¹ Roh mengerahkoh ngan jelas behwa waktu-waktu teakher, sebageon urang akan meninggalko imannye ngan menyerahkoh diri kepodo roh-roh penyosot ngan ajaron setan-setan. ² Mike depengarohi melalui kemunafikon para pelato nyo hati nurani soda decap ngan bosi hangot. ³ Mike melarong urang menikah ngan melarong urang makon makonan nyo deciptakoh Allah, nyo seharosnye deterimo ngan ucapon sukor uleh mike nyo percayo ngan mengenal kebonoron. ⁴ Sabab, segelo sesuatu nyo deciptokoh uleh Allah iye beik ngan hopi ado nyo haram kale deterimo ngan ucapon sukor, ⁵ ulehnyi segelo iye dekudusko uleh firman Allah ngan doa. ⁶ Ngan mengajorko hal-hal nie kepodo dolor-dolor seiman, kowe akan menjedi pelayan Yesus Kristus nyo beik, upamone kowe elah dedidik delom pemboek-pemboekon iman ngan ajaron sehat nyo elah kowe ikoti. ⁷ Jouhila cerito-cerito takhayul ngan dongeng-dongeng nenek tuha, cuma latehlah dirime untok hidop delom kesalehon. ⁸ Latehon jasmani terbatas gunanye, cuma kesalehon berguna delom segelo hal ulehnyo mengandong jenji untok kehidopan kinie ngan jugo kehidopan nyo akan detong. ⁹ Pemboekon nie pacok depecayo ngan layak deterimo seponohnye. ¹⁰ Untok iyelah, kite begawe karas ngan bejuang. Sabab, kite memoteko pengharapon kite kepodo Allah nyo hidop, nyo adolah Joro Selamat segelo mendesio, teristimewa mike nyo pecayo. ¹¹ Perentahko ngan ajarkolah hal-hal nie. ¹² Jengan ado urang nyo merendahko kowe ulehnyo kowe muda, cuma jadila teladan bage urang-urang pecayo delom pemboekon, tingkah laku, kaseh, iman, ngan kesucion. ¹³ Sampoi ake detong, betekunlah delom pembacoon besamo Kitab Suci, delom membori nasehat, ngan delom mengajor. ¹⁴ Jengon menyia-siako kurnia rohani nyo ado podome, nyo deboriko kepodome melalui nubuaton ketiko dewan penatua menumpangko tangan pocokme. ¹⁵ Lakukolah hal-hal nie ngan rajen, borikolah dirime seotohnye untok melakukoh hal-hal nie empoknyo segelo urang pacok mengelek kemajuonme. ¹⁶ Perhatiko ngan songgoh-songgoh upamone kowe hidop ngan ape nyo kowe ajarko. Betekunlah de delomnye ulehnyo ngan bebuat demikian kowe akan menyelamatko, beik dirimu dewek maupon mike nyo mendongor ajoranme.