¹ Lah de putusko behwo kamie bakal belayar ke Italis, mike menyerahko Paulus ngan bebeape tahanon loin kenempat seurang perwira pasukon Agustan, nyo benamo Yulius. ² Kamie noek ke sebuah biduk deri Adramitium nyo bakal enggakkonyo belayar ke berbage pelabuhon de sepanjong pantai Asia. kamie belayar de kanti ule Aristarkhus, urang Makedonia deri Tesalonika. ³ Pado hari berikutnye, kamie sampoi de Sidon. Yulius memberlakuko Paulus dengan ponuh perhation ngan memperbulehko Paulus njongok kanti-kantinye untok mengurus keperluon Paulus. ⁴ Deri sane, kamie bejelon ngan belayar menyusuri Siprus ulehnyo angen behembus belawonon arah. ⁵ Lah kamie sodah belayar melewati pantai Kilikia ngan Pamfilis, kamie sampoi de Mira de Likie. ⁶ De sane, perwira iye menomuko sebuah biduk deri Aleksandria nyo sedang belayar ke Italia, mengka enye memindahko kamie ke biduk iye. ⁷ Kamie belayar dengan lambot selamo beberape hari, ngan dengan susah payah kamie sampaoi de Knidus. Ulehnyo angen hopi memungkinko kamie untok pogi lobeh jouh, kamie belayar menyusuri pantai Kreta kearah tanjung Salmone. ⁸ Kamie belayar melewati tanjung iye dengan susah payah ngan sampoi de sebuah tempat benamo pelabuhon Indah, nyo berado de parok kota Lasea. ⁹ Ulehnyo kami menyadari lah kehilangon lobot waktu, ngan tekalo kinie, pejelonon lout iye sajo bahayo ulehnyo maso puaso urang Yahudi sodah lewat, Paulus menasehati mike, ¹⁰ Ngan buik kenempat mike," Dulur-dulur, ake mengoleh behwo pelayaran nie bakal de sertai dengan kerusakon ngan kerugion godong, bukon hanyo muatan ngan biduknye, hambuk jugo nyawo kite." ¹¹ Cuma, perwira iye lobeh pecayo kenempat nahkoda ngan pemilek biduk deripado pembuikkon Paulus. ¹² Ulehnyo hopi beik tinggal de pelabuhon iye selamo musem dingen, sebageon godong urang setuju untok pogi belayar deri sane ngan munye-mumunye mike depot mencapai Feniks, sebuah pelabuhon de Kreta, nyo menghadop ke arah barat daya ngan barat lout, ngan tinggal de sane selamo musem dingen. Angen nyo sajo kuat menerpa biduk Paulus. ¹³ Tekalo angen sepoi-sepoi behembus deri selatan, mike bepeker behwo mike sodah mencapai tujuon mike. Ulehnyo iye, mike menarek jangkar ngan belayar de sepanjong pantai de Kreta. ¹⁴ Cuma hambuk, hopi lamo kemudion, angen upa topan, nyo de sobut Euroklidon, behembus deri pulau iye. ¹⁵ Tekalo biduk kamie de landa ule angen iye ngan hopi pacok lage menghadopi halauannye, kamie menyerah ngan membiarko biduk kamie terombang-ambing. ¹⁶ Tekalo kamie bejelon menyusuri pulau kecik nyo benamo Kauda, dengan susah payah kamie behasel mengendaliko sekoci biduk kamie. ¹⁷ Lah awak biduk mengerek sekoci ke pucuk biduk, mike menggunako tali-tali penolong untok memperkuat biduk iye. Ulehnyo mike takut tedampor de Sirtis, mike menurunko alat-alat biduk singgo membiarko biduk mike teombang-ambing. ¹⁸ Pado sari berikutnye, ulehnyo kamie de ombang-ambingko dengan terjangon badai nyo sajo hebat, urang-urang mulakih campok muatan biduk. ¹⁹ Ngan, pado sari nyo ketiga, mike campok alat-alat biduk ddengan tangon mike dewek. ²⁰ Ulehnyo beik matoari maupun bintang-bintang hopi timbul selamo beberape hari ngan badai nyo hopi kecik menerjang kamie, sayaulah segelo haropon kamie untok de selamatko. ²¹ Ulehnyo lobot urang lah pogi sajo lamo hopi makonon, Paulus togok de tangah-tangah mike ngan buik, " Dulur-dulur, enggakkonyo kowe menuruti nasehatke ngan hopi belayar deri Kreta singgo mengalami kerusakon sereta kerugion upa nie. ²² Cuma kinie, ake mendorong kowe untok tetap tabah ulehnyo de antarome hopi ado nyo bakal kehilangon nyawonye, hambuk hanyo kehilangon biduk. ²³ Sabab, malom kemari, ado malaikat Allah, nyo memilikih ake ngan nyo ake sembah, togok de hadoponke, ²⁴ Sambel buik, " jengon takut, Paulus. Kowe harus togok de hadopon Kaisar. Ngan, kolehko, Allah lah bemurah hati kenempatme ngan segelo urang nyo belayar serompokme.' ²⁵ Ulehnyo iye, dulur-dulur, tabahko hatime ulehnyo ake pecayo de delom Allah behwo segelo bakal terjedi upa nyo lah de boritahuko kenempatke. ²⁶ Cuma, kite harus tedampor de sebuah pulau." ²⁷ Cuma hambuk, pado malom keempat belas, tekalo kamie lage teombang-ambing de sepanjong laut Adria, kiro-kiro tangah malom, padong awak biduk mendugo behwo mike sedang memaroki deroton. ²⁸ Mike menohukko betu duga ngan menomuko behwo kedelomon aeknye dua puluh depa. Tekalo, mike maju sedeket lage, mike belek menohukko betu duga ngan tahuko kedelomon aeknye lima belas depa. ²⁹ Ulehnyo kamie takut bakal kandas de betu karang, mike menurunko empat jangkar deri buriton ngan bedoa enggakkonyo hari cepat siang. ³⁰ Cuma hambuk, tekalo beberape awak biduk beusaha untok melariko diri deri biduk ngan lah menurunko sekoci ke lout dengan icak-icake menurunko jangkar deri haluon, ³¹ Paul buik kenempat perwira iye ngan padong prajuritnye, " Munye uran-urang iye hopi tinggal de delom biduk, kowe hopi depot de selamatko." ³² Lah iye, padong prajurit menotok tali sekoci ngan membiarkonye hanyot. ³³ Tekalo parok pagi hamper sampoi, Paulus memintak mike segelo untok mengambek beberape makonon, dengan buik," Sari nie adolah hari keempat belas kowe torus-menorus berado de delom ketegangon ngan menahon lapor ulehnyo hopi makon ape pun. ³⁴ Ulehnyo iye, ake memintak untok mengambek beberape makonon empunyo keselamatonme. Sabab, hopi ado sehelai rambutpun nyo bakal sayau deri antaro kowe." ³⁵ Lah ngehatoko hal nie, Paulus mengambek roti ngan mengucap syukur kenempat Allah de hadopon mike segelo, memacah-macahko roti iye, ngan mulakih makon. ³⁶ Mengkah, mike segelo de toguhko hatinye ngan mike dewek jugo makon. ³⁷ Jumlah kamie segelo nyo ado de delom biduk ado 276 urang. ³⁸ Lah makon sampoi konyong, mike meringanko biduk dengan mencampok gandum ke lout. ³⁹ Tekalo hari mulakih siang, mike hopi tahuko adonyo deroton, hambuk mike memperhatiko sebuah teluk nyo bepantai, tempat mike memutusko untok melabuhko biduk de sane munye-mumunye. ⁴⁰ Mengkah, lah melemparko jangkar-jangkar, mike meninggalkonye de delom lout, ngan de waktu nyo samo, melapasko tali-tali kemudi ngan menoekko layar de bageon depan biduk enggakkonyo angen mengunda mike sampoi ke pantai. ⁴¹ Cuma hambuk, biduk membentor karang de tempat betomunye dua lout singgo biduk iye kandas. Haluan biduk tesangkut ngan hopi pacok begorok, tekalo buriton biduk hancor ulehnyo hantamon gelombang. ⁴² Padong prajurit mempunyoi rencano untok membunoh padong tahanon enggakkonyo hopi ado seurang pun nyo berenang ngan melariko diri. ⁴³ Cuma, perwira iye, beharop depot menyelamatko Paulus, mencegah rencana mike. Enye memerentahko enggakkonyo urang-urang nyo pacok berenang untok melompat lobeh dehulu deri biduk ngan menuju deroton. ⁴⁴ Ngan, sisanye ado nyo de pucuk papan, ado pula nyo menggunako benda-benda loinnye deri biduk. Dengan upa nio, segelo urang sampoi ke deroton dengan selamat.