(Salam untok Timotius) ¹ Deri Paulus, nyo menjedi rosul Yesus Kristus ulehnyo perintah Allah, Joros Selamat kite, ngan Yesus Kristus, pengharapon kite. ² Untok Timotius, anak nyo sah delom iman. Anugerah, belas kaseh, ngan damai sejahtera deri Allah Bepa kite ngan Yesus Kristus, Tuhan kite. ³ Upamone ake memohon kepodome tekalo ake bejalon ke Makedonia, tetaplah tinggal de Efesus empoknye kowe pacok menasehati berape urang empoknye mike hopi mengajorkoh ajoron-ajoron loen, ⁴ apo memusatko perhation mike podo dongeng-dongeng ngan silsila-silsila nyo hopi ado akhernye. Iye justru njongok koh perdebaton, bukonnyo menjelonkoh tugas pelayanon Allah nyo digaweko ule iman. ⁵ Hambok, tujuon deri perintah iye adolah kaseh nyo berasal deri hati nyo murni, nurani nyo beik, serta iman nyo tolos. ⁶ Berape urang elah menyimpang deri tujuon nie ngan tersosot delom pembicaraon nyo sia-sia. ⁷ Mike endok menjedi ahli Hokum Torat, cuma hopi memahami ape nyo mike kehatoko upa hal-hal nyo mike yakeni. ⁸ Cuma hambok, kite tahu Hokum Torat iye beik jika urang menggunakohnye upa mone mestinye, ⁹ ngan kesadaron behwa Hokum Torat hopi de buat untok urang bonor, melonko untok pelanggar hokum ngan pemberontak, urang fasik ngan urang bedoso, urang nyo hopi kudus ngan duniawi, mike nyo membunoh bepak ngan indoknye dewek, pembunoh, ¹⁰ urang asusila nyo melakuko dosa seksual, homoseksual, penculik, pelato, saksi dusta, ngan siape bae nyo melawon ajoron nyo sehat, ¹¹ nyoiyeh ajaron Injil nyo melia deri Allah sumber berkat, nyo elah depercayokoh kepodome. ¹² Ake besukor kepodo Nye nyo elah menguatkonme, nyoiye Yesus Kristus, Tuhan kite, ulehnyo Nye menganggop ake setia ngan menempatko ake delom pelayanon nie. ¹³ Walaupon dahulu ake seurang penghujat, penganiayo, ngan urang nyo kejam, cuma ake menerimo belas kaseh ulehnyo dahulu ake melakukonnye tanpo pengertion ngan delom kehopipercayaon. ¹⁴ Tuhan memberiko kepodoke anugerah nyo melempah, besamo-samo ngan iman ngan kaseh delom Yesus Kristus. ¹⁵ Pengekataon nie pacok depecayo ngan layak deterimo seponohnye behwa Yesus Kristus detong ke dunia untok menyelamatko urang-urang bedoso; de antaro mike, akelah nyo paleng bedoso. ¹⁶ Untok alason niela, ake mendepotkoh belas kasehan, nyoiye supayo de delom ake, urang nyo paleng bedoso nie, Yesus Kristus menunjokko kesaboron-Nye nyo sempurna sebagoi contoh bage mike nyo cuma pecayo kepodo-Nye untok memperoleh hidop nyo kekal. ¹⁷ Bage Rajo atas segelo zaman, nyo kekal, ngan nyo hopi tekoleh, satu-satunye Allah, hormat ngan kemeliaon sampoi selamo-lamonye. Amin. ¹⁸ Perentah nie keboriko kepodome, Timotius, anakke, sesuoi ngan nubuaton nyo pernah deboriko tentang kowe, ngan nubuaton iye bejuanglah delom perjuangon nyo beik, ¹⁹ sambil bepegang podo iman ngan hati nurani nyo beik. Berape urang elah menolam melakukonye sehinggo kandoslah iman mike. ²⁰ De antaronye adolah Himeneus ngan Aleksander, nyo elah keserahko kepodo Setan empoknyo mike belajor untok hopi menghujat.