¹ Yesus buik," Dengan sebonornyo, Ake ngehatoko kenempatme, urang nyo masuk ke kandong domba dengan hopi melalui pintu, meloinko dengan memanjat melalui jelon loin, urang iye adolah maleng ngan perampok. ² Cuma hambuk, urang nyo masuk melalui pintu, enye adolah gembala domba. ³ Bagenye, penjego pintu membukakko pintu, ngan domba-domba mendongor suaronye, ngan enye memantou domba-dombanye dewek dengan namo mike, sereta menuntun mike ke lour. ⁴ Lah mengeluorko segelo dombanye, enye bejelon de depan mike ngan domba-dombanye bakal mehilui enye ulehnyo mike mengenal suaronye. ⁵ Urang aseng hopi bakal mike hilui, hambuk mike bakal lari deri padonye ulehnyo mike hopi mengenal suaro urang-urang aseng." ⁶ Perumpamakon iyelah nyo de kehatoko Yesus kenempat mike, hambuk mike hopi tereti ape nyo beheru sajo Yesus kehatoko kenempat mike. ⁷ Uleh sabab iye, Yesus buik lage kenempat mike," Sebonornyo, Ake buik kenempatme, Akelah pintu ke domba-domba iye. ⁸ Segelo urang nyo njongok sebolum Ake adolah maleng ngan perampok, hambuk domba-domba hopi mendongor mike. ⁹ Akelah pintu. Munye seseurang masuk melalui Ake, enye bakal de selamatko, ngan bakal keluor masuk, sereta menomuko padang rumput. ¹⁰ Maleng njongok anyo untok maleng, membunoh, ngan membinasako; Ake njongok enggakkonyo mike memeleki hidop, ngan memelekinye secaro berlimpah. ¹¹ Akelah gembala nyo beik; gembala nyo beik memboriko nyawo-Nye bage domba-domba. ¹² Seurang upahon, bukon seurang gembala, nyo bukon pemilik domba-domba iye, ngoleh serigala njongok, enye meninggalko domba-domba iye ngan lari; serigala iye bakal menerkam ngan mencerai-beraiko domba-domba iye. ¹³ Enye lari ulehnyo seurang upahon ngan hopi peduli pado domba-domba iye. ¹⁴ Akelah gembala nyo beik. Ake mengenal domba-domba-Ke ngan domba-domba-Ke mengenal Ake. ¹⁵ Samo upa Bepak mengenal Ake ngan ake mengenal Bepak; ngan Ake memboriko nyawo-Ke bage domba-domba iye. ¹⁶ Ake jugo mempunyoi domba-domba loin nyo bukon deri kandong nie; Ake harus mengunda mike jugo, ngan mike bakal mendongor suaro-Ke; ngan mike bakal menjedi sikuk kekanti dengan sikuk gembala. ¹⁷ Ulehnyo nielah Bepak mengasehi Ake, sabab Ake memboriko nyawo-Ke enggakkonyo Ake depot mengambeknye belek. ¹⁸ Hopi seurang pun lah mengambeknye deri-Ke, meloinko Akelah nyo memborikonye menurut kehendak-Ke dewek. Ake mempunyoi hak untok memboriko nyawo-Ke, ngan Ake jugo mempunyoi hak untok mengambeknye belek. Nielah perentah nyo Ake terimo deri Bepak-Ke." ¹⁹ Sekali lage, ado perpecahon de antaro urang-urang Yahudi ulehnyo pembuikkon Yesus iye. ²⁰ Lobot deri mike nyo buik," Enye kerasukon roh jahat ngan menjedi gila. Mengka mike mendongorko Enye?" ²¹ Nyo loin buik, " Iye bukon pembuikkon seurang nyo kerasukon roh jahat. Depotkah roh jahat membukak mato urang buta?" ²² Pado waktu iye, hari rayo penahbison belangsung de Yerusalem. Tekalo iye musem dingen, ²³ Ngan Yesus sedang bejelon de Bait Allah, yaitu de serambi Salomo. ²⁴ Mengka, urang-urang Yahudi bekumpul mengelilengi Enye ngan buik kenempat-Nye, " Berape lamo lage Kowe membiarko jiwo kamie bimbang? Munye Kowe Kristus, kehatokolah torus tarang kenempat kamie." ²⁵ Yesus nyimboti mike," Ake sodah ngehatokonye kenempatme, hambuk kowe hopi pecayo. Gaweon-gaweon nyo Ake lakuko delom namo Bepak-Ke, iyelah nyo memboriko kesaksion tentang Ake. ²⁶ Cuma hambuk, kowe hopi pecayo ulehnyo kowe temasuk domba-domba-Ke. ²⁷ Domba-domba-Ke mendongor suaro-Ke, Ake mengenal mike ngan mike mehilui Ake. ²⁸ Ake memboriko hidop kekal kenempat mike, ngan mike hopi bakal perenah binaso; ngan hopi seurang pun depot merobut mike deri tangon-Ke. ²⁹ Bepa-Ke, nyo lah memboriko mike kenempat-Ke, lobeh godong deripado segelo, ngan hopi ado seurang pun depot merobut mike deri tangon Bepak. ³⁰ Ake ngan Bepa adolah sikuk." ³¹ Sekali lage, urang-urang Yahudi bekumpul untok menahukko Yesus. ³² Cuma hambuk, Yesus buik kenempat mike, " Ake lah menunjukko kenempatme lobot gaweon beik deri Bepak, gaweon monekah deri antaronye nyo membuatme hendak menohukko Ake dengan betu?" ³³ Urang-urang Yahudi iye nyimboti Enye," Bukon ulehnyo suatu gaweon beik kamie hendak menohukko Kowe dengan betu, meloinko ulehnyo hujat; ngan ulehnyo Kowe nyo hanyo seruang mendesio, menjediko badan-Me Allah." ³⁴ Yesus nyimboti mike," Bukonkah tetules delom kitab Toratme,' Ake lah bersirman, Kowe adolah allah?' ³⁵ Munye Allah menyobut mike nyo menerimo firman iye 'allah', padohal Kitab Suci hopi pacok de batalko, ³⁶ Ibo kowe ngehatoko tentang Enye nyo lah Bepak kudusko ngan utos ke delom denia,' Kowe menghujat', ulehnyo Ake buik kenempatme,' Ake adolah Anak Allah'? ³⁷ Munye Ake hopi melakuko gaweon-gaweon Bepak-Ke, jengon pecayo kenempat-Ke. ³⁸ Cuma hambuk, munye Ake melakuko gaweon-gaweon iye, meskipun kowe hopi pecayo kenempat-Ke, pecayolah bakal gaweon-gaweon iye enggakkonyo kowe tahuko ngan tereti behwo Bepak de delom Ake, ngan Ake de delom Bepak." ³⁹ Sekali lage, mike mencubo menangkop Yesus, hambuk Enye luput deri mike. ⁴⁰ Mengka, Yesus pogi lage menyeberang sungai Yordan menuju ketempat Yohanes pertamo kali membabtes bilek ngan Yesus tinggal de sane. ⁴¹ Lobot urang njongok kenempat-Nye ngan buik, " Meskipun Yohanes hopi melakuko sikuk tando ajaib pun, hambuk segelo nyo de kehatoko Yohanes tentang Orang nie bonor." ⁴² Ngan, lobot urang menjedi pecayo kenempat-Nye de sane.