatokonye kenemoatme ulehnyo Ake pogi untok menyediako sebuah tempat bageme. ³ Ngan, munye Ake pogi ngan menyediako sebuah tempat bageme, Ake bakal njongok belek ngan mengundahme kenempat-Ke enggakkonyo de mone Ake berado, kowe pun berado. ⁴ Ngan, kowe tahuko jelon ketempat Ake pogi." ⁵ Mengkah, Tomas buik kenempat-Nye," Tuhan, kamie hopi tahuko ke mone Kowe pogi, upamone kamie tahuko jelon iye?" ⁶ Yesus buik kenempatnye," Akelah jelon, ngan kebonoron, ngan kehidupon. Hopi ado seurang pun nyo njongok kenempat Bepak, munye hopi melalui Ake. ⁷ Munye kowe lah mengenal Ake, kowe jugo lah mengenal Bepak-Ke, mulakih kinie, kowe lah mengenal Bepak ngan lah ngoleh Enye." ⁸ Filipus buik kenempat-Nye," Tuhan, tunjukkolah Bepak iye kenempat kamie, ngan iye sodah cukup bage kamie." ⁹ Yesus nyimboti enye," Filipus, sodah jak lamo Ake serompok kowe, ngan kowe lage bolum mengenal Ake? Barangsiape lah ngoleh Ake, enye lah ngoleh Bepak, upamone kowe pacok buik, ' Tunjukkolah Bepak iye kenempat kamie?' ¹⁰ Ibo kowe hopi pecayo behwo Ake de delom Bepak ngan Bepak de delom Ake? pembuikkon-pembuikkon nyo Ake kehatoko kenempatme, Ake hopi ngehatokonye deri badan-Ke dewek, hambuk Bepak nyo tinggal de delom Akelah nyo melakuko pegawaion-Nye. ¹¹ Pecayolah kenempat-Ke, behwo Ake de delom Bepak ngan Bepak de delom Ake; atau sehopinye, pecayolah ulehnyo pekerejaon-pekerejaon iye dewek. ¹² Dengan sebonornye, Ake ngehatoko kenempatme, setiap urang nyo pecayo kenempat-Ke, pekerejaon-pekerejaon nyo Ake lakuko, enye jugo bakal melakukonye; ngan pekerejaon-pekerejaon nyo lobeh godong deripado segelo nie ulehnyo Ake pogi kenempat Bepak. ¹³ Ape pun nyo kowe mintak delom namo-Ke, iye bakal Ake lakuko enggakkonyo Bepak de muliako de delom Anak. ¹⁴ Munye kowe memintak ape pun kenempat-ke delom namo-Ke, Ake bakal melakukonye. ¹⁵ " Munye kowe mengasehi Ake, kowe bakal menuruti segelo perentah-Ke. ¹⁶ Ake bakal memintak kenempat Bepak, ngan Enye bakal memboriko kenempatme penolong nyo loin, enggakkonyo Enye serompokme selamonye, ¹⁷ Yaitu Roh kebonoron, nyo hopi depot de terimo denia, ulehnyo denia hopi ngoleh Enye atau mengenal Enye; hambuk kowe mengenal Enye ulehnyo Enye tinggal serompokme ngan bakal ado de delomme. ¹⁸ Ake hopi bakal meninggalkome upa yatim piatu; Ake bakal njongok kenempatme. ¹⁹ Hopi lamo lage, denia hopi bakal ngoleh Ake lage, hambuk kowe bakal ngoleh Ake; ulehnyo Ake hidop, kowe pun bakal hidop. ²⁰ Pado hari iye, kowe bakal tahuko behwo Ake de delom Bepak-Ke, ngan kowe de delom Ake, ngan Ake de delom kowe. ²¹ Siape pun nyo memogong perentah-Ke ngan melakukonnye, enye mengasehi Ake; ngan urang nyo mengasehi Ake bakal de kasehi ule Bepak-Ke, ngan Ake mengasehi enye ngan bakal menyatako badan-Ke kenempatnye." ²² Yudas, nyo bukon Iskariot buik kenempat-Nye, " Tuhan, upamone Kowe bakal menyatako badan-Me kenempat kamie ngan bukon kenempat denia?" ²³ Yesus nyimboti ngan buik kenempatnye," Munye seseurang mengasehi Ake, enye bakal menuruti firman-Ke; ngan Bepak-Ke bakal mengasehi enye, ngan kamie bakal njongok kenempatnye ngan tinggal serompoknye. ²⁴ Cuma hambuk, urang nyo hopi mengasehi Ake, hopi menuruti firman-Ke. Ngan, firman nyo kowe dongor iye bukon deri-Ke meloinko deri Bepak nyo mengutos Ake. ²⁵ Segelo hal nie lah Ake kehatoko kenempatme selamo Ake lage serompokme. ²⁶ Cuma hambuk, Penolong iye, yaitu Roh Kudus, nyo bakal Bepak utos delom namo-Ke, Enye bakal mengajarko segelo sesuatu kenempatme, ngan bakal mengingotkome pado segelo nyo lah Kekehatoko kenempatme. ²⁷ Damai sejahtera Ke tingalko serompokme; damai sejatera-Ke Ke boriko kenempatme, bukon upa nyo denia boriko nyo Ake boriko kenempatme. Jengon biarko hatime gelisah ataupun gentar. ²⁸ Kowe lah mendongor behwo Ake buik kenempatme,'Ake bakal pogi, ngan Ake bakal njongok lage kenempatme.' Munye kowe mengasehi Ake, kowe bakal besukacita ulehnyo Ake pogi kenempat Bepak, sabab Bepak lobeh godong deripado Ake. ²⁹ Ake lah memboritahukome kinie sebolum hal iye terjedi enggakkonyo tekalo hal iye terjedi, kowe bakal pecayo. ³⁰ Ake hopi bakal buik lobeh lobot lage denganme ulehnyo penguaso denia nie sedang njongok. Enye hopi bekuaso sediket pun pucuk -Ke. ³¹ Cuma hambuk enggakkonyo denia tahuko behwo Ake mengasehi Bepak, Ake melakuko tepat upa nyo Bepak perentahko kenempat-Ke. Jegolah, maro kite pogi deri sie."