¹ Pado mulanye adolah Firman, Firman iye besamo-samo dengan Allah ngan Firman iye adolah Allah. ² Firman iye lah besamo-samo dengan Allah sejak semula. ³ Segelo sesuatu deciptako melalui Nye. Tanpo Nye, segelo sesuatu nyo sodah ado nie hopi mungken pacok ado. ⁴ De delom Nye ado hidop ngan hidop iye adolah Tarang mendesio. ⁵ Tarang iye becehayo de delom kekolomon, ngan kekolomon hopi depot menguasoi-Nye. ⁶ Ado seurang nyo deutus Allah, namonye Yohanes. ⁷ Nye njongok sebagoi saksi untok menyampoiko kesaksion tentang Tarang iye empoknyo melolui nye segelo urang menjedi pecayo. ⁸ Yohanes dewek bukonlah Tarang iye, hambok nye njongok untok menyampoiko kesaksion tentang Tarang iye. ⁹ Tarang nyo sejati, nyo menarangi segelo urang, nak njongok ke denia. ¹⁰ Tarang iye lah ado de denia ngan denia nie dejediko uleh-Nye, hambok denia hopi mengenal-Nye. ¹¹ Enye mendetongi kepunyoon-Nye, hambok kepunyoon-Nye iye hopi menerimo Enye. ¹² Cuma, Mike nyo menerimo Nye debori-Nye kuaso untok menjedi anak-anak Allah, yoitu mike nyo pecayo kepado namo-Nye. ¹³ Mike laher bukon jak deroh atau keinginon deging, atau jak keinginon jento-jenton, meloinko jak Allah. ¹⁴ Firman iye lah menjedi dageng ngan tinggal de antaro kite. Kite lah ngoleh kemuliaon-Nye, nyoiye kemuliaon Anak Tunggal Bepa, ponoh dengan anugerah ngan kebonoron. ¹⁵ Yohanes mbori kesaksion tentang Nye dengan berseru, "Nielah Nye nyo kumaksudko saat ake boek, 'Sesodah ake, nak njongok Nye nyo mendehului ake ulenyo Nye ado sebolum ake. ¹⁶ Jak keponohon-Nye, kite segelo menerimo anugerah demi anugerah. ¹⁷ Sabab, Hukom Taurat deboriko melolui Musa; hambok anugerah ngan kebonoron njongok melolui Yesus Kristus. ¹⁸ Hopi seurang pon perenah ngoleh Allah, hambok Anak Allah Tunggal Allah, nyo ado de pangkuon Bepa, menyatoko-Nye. ¹⁹ Nielah kesaksion Yohanes tekalo urang-urang Yahudi mengotos imam-imam ngan urang-urang Lewi jak Yerusalem untok betanyo kepado Yohanes, "Siapekahkowe?" ²⁰ Yohanes mengaku, ngan nye hopi menyangkalnye, nye mengaku, "Ake bukon Kristus iye." ²¹ Mike betanyo kepadonye, "munye memunye, siapekah kowe? Apokah kowe Elia?" Nye menjawab, "Ake bukon Elia." "Apekah kowe Nabi iye?" Nye menjawab, "Bukon." ²² Kemudion, mike buek kepadonye, "Siapekah kowe, ulenyo kami haros mbori jawabon kepado urang nyo mengotos kami? Ape ulome tentang dirime dewek? ²³ Yohanes menjawab dengan perkatoon Nabi Yesaya, "Akelah suaro urang nyo degerako Nabi Yesaya beseru-seru de padang belantara: Loroskolah jelon bage Tuhan!" ²⁴ Urang-urang Yahudi nyo deotos iye adolah urang Farisi. ²⁵ Lalu, mike bekehato kepado Yohanes, "munye kowe bukon mesias, bukon Elia, ngan bukon Nabi iye, mengka kowe membeptis? ²⁶ Yohanes nyimboti mike, ' Ake membabtes ngan aek, hambok de antaro kou togok Seseurang nyo hopi kou kenal. ²⁷ Enyelah nyo nak njongok setelah ake. Membuka tali sandal-Nye pon, ake hopi pantas." ²⁸ Segelo iye terjedi de Betania, de seberang Sungoi Yordan, tempat Yohanes membabtes. ²⁹ Pagi arinye, Yohanes ngoleh Yesus njongok kepadonye, ngan Yohanes bekehato, "kolelah, Anak Domba Allah nyo mehapusko doso denia! ³⁰ Enyelah nyo ake maksudko tekalo ake buek, sesodah ake nak njongok Seseurang nyo lobeh godong jakpado ake ulenyo Nye sodah ado sebolom ake.' ³¹ Tekaloe, ake hopi mengenalNye, hambok empok Nye denyatako kepado urang-urang Israel, mangka ake njongok membaptes dengan aek." ³² Ngan, Yohanes besaksi, ujonye, "Ake ngoleh Roh turon jak langet upa burung merpati ngan Roh iye tinggal pado-Nye. ³³ Ake dewek hopi mengenal Nye, hambok Nye nyo mengotos ake untok membaptes dengan aek bekehato kepadoke, Enye nyo ke pocok-Nye koe ngoleh Roh turun ngan tinggal, Enyelah nyo nak membaptes dengan Roh Kudus. ³⁴ Ake dewek lah ngoleh ngan membori kesaksion bahwa Enye nielah Anak Allah. ³⁵ Pagi arinye, Yohanes togok lagi besamo duo urang murednye, ³⁶ ngan nye ngoleh Yesus sedang bejelon. Yohanes bekehato, "Kolelah, Anak Domba Allah!" ³⁷ Keduo murednye ndongor pemuekonnye iye lalu mike mehilu Yesus. ³⁸ Yesus menoleh ke belakong ngan tekalo ngoleh mike sedang mengikoti-Nye, Nye bekehato kepado mike, "Ape nyo kou delok?" Mika boek kepado-Nye, 'Rabi (nyo munye deterjemahko retinye: Guru), de monekah Kou tinggal?" ³⁹ Enye boek kepado mike, " Maro ngan kou nak ngolenye." Kemudion, mike njongok ngan ngoleh tempat tinggal besamo-Nye hari iye ulenyo waktu iye kiro-kiro adolah jam kesepoloh. ⁴⁰ Salah sikok jak kedua mured nyo ndongor perkataon Yohanes lalu mehilu Yesus iye adolah Andreas, dolor Simon Petrus. ⁴¹ Sebolumnye, Andreas menemui Simon, dolornyr, ngan memboritahukonye, 'kami lah nomuko Mesias (nyo deterjemahko menjedi 'Kristus'). ⁴² Kemudion, Andreas ngunda Simon kepado Yesus. Yesus memandong Simon ngan boek, "Kowe Simon anak Yohanes. Kowe nak depantou Kefas (Nyo bearti 'Petrus atau 'Betu)." ⁴³ Pagi arinye, Yesus bermaksod lari ke Galilea. Enye betomu dengan Filipus ngan boek kepadonye, "Milulah Ake!" ⁴⁴ Filipus beasal jak Betsaida, kota tempat Andreas ngan Petrus tinggal. ⁴⁵ Filipus betomu dengan Natanael ngan boek kepadonye, "Kami lah menomuko Enye nyo detolesko uleh Musa delom Hukom Taurat ngan uleh paro nabi, nyoiye Yesus jak Nazaret, anak Yusuf." ⁴⁶ Natanael boek kepadonye, "Mungkenkah sesuatu nyo beik detong jak Nazaret?" ⁴⁷ Yesus ngoleh Natanael njongok kepado-Nye ngan boek mengenai Natanael, "Kolelah, seurang Israel sejati, hopi ado kepalsuon de delom nye!" ⁴⁸ Natanael betanyo, "Upamone Kowe mengenal ake?" Yesus menjawab, 'sebolum Filipus memantoume, Ake sodah ngolehme tekalo kowe berado de bewoh kayu aro." ⁴⁹ Jawab Natanael, "Rabi, Kowe adolah Anak Allah. Kowe adolah Rajo urang Israel." ⁵⁰ Yesus menjawab ngan boek kepadonye, " Ulenyo Ake boek kepadome, Ake lah ngolehme de bewoh kayu aro', empok kou pecayo? Kowe nak ngoleh hal-hal nyo jouh lobeh godong jakpado nie!" ⁵¹ Lalu, Nye melanjotko, Sesonggohnye, Ake boek kepadome, kowe nak ngoleh langet tebuka ngan melaekat-melaekat Allah noek turon melayani Anak Mendesio."