¹ Pertamo-tamo, ake menasihatko kowe untok menoekkoh permohonon, doa, doa syafaat, ngan ucapon sukor bage segelo urang, ² bage rajo-rajo, ngan segelo urang nyo dudok de pemerintahon empoknye kita pacok menjeloni hidop nyo tenang ngan damai delom segelo kesalehon ngan kehormaton. ³ Hal nie beik ngan bekenan de hadopon Allah, Joro Selamat kite, ⁴ nyo menghendaki segelo urang deselamatko ngan sampoi kepodo pengetahuon akan kebonoron. ⁵ Sabab, anyo ado sikok Allah ngan siko perantaro antaro Allah ngan mendesio, nyoiye mendesio Yesus Kristus, ⁶ nyo elah memberiko diri-Nye dewek sebagoi toboson bage segelo urang. Kesaksion nie denyotoko podo waktu nyo detetapko-Nye. ⁷ Untok iyelah, ake detetapko sebagoi pengkhotbah ngan rosul -- ake boek bonor, ake hopi pelato -- ngan sebagoi guru delom iman ngan kebonoron bage bangsa-bangsa loen. ⁸ Ulehnyo iye, ake endok jenton-jenton de segelo tempat bedoa sambel mengangkot tangannye nyo kudus tanpo kemarahon ngan pertengkaron. ⁹ Upanio jugo, ake endok betina bepakyon pantas, ponoh kesopanon ngan pengendalion diri. Perhiasonnye bukonlah rambot nyo de sentagen-tagen, emas, mutiara apo pakoyon mahal, ¹⁰ meloenko perbuaton-perbuaton beik seupamone pantasnye betino nyo memeleki kesalehon. ¹¹ Seurang betina haroslah belajor delom ketenangon ngan delom segelo ketaaton. ¹² Cuma hambok, ake hopi mengezenko betina mengajor apo nyoroh jenton-jenton. Hambok, betina haros tetap tenang ¹³ ulehnyo Adam deciptakoh pertamo, beheru kemudion Hawa, ¹⁴ ngan bukon Adam nyo de tipu, meloenko betina nyo de tipu ngan titek delom pelanggaron. ¹⁵ Hambok, betina akan deselamatko melalui kelahiron anak jika mike terus hidop delom iman, kaseh, ngan kekoduson ngan pengendalion diri.