¹ Lah kamie melewatinye dengan selamat, kamie tahuko behwo pulau iye de sobut Malta. ² Penduduk asli pulau iye menunjukko kebeikkon hati nyo luor biaso. Sabab, mike menalako api ngan menyambut kamie segelo ulehnyo tekalo iye mulakih hujan ngan hawonye dingen. ³ Tekalo Paulus mengumpulko ranting-ranting ngan memotekkonye de pucuk api, seekor ulor beludak keluor ulehnyo poang iye melilit tangon Paulus. ⁴ Tekalo penduduk asli mengoleh binatong bebisa iye begantung de tangon Paulus, mike buik sikuk samo loin, " Hopi de raguko lage, urang nie adolah seurang pembunoh. Bego enye lah selamat deri lout, keadilon hopi bakal membiarkonye hidop." ⁵ Cuma, Paulus mengibasko binatong iye kedelom api ngan enye hopi menderito luka ape pun. ⁶ Urang-urang iye mengiro Paulus bakal bongkok atau titek ngan te'elek tekalo iye jugo. Cuma, lah mike lamo menunggu ngan hopi mengoleh sesuatu nyo saloh terjedi padonye, mike beubah pekeron ngan ngehatoko behwo Paulus adolah dewa. ⁷ Suatu saat, de sekitar tempat iye, ado tanoh milik pemempen de pulau iye nyo benamo Publius, ny menyambut kamie ngan menjamu kamie dengan ramahnye selamo tiga hari. ⁸ Waktu iye, bepak Publius tebereng de tempat ketiduronnye ulehnyo domom ngan desentri. Paulus njongok untok menenggak ngan mendoakonye, mengka menumpangko tangonnye ke pucuk urang iye ngan menyembuhkonnye. ⁹ Lah peristiwo iye terjedi, urang-urang loinnye de pulau iye nyo sedang saket jugo njongok kenempat Paulus ngan de sombuhko. ¹⁰ Mike jugo semaken menghormati kamie ngan tekalo kamie siap belayar, mike menyediako segelo sesuatu nyo kamie perluko. ¹¹ Lah tiga bulan belalu, kamie belayar de delom sebuah biduk deri Aleksandria, nyo belabuh de pulau iye selamo musem dingen dengan mamakoi Dioskuri sebage lambangnye. ¹² Lah sampoi de Sirakusa, kamie tinggal de sane selamo tiga hari. ¹³ Deri sane, kamie belayar menyusuri pantai ngan sampoi de Regium. Pepaginye, angen selatan behembus, ngan pado hari berikutnye, kami sampoi de Putioli. ¹⁴ De sane, kamie menjumpai beberape dulur seiman ngan de undang untok tinggal serompok mike selamo tujuh hari. Mengka, kami pogi ke Roma. ¹⁵ Ngan, dulur-dulur seiman de sane, tekalo mendongor tentang kamie, njongok deri sane sampoi ke Forum Apius ngan Tres Teberne untok menjumpai kamie. Tekalo Paulus mengoleh mike, enye bersyukur kenempat Allah ngan hatinye de kuatko. ¹⁶ Tekalo kamie sampoi de Roma, Paulus de perbulehko untok tinggal dedewekon, dengan seurang prajurit nyo mengawalnye. ¹⁷ Tiga hari kemudion, Paulus mengumpulko pemempen-pemempen Yahudi setempat, ngan lah mike bekumpul, enye buik kenempat mike," dulur-dulur, meskipon ake hopi melawon bengeso kite atau adat istiadat nenek puyang kite, hambuk ake de serahko sebage seurang tahanon deri Yerusalem kenempat tangon urang-urang Roma. ¹⁸ Tekalo mike sodah memeriksoke, mike ama membebasko ake ulehnyo hopi ado aloson untok hukumon te'elek bageke. ¹⁹ Cuma hambuk, ulehnyo urang-urang Yahudi keberaton, ake tepakso noek bandeng kenempat Kaisar, bukon bearti ake mempunyoi tuduhon untok melawon bengesoke. ²⁰ Jedi, iyelah sababnye, ake lah memintak untok mengolehme ngan buik denganme ulehnyo ake de kobot dengan ratoi nie demi pengharopon Israel." ²¹ Mengka, mike buik kenempat Paulus," Kamie hopi menerimo surat tentangme deri Yudea ngan hopi ado sikuk pun deri dulur-dulur seiman nyo njongok ke sie untok membori kabar atau ngehatoko sesuatu nyo buruk tentang kowe. ²² Cuma, kamie amat mendongor derime ape pendepotme ulehnyo tentang sekte nie, kamie tahuko behwo de mone-mone urang-urang menentangnye." ²³ Tekalo mike sodah menentuko sikuk hari untok Paulus, mike njongok kenempat Paulus de tempat penginaponnye, serompok serombongon urang lobot. Deri pagi sampoi malom, Paulus menjelasko kenempat mike dengan besaksi tentang kerajakon Allah ngan beusaha menyakinko mike tentang Yesus, beik deri Hukom Torat Musa, maupun kitab padong nabi. ²⁴ Beberape urang menjedi yakin melalui ape nyo de kehatoko Paulus, hambuk nyo loinnye menolak untok pecayo. ²⁵ Tekalo mike hopi setuju sikuk samo loin, mike pun pogi lah Paulus ngehatoko pernyataon nie," Memang bonor ape nyo de kehatoko Roh Kudus kenempat nenek puyangme melalui Nabi Yesaya, ²⁶ ' Pogilah kenempat bengeso nie ngan buikkolah : Kowe bakal mendongor, hambuk hopi bakal perenah memahami, ngan kowe bakal mengoleh, hambuk hopi bakal perenah tereti. ²⁷ Sabab, hati bengeso nie lah menebal ngan telingonye berat untok mendongor. Mike lah menutup matonye. Enggakkonyo, jengon mike mengoleh dengan mato mike, mendongor dengan telingo mike, tereti dengan hati mike ngan bebelek. Mengka, Ake bakal menyombuhko mike.' Yesaya 6:9-10 ²⁸ Ulehnyo iye, biarlah hal nie kowe tahuko behwo keselamaton nyo deri Allah nie lah de sampoiko kenempat bengeso-bengeso loin ngan mike bakal mendongorko." ²⁹ [ Lah Paulus menyampoiko pembuikkon-pembuikkon iye, urang-urang Yahudi pogi dengan lobot perbedaon pendepot de antaro mike.] ³⁰ Paulus tinggal selamo dua tahun ponuh de rumah nyo de sewanye dewek ngan menyambut segelo urang nyo njongok kenempatnye, ³¹ Sambel memberitako kerajakon Allah ngan mengajor tentang Tuhan Yesus Kristus dengan ponuh keberanion ngan hopi rintangon ape pun.