¹ Salam deri Paulus, Silwanus, ngan jemaat Timotius, kepodo jemaat de Tesalonika delom Allah, Bepa kite, ngan Tuhan Yesus Kristus. ² Anugerah ngan damoi Sejahtera bagime deri Allah, Bepa kite, ngan Tuhan Yesus Kristus. ³ Kamis haros selalu besyokor kepodo Allah untok kowe, dolor-dolor, ngan memang sepatotnyelah demikion. Sabab imanme bertombo ngan melimpah ngan kase nyo kowe depotko masing-masing terhadop sesamome semaken godong. ⁴ Uleh sabab iye, kami dedewekon ngomong ngan bangga mengenai kowe de hadapon jemaat-jemaat Allah karena kesabaran ngan imanme de tengah segelo kekarason ngan penderitaon nyo kowe alami. Tentang Penghakimon Allah ⁵ Nie adolah bukti penghakimon nyo nyo adil deri Allah behwo kowe dianggaplayak bage kerajaon Allah kerena kowe jugo lah menderita. ⁶ Sabab, adil bage Allah untok membelasko ngan penindason kepodo nye ngan membuatme menderita, ⁷ hambok boriko kelegaon kepodo kowe nyo detindas, ngan jugo kepodo kamie, saat Tuhan Yesus denyatoko deri surgo besamo para malaikat-Nye nyo dahsyat, ⁸ delom api nyo marok, untuk melakuko pembeloson kepodo mike segelo nyo hopi mengenal Allah ngan hopi taat kepodo Injil Yesus Tuhan kite. ⁹ Kowe nak mengalami hukumon kebinasoon nyo kekal, jouh deri hadirat Tuhan ngan deri kemuliaon kekuasaon-Nye ¹⁰ ketiko Nye detong untuk demuliako de antaro urang-urang kudus-Nye ngan untuk dekagumi de antaro segelo urang nyo lah pecayo-- sabab kesaksion kami kepodome depecayo. ¹¹ Kerno iye, kamie selalu berdoa ontokme kironye Allah kite menganggop kowe layak akan panggilonme ngan memenuhi setiap keinginon ontok berbuat beik ngan pekerjaon iman dengan kuaso-Nye, ¹² supayo namo Tuhan Yesus demuliako de delom kowe, ngan kowe de delom Nye, sesuoi ngan anugerah Allah kite ngan Tuhan Yesus Kristus.